Næsti viðburður á dagskrá ÍRA er jólakaffi félagsins, viðhafnarkaffi sem haldið verður í félagsaðstöðunni í Skeljanesi, fimmtudaginn 14. desember kl. 20:30.
Húsið verður opnað kl. 20:00 að venju.
Þetta verður jafnframt síðasta opnun félagsaðstöðunnar á þessu ári en hún verður næst opin fimmtudaginn 11. janúar 2024.
Verið velkomin í Skeljanes!
Stjórn ÍRA.
.Mynd af kaffiborðinu í fyrra (2022). Ljósmynd: Hans Konrad Kristjánsson TF3FG.
Kristján Benediktsson, TF3KB mætti í Skeljanes sunnudaginn 10. desember með umræðuþemað: „Ráðstefna IARU Svæðis-1 1.-4. nóvember 2023“. Kristján er IARU/NRAU tengiliður ÍRA og var fullrúi félagsins á ráðstefnunni sem haldin var í Zlatibor í Serbíu og tók þátt yfir netið.
Fram kom m.a. að yfir 120 fulltrúar landsfélaga Svæðis 1 sótti ráðstefnuna sem starfaði í fimm vinnunefndum að viðbættum allsherjarfundum (e. plenum). M.a. voru samþykkt útgjöld til stuðnings við framtíðarmótun og nýsköpun. Einnig YL og ungmennastarfsemi, auk IARU verkefna í Friedrichshafen. Teknar voru fyrir á annað hundrað greinargerðir, tillögur og erindi landsfélaga. Fastir vinnuhópar skiluðu skýrslum. Sjá nánar vefslóðina: https://conf.iaru-r1.org/documents/
Samþykkt WRC-23 um 23cm bandið frá 8. desember.
Í lok umræðna kynnti Kristján glænýja samþykkt WRC-23 alheimsráðstefna Alþjóða fjarskiptasambandsins ITU (International Telecommunications Union) sem starfar um þessar mundir í Dubai í Sameinuðu arabísku furstadæmunum. Samþykktin varðar 23cm bandið (1240-1300 MHz) þar sem radíóamatörar hafa víkjandi aðgang í forgangsflokki 2.
Vegna vaxandi notkunar staðsetningartungla og fjölgunar staðsetningarkerfa á þessu tíðnisviði samþykkti síðasta ráðstefna (WRC-19) að gera úttekt á hugsanlegum truflunum, sem radíóamatörar gætu mögulega valdið. Mikil og vönduð vinna hefur verið lögð sl. 4 ár í úttektir á þessu og skrifaðar um það vandaðar skýrslur. Sjá nánar vefslóðina: https://www.iaru-r1.org/2023/23cm-band-outcome-approved-at-the-7th-plenary-meeting-of-wrc-23/
Á WRC-23 ráðstefnu ITU var síðan lögð fram lokaskýrsla (ITU-R M.2164) um útfærslu sem allir notendur ættu að geta við unað. WRC-23 samþykkti að gera þá útfærslu ekki að skyldu, heldur vísa einungis til hennar í neðanmálsgrein. IARU hefur lýst yfir mikilli ánægju með þessi málalok.
Sérstakar þakkir til Kristjáns Benediktssonar, TF3KB fyrir afar afar fróðlegan og vel heppnaðan sófasunnudag í Skeljanesi. Alls mættu 6 félagsmenn og 1 gestur í Skeljanes þennan ágæta sunnudagsmorgun í vesturbænum í Reykjavík.
Stjórn ÍRA.
Myndin er af öflugu teymi radíóamatöra sem hefur gætt hagsmuna okkar í hvívetna á ITU ráðstefnunni WRC-23 í Dubai sem hófst 20. nóvember og lýkur 15. desember n.k. Frá vinstri: ‘Jon,’ Jonathan V. Siverling WB3ERA, Paul Vincent Coverdale VE3ICV, Barry Lewis G4SJH, Flavio A. B. Archangelo PY2ZX, Bernd Mischlewski DF2ZC, Tim St. John Ellam VE6SH, Murray Niman G6JYB, Ole Garpestad LA2RR, Joel M. Harrison Sr. W5ZN, Yudi YB1PRY, Peter VK2EMR, Dale E. Hughes VK1DSH, og Roland Turner 9V1RT. Á myndina vantar ‘Ken,’ Katsumi Yamamoto JA1CJP. Ljósmynd: IARU.
