Almennt

Mjög var ánægjulegt að frétta af HF magnarakaupum IRA í síðustu viku, og enn ánægjulegra að fá fréttir af því að magnarinn er kominn til landsins, uppsettur og prófaður með góðum árangri í Skeljanesinu. Af þessu tilefni langar mig að færa þeim fjölmörgu félögum okkar sem lögðu peningasöfnun fyrir magnaranum lið sl. vetur innilegar þakkir.  Alls söfnuðust kr. 328000 og voru framlög hvers og eins frá kr. 10000 og upp í kr. 40000.  Fleiri lögðu söfnuninni lið, enda þótt ekki væri um bein peningaframlög að ræða.  Þeim eru einnig færðar innilegar þakkir. Peningarnir voru millifærðir á TF3SG í apríl sl., og honum, ásamt TF2JB þáv. formanni, afhentur upplýsingalisti yfir framlögin. Svo sem kunnugt er þá var keyptur Yaesu Quadra VL-1000 magnari.  Hann mun hafa kostað um 4300 USD.  Bestu kveðjur til ykkar allra, og til hamingju.   Stefán – TF3SA

Fyrsti D-Star endurvarpinn á Íslandi var í gær settur á sinn stað í Bláfjöllum samkvæmt innleggi frá TF3ARI á spjallinu sem hefur séð um uppsetningu búnaðarins. Endurvarpinn er í eigu TF3ML og er á tíðniparinu Tx 439,950/Rx 434,950 MHz. Nú er bara að að fá sér tæki með D-Star mótun og byrja að tala um allan heim á einum endurvarpa.

Friðrik Alexandersson var með mjög áhugaverða og lærdómsríka umfjöllun um EMC, flökkustrauma og jarðbindingu í Skeljanesi á fimmtudagskvöld. Takk fyrir okkur Friðrik.

Friðrik sýndi okkur hvers vegna betra væri að vera með fimm víra veitukerfi, þrír fasar, núll og jörð í stað fjögurra eins og víðast er á Íslandi eða með öðrum orðum að vera með sérstakan jarðleiðara. Hann sagði okkur frá því að í helstu löndum yfir í Evrópu væru kerfin fimm víra en á Íslandi er fimm víra kerfi einungis í tveimur hverfum, Garðahverfi og einu hverfi á Akureyri. Friðrik sagði okkur frá því að steinsteypa væri góður leiðari sem kom flestum ef ekki öllum áheyrendum á óvart og sagði að ein besta aðferð við að búa til gott jarðskaut í steinsteypubyggingum væri að bora eða brjóta sig inn að járnagrind og tengja við grindina. Næstum tilgangslaust væri að tengja við ofn eða kaldavatnslagnir vegna einangrunar frá jörð og nýju plaströranna. Í timburhúsum og þar sem ekki er hægt að komast í járnagrindina væri ekkert annað ráð en að búa til utandyra jarðskaut með því að reka allt að þriggja metra langan tein niður í jarðveginn, einn eða fleiri. Því fleiri sem jarðteinarnir eru þeim mun betri jörð. Mikilvægt væri einning að nota vel sveran koparvír til að tengja jörðina við húskerfið og uppí/inní sjakkinn.

í umræðum í lokin kom upp tillaga um að heimsækja sem flesta amatöra og skoða og mæla jörðina hjá þeim en heldur dró úr mönnum þegar Friðrik benti á að til að fá viðmiðun yrði annar púnkturinn í mælingunni helst að vera vel utan við stór-Reykjavíkursvæðið….

Hvernig er annars jörðin hjá þér?

… um næstu helgi er SAC SSB-keppnin. Markmið keppninnar er að efla amatörradíó íSkandinavíu eða réttara á Norðurlöndunum og hvetja til samskipta milli radíóamatöra í Skandinavíu og  radíóamatöra utan Skandinavíu. Scandinavíustöðvar reyna að ná sambandi við eins margar  stöðvar utan Skandinavíu og unnt er og öfugt. Stöð félagsins verður virkjuð og hér með er auglýst eftir leyfishöfum til að vera á stöðinni einhvern hluta keppnistímans. Keppnin stendur í sólarhring frá hádegi á laugardegi til hádegis á sunnudegi og þeim sem áhuga hafa á að vera með er bent á að hafa samband við formann félagsins, TF3SG.

Rétt uppúr átta í gærkvöldi mátti heyra TF3IRA í morsesambandi við TF3DX/M. Á lyklinum í Skeljanesi var Paul, W0AIH. Að loknu sambandinu sagði Paul kankvís ” I am not a keysqueezer” sem allir morsarar vita hvað þýðir. Eftirá sagði Villi, TF3DX að þetta hefði verið alger tilviljun að á leiðinni í Skeljanes var hann með tækið stillt á sömu tíðni og TF3IRA þegar Paul sendi út CQ á lágu afli rétt til að prófa lykilinn. Paul og Mary kona hans voru í stuttu stoppi á Íslandi á leið sinni til Evrópu að áeggjan TF3Y, TF3SA og fleiri amatöra sem haft hafa samband við hann gegnum árin. Paul er mikill keppnismaður og hefur á nokkrum áratugum byggt upp með hjálp fjöldra góðra vina mikla keppnisstöð í Wisconsin, USA. Hann var með mjög skemmtilega kynningu vestur í ÍRA í gærkvöldi þar sem hann rakti sögu sína og stöðvarinnar, W0AIH, og kom oftlega inná mikilvægi mannlega þáttarins og tilfinninga í öllu starfi. Paul er lútherskur prestur.

1992 skrifaði Mary í CQ

‘Twas the night of “the Contest” and all through the house…
All the Creatures were stirring, including the mouse…

TF3VS varð á orði eftir kynninguna “það er merkilegt og gaman að sjá hvað er hægt að gera af eljusemi, útsjónarsemi og með góðri hjálp vina án þess að vera milljónamæringur”.