,

NÝR APRS STAFVARPI Á REYNISFJALLI

APRS stafvarpinn TF1APB fór í loftið í gær, föstudaginn 21. ágúst. QTH er Hraunshóll á Reynisfjalli í Mýrdal, hæð er 340 metrar yfir sjávarmáli. Nýi stafvarpinn er viðbót við APRS-IS kerfið.

Guðmundur Sigurðsson TF3GS, Jón Þ. Jónsson TF3JA og Magnús Ragnarsson TF1MT sáu um uppsetningu. Guðmundur sagði, að nýi varpinn dekki þjóðveg 1 undir Eyjafjöllum og austur fyrir Vík. Fyrstu prófanir með 1W vita (e. tracker) austur á Hjörleifshöfða og á heimleið á Hvolsvöll lofa þannig góðu en til stendur að prófa drægnina austar.

Búnaður TF1APB er Motorola GM-300 VHF stöð, Microsat WX3in1 Mini APRS Digipeater/I-gate og Kathrein VHF húsloftnet.

Hamingjuóskir til APRS hópsins með ósk um gott gengi.

Stjórn ÍRA.

.

.

Á myndinni til vinstri má sjá mynd af loftnetinu sem APRS stafvarpinn notar. Það eru fasaðir VHF tvípólar frá Kathrein.

Yfirlitsmyndin sýnir stöðvarhúsið á Hraunshól á Reynisfjalli. Sjá má að staðsetningin er góð m.v. útsýni til nærliggjandi fjalla. Ljósmynd: Magnús Ragnarsson TF1MT.
Mynd af APRS búnaði TF1APB. Í kassanum eru m.a. Motorola GM-300 VHF stöð, Microsat WX3in1 Mini APRS Digipeater/I-gate og aflgjafi. Ljósmynd: Magnús Ragnarsson, TF1MT.
Unnið við uppsetningu nýja stafvarpans inni í stöðvarhúsinu. Jón Þ. Jónsson TF3JA og Guðmundur Sigurðsson TF3GS. Ljósmynd: Magnús Ragnarsson TF1MT.
Magnús Ragnarsson TF1MT og Guðmundur Sigurðsson TF3GS. Ljósmynd: Jón Þ. Jónsson TF3JA.
/by
,

VITAHELGIN OG FLEIRI FRÉTTIR

1. Alþjóðlega vita- og vitaskipahelgin er nú um helgina, 22.-23. ágúst. Tveir íslenskir vitar höfðu verið skráðir, en Svanur Hjálmarsson, TF3AB segir, að hópurinn hafi ákveðið að fella niður áður auglýsta þátttöku frá Knarrarósvita vegna Covid-19. Einn viti verður því starfræktur frá TF um helgina, Selvogsviti, sem Ólafur Örn Ólafsson, TF1OL virkjar.

2. Gjöf frá Raunvísindastofnun. Félaginu bárust í dag, 20. ágúst, eftirfarandi tæki frá stofnuninni:

General Electric Delco MD-129A/GR; mótari og aflgjafi.
Stewart-Warner T-282D/GR; 100W sendir.
Hewlett-Packard; Model 6068 VHF Signal generator (10-420 MHz).

TF3JB og TF3GS tóku á móti tækjunum fyrir hönd félagsins. Bestu þakkir til Raunvísindastofnunar.

3. Endurvarpamál. Áhugi er fyrir að setja upp á ný VHF endurvarpa á Garðskaga. VHF hópurinn vinnur í málinu og er Motorola endurvarpi fyrir hendi. Endurvarpinn TF8RPH (Garri) var QRV frá Garðskaga í 4 mánuði árið 2012 og hafði góða útbreiðslu.
3.a Morsauðkennið á endurvarpatíðninni 145.650 MHz, sem hefur verið bilað um tveggja mánaða skeið, verður lagfært á næstunni.

4. KiwiSDR viðtækið í Bláfjöllum sem tekið var í notkun 27. júní s.l., er bilað. Ari Þórólfur Jóhannesson, TF1A sagðist hafa reynt að endurræsa tækið (og uppfæra) sem ekki hafi gengið. Þeir Georg Kulp, TF3GZ, ætla að gera ferð á fjallið fljótlega. Vefslóðin er: http://blafjoll.utvarp.com

Selvogsviti er staðsettur þar sem rauði depillinn er á kortinu til vinstri.

Ari Þórólfur Jóhannesson TF1A við uppsetningu á Opek VHF loftneti fyrir endurvarpann TF8RPH á Garðskaga 21. apríl 2012. Eins og glögglega sést á myndinni er víðsýnt úr Garðinum. Ljósmynd: Sigurður Smári Hreinsson TF8SM.


