Almennt

Til fróðleiks voru teknar saman upplýsingar um TF kallmerki sem fengu skráningu á þyrpingu (e. cluster) vikuna 3.-9. janúar 2021. Kallmerki birtast þar hafi leyfishafi haft samband og/eða heyrt í viðkomandi TF kallmerki og skráð það, auk þess sem hlustarar setja inn skráningar.

Þessa viku voru skilyrði ekkert sérstök á HF þannig að yfirleitt er meiri virkni hér á landi sem annars staðar ef böndin eru „lifandi“. Upplýsingarnar eru fengnar á vefsíðunni: http://www.dxsummit.fi/#/  Taka ber fram, að fleiri sambærilegar síður eru í boði á netinu og sem skoða má til samanburðar.

Samkvæmt ofangreindu voru 14 TF kallmerki skráð þessa viku. Flestar stöðvarnar voru virkar á stafrænum mótunum og RTTY, en einnig á morsi (CW) og tali (SSB). Stöðvarnar voru virkar á 15, 17, 20, 40, 60 og 80 metrum.

Fyrst er skráð kallmerki, þá tegund útgeislunar og band/bönd sem kallmerki fær skráningu á:

TF1A – SSB – 80 metrar
TF1AM – RTTY – 15 og 20 metrar
TF1EIN – FT8 – 80 metrar
TF1OL – FT8 – 60 metrar
TF2CT – FT4 – 40 og 80 metrar
TF2MSN – RTTY/FT8 – 17, 30 og 60 metrar
TF3AO – RTTY – 15 og 20 metrar
TF3IG – FT4 – 20 metrar
TF3JB – FT8 – 30 metrar
TF3LB – CW/FT8 – 15, 17 og 30 metrar
TF3MH – FT8 – 30 metrar
TF3PPN – FT8 – 17 metrar
TF3VG – FT8 – 17 metrar
TF5B – FT8 – 17, 30 og 40 metrar

Til skoðunar er að taka reglulega saman upplýsingar af þessu tagi.

Stjórn ÍRA.

Kallmerkið TF3YOTA var aftur virkjað í dag (29. desember) um gervihnöttinn ES‘hail-2 / Oscar 100. Elín Sigurðardóttir, TF2EQ ungmennafulltrúi ÍRA, setti stöðina í loftið frá Skeljanesi en hún var síðast QRV um gervitunglið þann 1. desember s.l. Hún hafði að þessu sinni sambönd við alls 95 stöðvar, þ.á.m. á öllum Norðurlöndunum, annars staðar í Evrópu, Afríku, Austurlöndum nær (fyrir botni Miðjarðarhafs), Asíu og í Suður-Ameríku.

Svo skemmtilega vildi til, að eitt af fyrstu samböndunum var við Ninu Riehtmüller, DL3GRC. En Nina heimsótti félagsaðstöðuna í Skeljanesi 5. september í fyrra (2019) og varð fyrsta konan til að virkja TF3IRA í gegnum Oscar 100. Það urðu því fagnaðarfundir þegar þær Elín náðu saman í gegnum gervitunglið. Nina bað Elínu fyrir bestu kveðjur til félagsmanna ÍRA og sagðist hlakka til að koma aftur í heimsókn til Íslands sumarið 2021.

Ari Þórólfur Jóhannesson, TF1A, VHF stjóri félagsins aðstoðaði Elínu og birti „vefstreymi“ á FB þar sem hægt var að fylgjast með samskiptunum frá TF3YOTA í gegnum gervitunglið í rauntíma.

Elín Sigurðardóttir, TF2EQ er ungmennafulltrúi félagsins og YOTA verkefnisstjóri ásamt Árna Frey Rúnarssyni, TF8RN. Frekari virkni er áformuð frá TF3YOTA fyrir áramót.

Stjórn ÍRA.

Áramótasending korta frá TF ÍRA QSL Bureau (kortastofu) seinkar að þessu sinni fram í mars 2021 vegna Covid-19 faraldursins. Þá verða öll kort sem borist hafa til stofunnar (þ.á.m. til smærri staða) póstlögð til kortastofa systurfélaganna um allan heim.

Síðasti skiladagur vegna áramótaútsendingar 2020/21 verður fimmtudagur 25. febrúar 2021. Þau kort sem berast í QSL kassann í Skeljanesi það kvöld verða örugg með að komast í flokkun og til útsendingar. Gjaldskrá er óbreytt, 10 krónur á kort, sama verð hvert sem er í heiminum.

Fyrirvari er gerður ef aðgerðir stjórnvalda vegna Covid-19 hamla því að þessi áætlun gangi eftir.

Hátíðarkveðjur og 73,

Mathías Hagvaag, TF3MH,
QSL stjóri ÍRA.

Stjórn ÍRA óskar félagsmönnum og fjölskyldum þeirra gleðilegrar jólahátíðar og farsældar á nýju ári 2021.

Félagsaðstaðan í Skeljanesi verður næst opin fimmtudaginn 14. janúar n.k. ef aðstæður leyfa.

Stjórn ÍRA.