Næsti viðburður í Skeljanesi er í boði á sunnudag 10. desember kl. 11:00. Þá mætir Kristján Benediktsson, TF3KB IARU/NRAU tengiliður ÍRA með umræðuþemað: „Ráðstefna IARU Svæðis-1 1.-4. nóvember 2023“. Kristján var fullrúi félagsins á ráðstefnunni sem haldin var í Serbíu í síðasta mánuði og tók þátt yfir netið.
Húsið opnar kl. 10:30 en viðburðurinn hefst kl. 11 stundvíslega og miðað er við að umræðum ljúki um kl. 12 á hádegi. Að venju verða vínarbrauð í boði með kaffinu frá Björnsbakaríi og rúnstykki með skinku og osti.
Sunnudagsopnanir (stundum nefndar „sófasunnudagar“) hafa verið skýrðar á þann veg að um sé að ræða fyrirkomulag menntandi umræðu á messutíma sem er hugsuð sem afslöppuð, þ.e. þar sem menn sitja með kaffibolla í stóra leðursófasettinu og ræða amatör radíó og tiltekinn leyfishafi sem hefur staðgóða þekkingu á viðkomandi umræðuefni leiðir umfjöllun og svarar spurningum.
http://ira.is/wp-content/uploads/2016/11/website_head_ira_logo_arial.png00TF3JBhttp://ira.is/wp-content/uploads/2016/11/website_head_ira_logo_arial.pngTF3JB2023-12-09 11:16:482023-12-09 11:25:58TF3KB Í SKELJANESI Á SUNNUDAG
Andrés Þórarinsson TF1AM byrjaði erindið stundvíslega kl. 20:30.
Andrés Þórarinsson, TF1AM mætti í Skeljanes 7. desember með erindið „Útbreiðsla á metrabylgju innanlands“. Erindið var undir miklum áhrifum af árangri ýmissa radíóamatöra í innanlandsleikjum ÍRA, þ.e. Páskaleikunum og VHF/UHF leikunum. Spurningin var þessi: Hvernig fóru menn að því að ná svo löngum samböndum?
Nefnd voru m.a. fræg sambönd eins og á 23cm milli TF3ML á Öndverðarnesi og TF1JI sem var á Hengilssvæðinu, 154km, og á 2m/70cm milli TF2MSN á Akranesi og TF3ML á Stórhöfða, 133km, á 70cm milli TF4AH á Látrabjargi og TF1A í Reykjavík, 208km, og á 2m milli TF1AM í Flókalundi og TF8KY á Reykjavíkursvæðinu,175km.
sem er hentug til að sjá „Maidenhead Locator“ fyrir Ísland og skýrir hvar þurfi að vera til að ná eftirsóknarverðum samböndum. Þá var kynnt vefsíðan https://www.solwise.co.uk/wireless-elevationtool.html sem gerir kleift að sjá þverskurð lands milli hvaða 2ja punkta sem er, einungis þarf að færa endapunktana til að korti. Aðalatriðið var það að löng sambönd nást gjarnan þegar merkið brotnar á einum háum tindi á milli, eins og t.d. um fjöllin á Snæfellsnesi.
Þekkt sambönd voru prófuð með þessum hætti, svo og sambönd sem vitað var að ekki voru góð. Þetta var talsvert rætt. Önnur atriði komu fram sem hafa árangur á langdrægi, eins og loftnet, mótun (SSB), að coax-kaplar hafi lítil töp, að coax-tengi séu vönduð, og pólun (lóðrétt/lárétt).
Í lokin var rætt lauslega um fjarskipti innanlands á stuttbylgjum. Talsverðar umræður urðu sem voru hinar fróðlegustu. Svo var kaffi og mikið rætt.
Sérstakar þakkir til Andrésar Þórarinssonar, TF1AM fyrir vandaða og skemmtilega framsetningu á þessu áhugaverða efni. Ennfremur þakkir til Andrésar og Georgs Kulp, TF3GZ fyrir ljósmyndir. Alls mættu 24 félagsmenn og 1 gestur þetta ágæta fimmtudagskvöld í vesturbænum í Reykjavík.
Stjórn ÍRA.
