Almennt

Opið hús verður í félagsaðstöðu ÍRA í Skeljanesi fimmtudaginn 27. mars fyrir félagsmenn og gesti frá kl. 20:00 til kl. 22:00.

Fundarsalur, fjarskiptaherbergi og QSL stofa á 2. hæð verða opin. Mathías Hagvaag, TF3MH QSL stjóri verður búinn að fara í pósthólfið og raða kortum.

Góður félagsskapur og nýjustu amatörtímaritin. Sveinn Goði Sveinsson, TF3ID annast kaffiveitingar.

Verið velkomin í Skeljanes!

Stjórn ÍRA.

Opið var í félagsaðstöðu ÍRA í Skeljanesi fimmtudaginn 20. mars. Henry Arnar Hálfdánarson, TF3HRY mætti með erindi kvöldsins sem fjallaði um „Loftnet og útgeislun á lægri böndum“. Þetta var fjórða erindið á nýrri vordagskrá ÍRA fyrir tímabilið febrúar-maí 2025.

Henry hóf erindið á því að útskýra umfjöllunarefnið, sem væru loftnet á lágum bylgjum sem væru neðri parturinn á HF niður í miðbylgjur, t.d. á 630 metra bandinu. Hann nefndi, að loftnetin sem slík væru yfirleitt skilgreind sem stutt loftnet og því værum við yfirleitt að tala um að vinna með stutt loftnet og skilgreining á þeim er að þau eru styttri en 1/8 λ. Það væri því einkennandi að við værum að vinna með net sem ekki eru í „resonance“ öfugt við það sem almennt gerist og gengur á öðrum amatörböndum, þar sem margir notuðu t.d. kvartbylgju eða hálfbylgjuloftnet.

Loftnetum sem þessum megi skipta í tvo flokka, loftnet sem eingöngu væru á færi opinberra aðila að reisa, eins og t.d. mastrið á Gufuskálum sem er 416 metrar á hæð og hinsvegar hinn hópurinn, radíóamatörar, sem helst gætu leyst málið með því að reisa e.t.v. rafmagns- eða símastaura úti í garði heima hjá sér eða í sumarbústað. Henry sagði að það væru loftnetin sem hann ætlaði að fjalla um.

Í framhaldi útskýrði hann vel útgeislun frá „stuttum loftnetum“ m.v. bylgjulengd, sem fyrst og fremst sendu út á jarðbylgju þótt ennfremur komi speglun um lengri vegalengdir [erlendis frá], þ.e. DX. Hann útskýrði jafnframt mikilvægi jarðleiðni, en í raun væru minnst töp, þ.e. deyfing á útsendu merki þegar sent er frá loftneti sem er yfir söltum sjó.

Hann tók sem dæmi lóðrétt stangarloftnet (fætt á móti jörð). Það hefði mjög hátt sýndarviðnám í fæðingu vegna þess hve stutt það væri og rýmdarkennt (Z = X_c) og hegðaði sér í raun eins og þéttir. Gríðarlega sterkt rafsvið yrði í kringum loftnetið sem myndaði kúlu. Loftnet sem þetta þyrfti að hafa mjög gott jarðskaut til að vinna á móti töpum og fá fram sæmilegan virkan. Henry sagði að í raun skipti þó öllu máli að koma lóðrétta leggnum sem lengst upp í loftið.

Henry kom í framhaldi inn á fjölmargar lausnir sem nýtast radíóamatörum, en of langt mál er að rekja hér. Eindregið er mælt með að hlaða niður erindinu, sem er fróðlegt, skemmtilegt og afar nytsamlegt fyrir radíóamatöra sem hafa áhuga á lægri tíðnisviðunum. Henry svaraði mörgum fyrirspurnum jafnt og þétt, en einnig í lok erindisins. Þess má geta, að umræður héldu áfram eftir það og þegar búið var að hella upp á nýtt kaffi, voru málin rædd áfram áfram fram að miðnætti.

Sérstakar þakkir til Henry Arnars Hálfdánarsonar, TF3HRY fyrir stórfróðlegt og áhugavert erindi. Þess má geta það var tekið upp og má hlaða því niður á hér ( tvískipt): Fyrri hluti: https://youtu.be/Hz-I_RcQX1U  Síðari hluti: https://youtu.be/57aozPzi3Ac

Þakkir til Andrésar Þórarinssonar, TF1AM fyrir upptökuna, til Njáls H. Hilmarssonar, TF3NH fyrir að vista upptökuna á netinu og til Sveins Goða Sveinssonar, TF3ID fyrir að laga kaffi og taka fram meðlæti.

Alls mættu 20 félagar (þar af 1 gestur) í Skeljanes þetta ágæta fimmtudagskvöld í mildu vetrarveðri í vesturbænum í Reykjavík.

