Almennt

Guðmundur Löve, TF3GL.

Guðmundur Löve, TF3GL, flytur næsta fimmtudagserindi á vetrardagskrá Í.R.A. þann 26. janúar n.k. kl. 20:30. Umræðuefnið er: VHF leikar 2012; möguleikar á VHF/UHF samböndum; og sögur og staðreyndir um útbreiðslu merkja í þessum tíðnisviðum.

Í grein sem Guðmundur ritar í janúarhefti CQ TF 2012 segir hann meðal annars: TF VHF-leikarnir eru hugarfóstur áhugamanna um langdræg VHF-fjarskipti, en draga dám af sambærilegum leikum sem mikilla vinsælda njóta í Bretlandi, Bandaríkjunum og víðar. VHF-leikarnir eru leikar – en ekki keppni, þótt stigafjöldi geti vissulega verið mælikvarði á ástundun, búnað, útsjónarsemi og heppni!

Í greininni eru settar fram áhugaverðar tillögur að leikreglum og keppnistilhögun. Guðmundur segir ennfremur, að tilgangur leikanna sé að örva áhuga og hæfni íslenskra radíóamatöra hvað varðar notkun VHF- og UHF-tíðnisviðanna og eflingu slíkra fjarskipta innanlands. Jafnframt er hugmyndin
að leikarnir geti verið mönnum til nokkurrar ánægju við sameiningu útivistar, ferðalaga og amatör
radíós.

Stjórn Í.R.A. hvetur félagsmenn til að mæta tímanlega. Kaffiveitingar verða í boði félagsins.

Andrés Þórarinsson TF3AM flutti áhugavert erindi í Skeljanesi um heimasmíði tvípóla þann 12. janúar.

Fimmtudagserindið þann 12. janúar var í höndum Andrésar Þórarinssonar, TF3AM, og nefndist það Heimasmíði
tvípóla fyrir HF í bílskúrnum (láréttra og lóðréttra). Erindi Andrésar var fróðlegt. Hann útskýrði m.a. þær forsendur sem hann
gefur sér við smíðar á tvípólum úr álrörum fyrir 10, 15 og 20 metra böndin – og ennfremur, hvað varðar uppsetningu miðað
við lágmarks hæð yfir jörð.

Hann útskýrði verkefnið á hinum ýmsu stigum smíðanna og fjallaði ennfremur um prófanir á að skipta á milli tvípóla þegar
þeir eru settir upp lárétt og lagðir í kross. Hann útskýrði vel fræðilegar forsendur fyrir smíðinni, svo og þá hugsun að nota
sem mest handbært efni (og kaupa sem minnst) til að verkefnið yrði sem ódýrast í reynd.

Andrés sýndi Power Point glærur frá tilraunum sínum, m.a. af uppsetningu lóðréttra tvípóla við heimili sitt í Mosfellsbæ sem
eru fæddir með samsíða fæðilínu og af uppsetningu á krosstvípólum við sumarhús í TF1-kallsvæði í Grímsnesi. Þar hefur
hann um eins og hálfs árs reynslu af þremur settum af láréttum „krosstvípólum” fyrir 10, 15 og 20 metra böndin, sem hann
hefur m.a. notað í alþjóðlegum keppnum við góðan árangur. Hann sagði loftnetin í reynd hafa komið vel út, þótt hann hafi
gjarnan viljað sjá meiri mun (ávinning) við að skipta á milli þeirra á tilteknu bandi.

Í lokin var m.a. rætt um fræðilegan mun á tvípólum, 1/4-bylgju stangarloftnetum og fleiri loftnetaútfærslum. Erindið var vel sótt
og komu yfir 30 félagsmenn í félagsaðstöðuna í Skeljanesi þetta ágæta fimmtudagskvöld. Andrés svaraði greiðlega fjölda
spurninga í lok erindisins.

Stjórn Í.R.A. þakkar Andrési Þórarinssyni, TF3AM, fyrir vel heppnað og áhugavert erindi og Jóni Svavarssyni, TF3LMN, fyrir
myndatökuna.

TF3AM

Andrés sýnir heimasmíðaða festingu (á hjörum) fyrir stöngina sem heldur uppi tvípólunum á myndinni til vinstri.

Andrés Þórarinsson, TF3AM.

Næsta erindi á vetrardagskrá félagsins verður haldið í félagsaðstöðu Í.R.A. fimmtudaginn 12. janúar. Þá kemur Andrés Þórarinsson, TF3AM, í Skeljanesið og nefnist erindi hans: Heimasmíði tvípóla fyrir HF í bílskúrnum (láréttra og lóðréttra). Erindið hefst stundvíslega kl. 20:30.

Andrés mun m.a. fjalla um smíði tvípóla fyrir 10m, 15m og 20m böndin úr álrörum sem keypt eru hjá efnissölum hér heima, uppsetningu 12 metra hárrar stangar með slíkum loftnetum og fjarstýringu þeirra. Fjöldi ljósmynda. Einnig
fjallar hann um smíði á lóðréttum tvípól með 600 Ohma fæðilínu og “tjúningu” inni í “sjak”.

Rætt verður um fræðin að baki stærðar og hæðar tvípóla, og reynsluna af þessum netum. Loks mun Andrés fjalla um smíði á 12 metra langri ferðastöng sem gerð er úr álrörum, og um hæla og frágang allan.

Stjórn Í.R.A. hvetur félagsmenn til að mæta tímanlega. Kaffiveitingar verða í boði félagssjóðs.

Á myndinni má m.a. sjá þrenn sett af heimasmíðuðum láréttum tvípólum hjá TF1AM.

Sigurður R. Jakobsson, TF3CW, starfrækti TF3W frá félagsstöð Í.R.A. 18.-19. september. Ljósmynd: TF3LMN.

Úrslitin í CQ WW WPX SSB keppninni 2011 hafa verið kunngerð. Samkvæmt upplýsingum frá keppnisnefnd CQ tímaritsins varð Sigurður R. Jakobsson, TF3CW, í 2. sæti yfir heiminn og í 1. sæti í Evrópu.

Heildarstig voru 7.473.415. Hann keppti í einmenningsflokki á 20 metrum, hámarksafli. Sigurður varð vel fyrir ofan árangur þeirra stöðva sem næstar komu, t.d. OH4A sem var með 6.886.168 heildarstig og S55T sem var með 6.763.484 heildarstig.

Stjórn Í.R.A. óskar Sigurði til hamingju með glæsilegan árangur.

Georg Magnússon TF2LL við nýuppsteypta undirstöðuna fyrir 28 metra háan loftnetaturn hans. Myndin var tekin 12. júlí 2010 áður en steypumótin voru fjarlægð. Ljósmynd: Jónas Bjarnason TF2JB.

Þá er komið að fyrsta fimmtudagserindinu á síðari hluta vetrardagskrár félagsins á yfirstandandi starfsári.
Erindið verður haldið í félagsaðstöðunni í Skeljanesi fimmtudaginn 5. janúar n.k. og hefst stundvíslega
klukkan 20:30.

Fyrirlesari kvöldsins er Georg Magnússon, TF2LL og nefnist erindið Loftnetsframkvæmdir hjá TF2LL í Norðtungu
í Borgarfirði sumarið 2010. Georg mun fara yfir loftnetaval og turnframkvæmdina sjálfa í máli og myndum.

Stjórn Í.R.A. hvetur félagsmenn til að mæta tímanlega. Kaffiveitingar eru í boði félagsins.

Stjórn Í.R.A. óskar félagsmönnum og fjölskyldum þeirra farsældar á nýju ári.