Frá vinstri: Einar Kjartansson TF3EK, Wilhelm Sigurðsson TF3AWS, Þorvaldur Bjarnason TF3TB, Sveinn Goði Sveinsson TF3TB, Hrafnkell Sigurðsson TF8KY, Eiður Kristinn Magnússon TF1EM, Þórarinn Benedikz TF3TZ, Heimir Konráðsson TF1EIN, Óðinn Þór Hallgrímsson TF2MSN, Gísli Guðnason TF6MK og Sigmundur Karlsson TF3VE.Björgvin Víglundsson TF3BOI, Þórarinn Benedikz TF3TZ og Andrés Þórarinsson TF1AM.Einar Kjartansson TF3EK, Hrafnkell Sigurðsson TF8KY og Georg Kulp TF3GZ.Vilhjálmur Í. Sigurjónsson TF3VS og Ari Þórólfur Jóhannesson TF1A.Gísli Guðnason TF6MK, Sigmundur Karlsson TF3VE og Óðinn Þór Hallgrímsson TF2MSN.Hans Konrad Kristjánsson TF3FG og Hrafnkell Sigurðsson TF8KY.Heimir Konráðsson TF1EIN, Sveinn Goði Sveinsson TF3ID, Mathías Hagvaag TF3MH, Þorvaldur Bjarnason TF3TB og Eiður Kristinn Magnússon TF1EM.Þorvaldur Bjarnason TF3TB og Kristján Benediktsson TF3KB. Ljósmyndir: TF1AM og TF3GZ.
ÍRA barst jákvætt svar frá Fjarskiptastofu (FST) þann 7. desember við ósk félagsins um endurnýjun heimildar til notkunar tíðnisviðsins 1850-1900 kHz vegna þátttöku í alþjóðlegum keppnum á almanaksárinu 2024. Heimildin nær til eftirtalinna keppna:
CQ 160 metra keppnin á CW – 26.-28. janúar 2024. ARRL International DX keppnin á CW – 17.-18. febrúar 2024. CQ 160 metra keppnin á SSB – 23.-25. febrúar 2024. ARRL International DX keppnin á SSB – 2.-3. mars 2024. CQ WW WPX keppnin á SSB – 30.-31. mars – 2024. CQ WW WPX keppnin á CW – 25.-26. maí 2024. IARU HF World Champinship keppnin á CW/SSB 13.-14. júlí 2024. CQ WW DX keppnin á SSB 26.-27. október 2024. CQ WW DX keppnin á CW 23.-24. nóvember 2024. ARRL 160 metra DX keppnin 7.-8. desember 2024.
G-leyfishafar hafa heimild til að nota fullt afl, allt að 1kW. N-leyfishafar njóta sömu tíðniréttinda, en aflheimild miðast við mest 10W.
Heimildin er veitt með fullu samþykki Vaktstöðvar siglinga sem hefur forgang til notkunar tíðna á þessu tíðnibili. Um þessa notkun gilda sömu kröfur og gilda fyrir tíðnisviðið 1810-1850 kHz í reglugerð, en aukin skilyrði Fjarskiptastofu eru eftirfarandi: Aflheimild er einvörðungu veitt þann tíma sem tilgreindar alþjóðlegar keppnir standa yfir.
Leyfishafar skulu sækja sérstaklega um heimild til PFS á hrh@fst.is eða fst@fst.is Það nægir að senda eina umsókn sem þar með gildir fyrir allar 10 keppnirnar á árinu 2024.
Stjórn ÍRA.
Ljósmynd úr fjarskiptaherbergi TF3IRA í Skeljanesi.
Uppfærð DXCC staða TF kallmerkja er miðað við 4. desember 2023. Sautján TF kallmerki eru með virka skráningu. Að þessu sinni hefur staða sex kallmerkja verið uppfærð frá fyrri lista: TF1A, TF2LL, TF3G, TF3JB, TF3Y og TF4M.
Ari Þórólfur Jóhannesson, TF1A kemur inn með fyrstu DXCC Satellite viðurkenninguna á Íslandi. Þetta er 14. DXCC viðurkenning Ara sem hafði þessar fyrir: DXCC Mixed, Phone, RTTY/Digital, 80M, 40M, 30M, 20M, 17M, 15M, 12M, 10M, DXCC Challenge og 5BDXCC. Hamingjuóskir til Ara Þórólfs með þessa glæsilegu DXCC stöðu.
Þess má geta, að aðeins 10 leyfishafar á Norðurlöndunum eru handhafar DXCC Satellite viðurkenningarinnar: Í Svíþjóð (6), Finnlandi (2), Noregi (1) og nú á Íslandi (1).
Alls hafa [a.m.k.] 25 íslensk kallmerki sótt um og fengið DXCC viðurkenningar til þessa dags.
Andrés Þórarinsson, TF1AM mætir í Skeljanes fimmtudagskvöldið 7. desember með erindið: „Útbreiðsla á metrabylgju innanlands“.
Andrés ætlar m.a. að sýna sambönd sem hann hefur haft í Páskaleikunum og VHF/UHF leikunum undanfarin ár. Og ræða hvers vegna þau gangi á sumum löngum leiðum og öðrum ekki. Og loks að velta því fyrir sér hvort það eru fleiri staðir sem hugsanlega má ná samböndum frá í leikunum.
QSL stjóri verður búinn að tæma pósthólfið og raða kortum í hólfin. Kaffiveitingar.
Verið velkomin í Skeljanes!
Stjórn ÍRA.
Meðfylgjandi mynd af Andrési TF1AM var tekin 14. október sl. í ferð ÍRA til að skoða fjarskiptasafn Sigga Harðar TF3WS að Skógum undir Eyjafjöllum. Ljósm. TF3GZ.
CQ World Wide DX CW keppnin fór fram helgina 25.-26. nóvember. Keppnisgögn fyrir 9 TF kallmerki í fjórum keppnisflokkum voru send inn, þar af ein viðmiðunardagbók.
Bráðabirgðaniðurstöður (e. raw scores) liggja fyrir frá keppnisnefnd samkvæmt áætlaðri stöðu í viðkomandi keppnisflokki yfir heiminn og yfir Evrópu. Endanlegar niður stöður verða birtar í júníhefti CQ tímaritsins 2024.
EINMENNINGSFLOKKUR, ÖLL BÖND, HÁAFL. TF3SG – 2.534.250 heildarpunktar; nr. 65 yfir heiminn; nr. 22 í Evrópu. TF8SM – 42.834 heildarpunktar, nr. 417 yfir heiminn; nr. 147 í Evrópu.
EINMENNINGSFLOKKUR, ÖLL BÖND, LÁGAFL. TF/OU2I – 2.392.796 heildarpunktar; nr. 23 yfir heiminn; nr. 9 í Evrópu. TF3EO – 491.620 heildarpunktar; nr. 121 yfir heiminn; nr. 65 í Evrópu. TF3VS – 101.232 heildarpunktar; nr. 499 yfir heiminn; 272 í Evrópu. TF8KY – 9.750 heildarpunktar; nr. 1108 yfir heiminn; nr. 601 í Evrópu.
EINMENNINGSFLOKKUR, ÖLL BÖND, LÁGAFL, AÐSTOÐ TF3DC – 246.675 heildarpunktar; nr. 368 yfir heiminn; nr. 218 í Evrópu.
FJÖLMENNINGSFLOKKUR, ÖLL BÖND, LÁGAFL TF3W – 829.452 heildarpunktar; nr. 18 yfir heiminn; nr. 17 í Evrópu.
VIÐMIÐUNARDAGBÓK. TF3JB.
Hamingjuóskir til viðkomandi.
Stjórn ÍRA.
Kort EI8IC sýnir svæðaskiptingu heimsins í 40 CQ svæði.
Viðburður Jónasar Bjarnasonar, TF3JB „Kynning: POTA, SOTA, VOTA, WWFF og IMW“ sem halda átti sunnudaginn 3. desember kl. 11:00 frestast af óviðráðanlegum ástæðum.
Beðist er velvirðingar á þessari breytingu.
Næsta opnun félagsaðstöðunnar verður fimmtudag 7. desember. Þá mætir Andrés Þórarinsson, TF1AM í Skeljanes með erindið: „Útbreiðsla á metrabylgju innanlands“.
Laugardaginn 2. desember var sérstök móttaka fyrir nýja leyfishafa sem sem tóku þátt í námskeiði ÍRA til amatörprófs haustið 2023 og náðu prófi Fjarskiptastofu til amatörleyfis þann 11. nóvember s.l. Flestir hafa nú fengið úthlutað kallmerki hjá stofnuninni.
Arnar Þór Egilsson, 270 Mosfellsbæ – TF3ATE. Gísli Guðnason, 270 Mosfellsbæ – TF6MK. Greppur Torfason, 225 Álftanesi – TF7ZF. Jón Svan Grétarsson, 270 Mosfellsbæ – TF3JS. Jónas I. Ragnarsson, 200 Kópavogi – TF3JIR. Pier Kaspersma, 221 Hafnarfirði – TF3PKN. Valdimar Óskar Jónasson, 210 Garðabæ – TF1LT. Þorkell Máni Þorkelsson, 113 Reykjavík (á eftir að sækja um kallmerki). Þór Eysteinsson, 101 Reykjavík – TF3TE. Þröstur Ingi Antonsson, 251 Suðurnesjabæ – TF1TX.