Stjórn ÍRA.

.

Vordagskrá ÍRA fyrir tímabilið febrúar-maí 2025 heldur áfram á fimmtudag, 20. mars í Skeljanesi.

Þá mætir Henry Arnar Hálfdánarson, TF3HRY með erindi um: „Loftnet og útgeislun á lægri böndum“. Húsið opnar kl. 20:00 en Henry byrjar stundvíslega kl. 20:30.

Fundarsalur, fjarskiptaherbergi og QSL stofa á 2. hæð verða opin. QSL stjóri verður búinn að fara í pósthólfið og flokka kortasendingar og Sveinn Goði Sveinsson, TF3ID lagar kaffi og tekur fram meðlæti.

Félagsmönnum er bent á að láta erindið ekki framhjá sér fara.

Verið velkomin í Skeljanes!

Stjórn ÍRA.

Opið hús verður í félagsaðstöðu ÍRA í Skeljanesi fimmtudaginn 13. mars fyrir félagsmenn og gesti frá kl. 20:00 til kl. 22:00.

Fundarsalur, fjarskiptaherbergi og QSL stofa á 2. hæð verða opin. QSL stjóri verður búinn að fara í pósthólfið og raða kortum.

Góður félagsskapur og nýjustu amatörtímaritin. Sveinn Goði Sveinsson, TF3ID annast kaffiveitingar.

Verið velkomin í Skeljanes!

Stjórn ÍRA.

Opið var í félagsaðstöðu ÍRA í Skeljanesi fimmtudaginn 6. mars. Vilhjálmur Í. Sigurjónsson, TF3VS mætti með erindi kvöldsins sem fjallaði um „Logger32 dagbókarforritið; auknar vinsældir þess og nýja möguleika“. Þetta var þriðja erindið á nýrri vordagskrá ÍRA fyrir tímabilið febrúar-maí 2025.

Vilhjálmur kynnti fjarskiptaforritið „Logger32“ sem er mest notaða loggforrit í heimi, ef marka má Logbook of The World (LoTW) og ClubLog. Forritið er ekki stórt að umfangi, en er afar öflugt og hefur þróast stöðugt í fjölda ára. Logger32 er afar viðbragðsfljótt í notkun og er sett ofan á innbyggðan gagnagrunn. Einn kostur Logger32 er það getur tekið forrit frá öðrum og keyrt sem undirforrit og á þann hátt þegið og veitt upplýsingar í og úr loggbókinni. Það tengist þannig auðveldlega öðrum samskiptaforritum t.d. fyrir FT8, RTTY og öllum öðrum slíkum.

Þá er það einstakt að Logger32 kostar ekkert, og er algjörlega frítt til radíóamatöra. Þá er það ekki síður sérstakt að það er ekki einungis á ensku, heldur býðst það með ótal tungumálum og þar á meðal á íslensku, en Vilhjálmur hefur íslenskað það sem hægt er og farist það afar vel úr hendi.

Logger32 er með öflugt innbyggt kerfi sem heldur utan um viðurkenningar radíóamatöra. Í annan stað, er innbyggð tenging yfir netið á þyrpingu (e. cluster) sem veitir upplýsingar um kallmerki sem eru virk í loftinu hverju sinni, á hvaða bandi sem er. Og ef það skyldi koma DXCC eining í loftið sem ekki er þegar skráð á viðkomandi bandi og mótun, þá sprettur það upp, eiginlega með áskorun um að „grípa“ landið. Allt virkar þetta afar vel. Það var gerður góður rómur að erindi Vilhjálms og
fyrirspurnir voru margar.

Erlendir gestir ÍRA þetta fimmtudagskvöld voru hjónin Ole Garpestad, LA2RR, fyrrv. varaforseti IARU, alheimssamtaka landsfélaga radíóamatöra og eiginkona hans, Karin Margot Garpestad, LA8UW.

Sérstakar þakkir til Vilhjálms Í. Sigurjónssonar, TF3VS fyrir fróðlegt og áhugavert erindi. Þess má geta að erindið var tekið upp og má hlaða því niður á þessari vefslóð: https://www.youtube.com/watch?v=Nyc-30JzGI8  Þakkir til Andrésar Þórarinssonar, TF1AM fyrir upptökuna og til Njáls H. Hilmarssonar, TF3NH fyrir að vista upptökuna á netinu.

Alls mættu 19 félagar og 3 gestir þetta ágæta fimmtudagskvöld í mildu vetrarveðri í vesturbænum í Reykjavík.

Stjórn ÍRA.

(Texti: Andrés Þórarinsson, TF1AM varaformaður ÍRA).