Tækin frá Raunvísindastofnun. Guðmundur Sigurðsson TF3GS kemur einu þeirra fyrir í innganginum í Skeljanesi. Ljósmynd: Jónas Bjarnason TF3JB.
Skeljanesi 20. ágúst. Tækin komin í hús og sett til á borðin í ganginum inn í húsið. Ljósmynd: Jónas Bjarnason TF3JB.
/by
,

VINNUFRAMLAG TIL FYRIRMYNDAR

Félagsmaður okkar, Baldvin Þórarinsson, TF3-Ø33 hefur unnið mikið og gott verk við að mála og snyrta til utanhúss í Skeljanesi á þessu sumri svo að eftir hefur verið tekið.

Hann hófst handa sunnudaginn 28. júní þegar hann mundaði málningarrúlluna á trévegginn við innganginn í húsið þar sem kallmerki félagsstöðvarinnar er fest (sjá ljósmynd). Sama dag hreinsaði hann til og gerði umhverfið snyrtilegt með sláttuorfi og garðáhöldum heimanað frá sér.

Næsta verkefni var stærra, en hann sagðist vera ósáttur við hve efri hæð hússins væri „skellótt“, þ.e. málning væri flögnuð af svo víða sæi í beran múr. Viku síðar, 3. júlí var Baldvin mættur í Skeljanes til að skrapa lausa málningu af efri hæðinni til undirbúnings fyrir málningu.

Þann 23. júlí tókst að ljúka undirbúningi og grunna framhliðina. Og vegna þess að ýmist var rigningartíð eða menn uppteknir, frestaðist að ljúka við að mála 2. hæðina til dagsins í dag, 17. ágúst. Mikill munur er á framhlið hússins eins og sjá má á ljósmyndum sem voru teknar fyrir og eftir verkið.

Stjórn ÍRA þakkar Baldvin Þórarinssyni, TF3-Ø33 fyrir frábært vinnuframlag og elju við að fegra til í umhverfi félagsaðstöðunnar í Skeljanesi.

29. júní: Baldvin bendir á kallmerki félagsstöðvarinnar TF3IRA sem nýtur sín vel á nýmáluðum veggnum við innganginn í Skeljanes.
17. ágúst: Framhlið hússins í Skeljanesi eftir að lokið var við að mála efri hæðina. Sjá neðri mynd til samanburðar.
Framhlið hússins fyrir breytingu. Ljósmyndir: TF3JB.
/by
,

LOKAÐ NÆSTU TVO FIMMTUDAGA

Stjórn ÍRA ákvað í morgun, 17. ágúst, að félagsaðstaðan í Skeljanesi verði lokuð áfram, a.m.k. næstu tvo fimmtudaga, 20. og 27. ágúst. Engin starfsemi verður í húsnæðinu á okkar vegum á þessum tíma, þar til annað verður ákveðið.

Ástæðan er auglýsing heilbrigðisráðherra um takmörkun á samkomum vegna farsóttar, sem tók gildi 14. ágúst og gildir til 27. ágúst, en fjöldatakmörkun er óbreytt frá fyrri ákvörðun sem og almenn nálægðartakmörkun um að tryggja skuli að hægt sé að hafa a.m.k. 2 metra á milli einstaklinga.

Meginvandinn er að tryggja áskilda 2 metra fjarlægð milli einstaklinga, sem ekki er gerlegt í Skeljanesi. Ef allt fer vel á besta veg verður auglýst opnun á ný 3. september n.k.

Það er von okkar að þessari ákvörðun fylgi ríkur skilningur.

Stjórn ÍRA.

/by
,

TF3IRA FÆR NÝTT LOFTNET

Sunnudaginn 16. ágúst var mætt í Skeljanes eftir hádegið. Verkefni dagsins var að setja upp nýtt Diamond  X-700HN VHF/UHF loftnet fyrir TF3IRA. Veður var eins og best verður á kosið, sól og vart ský á himni og lofthiti 20°C.

Nýja loftnetið er betur staðsett en það eldra, á röri fyrir miðju húsinu á austurhlið (sbr. ljósmynd). Á móti kemur að nota þarf lengri kapal (25 metra) sem er Ultraflex-10 af vandaðri gerð með N-tengjum. Verkefnið heppnaðist með ágætum, standbylgja 1.2 á báðum böndum og Búri er nú vel læsilegur í Skeljanesi (sbr. lesningu á mæli á ljósmynd).

Eldra netið, Diamond SX-200N var upphaflega sett upp 29. september 2018. Síðan fært á öflugri festingu 15. desember sama ár og loks flutt á nýja (hærri) festingu 11. maí 2019. Líklegt er að það megi gera við það og þá er hugmyndin að það notist við APRS stöð félagsins, TF3IRA-1Ø.

Bestu þakkir til þeirra Ara Þórólfs Jóhannessonar, TF1A og Georgs Kulp, TFGZ fyrir vinnuframlag og verkefni vel úr hendi leyst.

Stjórn ÍRA.

Georg Kulp TF3GZ reisir nýja Diamond X-700HN VHF/UHF loftnetið á austurhlið hússins í Skeljanesi. