,

Afmælisdagur ÍRA 14. ágúst

Félagið Íslenskir Radíóamatörar ÍRA var stofnað 14. ágúst 1946. Af því tilefni óskar formaður öllum félögum til hamingju með daginn.

73

Guðmundur de TF3SG

/by
,

Loftur E Jónasson, TF3LJ í heimsókn

Loftur E. Jónasson, TF3LJ

Góður gestur í heimsókn, Loftur E. Jónasson, TF3LJ kom fyrir nokkru í heimsókn í félagsaðstöðu ÍRA.  Við það tilefni tók Sigurbjörn, TF3SB myndina.

/by
,

Mirek, VK6DXI myndakvöld kl. 20.00 fimmtudag 8. ágúst

Mirek, VK6DXI hefur boðað að hann komi á morgun fimmtudag 8. ágúst  í félagsheimilið með aðra mynd til sýningar.  Að þessu sinni verður fjallað um ZL8R Kermadec Island DXpedition.  Kermadec er ca. 600 mílur austur af Nýja Sjálandi og ca 6.000 mílur frá vesturströnd Bandaríkjanna.  MIrek heldur af landi brott 15. ágúst.

73

Guðmundur de TF3SG

/by
,

Vitahelgin framundan, 17 og 18 ágúst

Sælir félagar,

16th ANNUAL INTERNATIONAL LIGHTHOUSE LIGHTSHIP WEEKEND.

Minni á vitahelgina sem verður 17 og 18 ágúst n.k.  Þegar þetta er skrifað eru þegar 457 sem skráð hafa þáttöku víðsvegar um heim.  Búið er að segja frá þáttöku TF8IRA  í Garðskagavita og TF1IRA í Knarrarósvita ásamt fleiri kallmerkjum, frá Ísland.

73

Guðmundur de TF3SG

/by
,

Flóamarkaður 11 ágúst 2013

Flóamarkaður verður haldinn í félagsaðstöðunni við Skeljanes næstkomandi sunnudag, 11. Ágúst. Húsið veður opnað kl. 11:00 og verður opið til kl. 16:00. Í ráði er að halda uppboð á völdum hlutum sem hefst nákvæmlega kl. 14:30.

Hluti sem bjóða á upp verður að koma með kl 11 sama dag, einnig er öllum frjálst að koma með hluti til að selja “prívat”.  Það er yfirleitt líf og fjör og margt að skoða. Þess má geta að mikið dót hefur bæst við staflann hjá félaginu, mikið af íhlutum og öðru áhugaverðu. Auðvitað verður kaffi og með því á boðstólum.

/by
, ,

TF – útileikarnir eru um helgina

TF útileikarnir eru haldnir um verslunarmannahelgina ár hvert á vegum ÍRA. Leikarnir voru haldnir fyrst árið 1979. Tilgangur útileikanna er að örva áhuga og hæfni íslenskra radíóamatöra í notkun færanlegra stöðva og eflingu fjarskipta innanlands. Fjörið eykst þegar íslendingar búsettir eða staddir erlendis taka þátt. Leikarnir eru tilvaldir til að sameina útivist og amatörradíó.

Samband má hafa hvenær sem er um verslunarmannahelgina en heildar þáttökutími hverrar stöðvar má ekki vera meiri en 9 klukkustundir.

Aðalþáttökutímabilin eru: laugardag kl 1700-1900, sunnudag kl 0900-1200, sunnudag kl 2100-2400 og mánudag kl 0800-1000

Þáttakendur verða í það minnsta að skiptast á upplýsingum um RST og QSO-númer. QSO-tími og staðsetning verða að koma fram í loggnum.

Reglur leikanna eru á heimasíðu félagsins í kaflanum “Upplýsingar”: http://www.ira.is/tf-utileikar/

Villi, TF3DX einn ötulasti þáttakandi Útileikanna gegnum árin sagði aðspurður í símtali í gærkvöldi að einfaldasta loftnetið fyrir HF-böndin til að hafa með sér í útileikana, útileguna um helgina væri 39 metra langur vír sem komið væri eins hátt upp og aðstæður leyfðu á hverjum stað ásamt loftnetsstilli, einföld L-rás dugir vel og nægilegt væri að leggja út tvo til þrjá metra sem jörð eða tengja í einn eða fleiri tjaldhælinn. Hann mælti ekki með að menn tengdu jörðina í tána á ferðafélaganum…betri helmingnum sofandi inni í tjaldi, hversu freistandi sem það væri.

Góða helgi og skemmtilega keppni.

/by
,

Myndakvöld 1. ágúst Mirek, VK6DXI

Mirek, VK6DXI hefur boðað myndakvöld á fimmtudaginn kemur.1. ágúst þar sem hann mun sýna frá ferðum sýnum og DX leiðangrum sem hann hefur farið.  Gert er ráð fyrir að sýningin hefjist strax upp úr kl. 20.00. Ljóst er að mikill fengur er að fá Mirek í heimsókn.  Hann hefur óþrjótandi áhuga á fjarskiptum og morsi.