Dagurinn hófst á morgunkaffi kl. 10:30 í salnum þar sem Jónas Bjarnason, TF3JB fór yfir helstu þætti í starfsemi ÍRA, m.a. aðstöðu félagsins í Skeljanesi, fræðsludagskrá, fundi og námskeið (þ.m.t. til amatörprófs), heimasíðu, FaceBook síður, félagsritið CQ TF, ársskýrslu, árlega fjarskiptaviðburði, alþjóðlegar keppnir, endurvarpa, stafvarpa, radíóvita, gervihnattafjarskipti og helstu innanlandstíðnir á HF, VHF og UHF. Undir dagskrárliðnum fór fram afhending fjarskiptadagbóka með kallmerkjum leyfishafa og afhending ítarefnis, þ.e. valdar greinar sem birst hafa í CQ TF.
Kristján Benediktsson, TF3KB tók síðan við og flutti glærukynningu um alþjóðastarf radíóamatöra, m.a. IARU, NRAU og ITU, auk þess að sýna bandskipan fyrir HF böndin á IARU Svæði 1.
Vilhjálmur Í. Sigurjónsson, TF3VS flutti næst glærukynningu um Logger32 rafræna dagbókarforritið. Undir dagskrárliðnum var dreift QSL kortum og rætt um mikilvægi þess að ganga frá skráningu á QRZ.COM.
Að því búnu fluttu menn sig upp í fjarskiptaherbergi TF3IRA á næstu hæð þar sem Óskar Sverrisson, TF3DC og Vilhjálmur Í. Sigurjónsson, TF3VS tóku við hópnum.
Þeir Óskar og Vilhjálmur fóru m.a. yfir mors (CW), tal (SSB), fjarritun (RTTY) og stafrænar tegundir útgeislunar (FT8/FT4) og sýnd fjarskipti á SSB og FT8. Fjallað var um hvernig sambönd eru höfð og um staðfestingar; þ.á.m. QSL kort og Logbook of The World (LoTW). Sérstaklega var fjallað um hefðir í fjarskiptum radíóamatöra og hvernig farið er í loftið, m.a. í DX. Ennfremur rætt um bandskipan og viðurkenningar radíóamatöra og komið inn að almenn skilyrði til fjarskipta í stuttbylgjunni frá Íslandi með tilliti til hnattstöðu landsins. Að lokum var aftur farið niður í sal og mikið rætt.
Þakkir til nýrra leyfishafa fyrir að mæta á staðinn. Ennfremur þakkir til Jónasar Bjarnasonar TF3JB, Kristjáns Benediktssonar TF3KB, Óskars Sverrissonar TF3DC, Vilhjálms Í. Sigurjónssonar TF3VS og Jóns Björnssonar TF3PW. Þegar klukkan var að verða 15:00 var húsið yfirgefið. Ánægjulegur og vel heppnaður dagur.
Nýir leyfishafar – verið velkomnir í loftið!
Stjórn ÍRA.
Frá vinstri: Jónas Bjarnason TF3JB, Þröstur Ingi Antonsson TF1TX, Valdimar Óskar Jónasson TF1LT, Vilhjálmur Í. Sigurjónsson TF3VS (standandi), Gísli Guðnason TF6MK, Óskar Sverrisson TF3DC (standandi), Jónas Ingi Ragnarsson TF3JIR, Þór Eysteinsson TF3TE, Greppur Torfason TF7ZF og Kristján Benediktsson TF3KB.Kristján Benediktsson flutti greinargott erindi um alþjóðastarf radíóamatöra.Vilhjálmur Í. Sigurjónsson TF3VS kynnti Logger32 dagbókarforritið.Óskar Sverrisson TF3DC og Jón Björnsson TF3PW.Þór Eysteinsson TF3TE og Jónas Ingi Ragnarsson TF3JIR (bak í myndavél) og Óskar Sverrisson TF3DC.Vilhjálmur Í. Sigurjónsson TF3VS sýndi mönnum einfaldan RF útsláttarmæli (e. RF sniffer) sem afhjúpar ef RF straumur berst til baka inn í fjarskiptaherbergið. Aðrir á mynd frá vinstri: Greppur Torfason TF7ZF, Valdimar Óskar Jónasson TF1LT, Gísli Guðnason TF6MK, Þór Eysteinsson TF3TE, Þröstur Ingi Antonsson TF1TX og Jónas Ingi Ragnarsson TF3JIR. Ljósmyndir: TF3DC, TF3JB og TF3PW.