73 Guðmundur de TF3SG

/by
,

TF3TNT og TF3ARI vinna að tilraunum með TF1RPB

TF3TNT og TF3ARI hafa unnið að ýmsum tilraunum með TF1RPB, endurvarpann í Bláfjöllum í góðviðrinu undanfarna daga. Nýr búnaður og loftnet  voru sett upp í öðru tækjahúsi á fjallinu þar sem væntanlega er minna um truflanir. Loftnetið er nokkra metra hringgeislandi fiberstöng með 8 dBi ávinningi í allar áttir.  Prófaðar verða ýmsar gerðir af lyklun og halinn er hafður nokkuð langur til að auðveldara sé að prófa drægni endurvarpans. Myndin sýnir tækjahúsið og loftnetið á toppi 20 metra masturs. Frekari uppýsingar og fréttir verða birtar hér af þessum tilraunum og árangri á næstu vikum. Fyrstu fréttir af drægni lofa góðu og náðist endurvarpinn til dæmis við Landmannahelli í dag, þar var á ferðinni TF3WJ á sínum velbúna fjallabíl.

Frumgerð myndarinnar er á fésbókarsíðu TF3ARI, þar eru fleiri myndir tengdar þessum tilraunum.

/by
,

Pétur fékk nýtt loftnet í gær, 23. júlí 2013.

Nýtt tveggja dípóla loftnet, lóðrétt pólað var sett upp á Skálafelli í gær.

Á eftir myndinni eru upplýsingar um útgeislun frá svipuðu loftneti og eins sést þá er ávinningurinn af tveimur dípólum mest rúm 4 db fram yfir einn dípól. Loftnetið var sett upp með mesta ávinning í norður, norðvestur eða í átt að Borgarfirði og Snæfellsnesi. Önnur loftnet, möstur og burðarrör nýja loftnetsins á Skálafelli skékkja myndina eflaust eitthvað. Til dæmis er Bifröst á bak við stóra sjónvarpsmastrið á Skálafellinu frá lofnetinu séð. Óvíst er hver áhrifin eru á merkisstyrk Péturs í Borgarfirðinum en til stendur að kanna það.

TF3ARI tók myndina

TF3ARI tók myndina

/by
,

Flóamarkaður frestast

Fyrirhuguðum flóamarkaði 2. júní er frestað fram á sumar. Von er á tækjum og búnaði sem settur verður á flóamarkað félagsins. Nánar verður sagt frá þessum viðburði seinna í sumar. 73 Guðmundur de TF3SG

/by
,

Stjórnarskiptafundur

Stjórnarskiptafundur var í kvöld 23. maí 2013. Ný stjórn ÍRA skipa: Formaður, Guðmundur Sveinsson, TF3SG, varaformaður, Andrés þórarinsson, TF3AM, ritari, Sigurbjörn Þór Bjarnason, TF3SB, gjaldkeri Benedikt Sveinsson, TF3CY, meðstjórnandi, Henry Hálfdánarson, TF3HRY, varamenn Georg Magnússon, TF2LL og Sigurður Óskar Óskarsson, TF2WIN. Tengiliður stjórnar við Póst og fjarskiptastofnun er Henry Hálfdánarson.
Stjórn ÍRA færir fráfarandi stjórn bestu þakkir fyrir allt það frábært starf í þágu félagsins og radíóamatöra.

/by
,

Fréttir frá aðalfundi Í.R.A. 2013

Kristinn Andersen TF3KX var fundarstjóri á aðalfundi Í.R.A. 2013 á Radisson Blu Hótel Sögu í Reykjavík.

Aðalfundur Í.R.A. 2013 var haldinn þann 18. maí í Snæfelli, fundarsal Radisson Blu Hótel Sögu í Reykjavík. Á fundinum fóru fram venjuleg aðalfundarstörf; kosin ný stjórn, samþykktar lagabreytingar ásamt umræðum undir liðnum önnur mál. Embættismenn fundarins voru kjörnir þeir Kristinn Andersen, TF3KX fundarstjóri og Kjartan H. Bjarnason, TF3BJ, fundarritari. Alls sóttu 19 félagsmenn fundinn úr kallsvæðum TF1, TF2, TF3 og TF8 samkvæmt skráningu í viðverubók. Fundurinn var settur kl. 13:10 og slitið kl. 16:20.

Eftirtaldir skipa nýja stjórn félagsins fyrir starfstímabilið 2013-2014: Guðmundur Sveinsson, TF3SG, formaður; Henry Arnar Hálfdánarson, TF3HRY og Benedikt Sveinsson, TF3CY (kjörnir til tveggja ára), Sigurbjörn Þór Bjarnason, TF3SB (kjörinn stjórnarmaður til eins árs í stað Sæmundar E. Þorsteinssonar, TF3UA sem óskaði lausnar sitt síðara ár af kjörtímabilinu) og Andrés Þórarinsson, TF3AM, sem nú situr sitt síðara ár.

Varamenn voru kjörnir þeir Sigurður Óskar Óskarsson, TF2WIN og Georg Magnússon, TF2LL. Skoðunarmenn reikninga voru endurkjörnir þeir Óskar Sverrisson, TF3DC og Haukur Konráðsson, TF3HK; og til vara, Vilhjálmur Ívar Sigurjónsson, TF3VS. Félagsgjald var samþykkt 6500 krónur fyrir starfsárið 2013-2014. Stjórnin mun skipta með sér verkum fljótlega.

Fráfarandi formaður, Jónas Bjarnason, TF3JB, lýsti kjöri heiðursfélaga sem samþykkt var á síðasta fundi fráfarandi stjórnar, þann 12. maí s.l. Nýir heiðursfélagar eru þeir Kristján Benediktsson, TF3KB og Vilhjálmur Þór Kjartansson, TF3DX.Fundarmenn klöppuðu þeim til heiðurs.

Skýrsla stjórnar og reikningur félagssjóðs munu fljótlega verða til birtingar hér á heimasíðunni ásamt fundargerð og upplýsingum um lagabreytingar og aðrar samþykktir.

/by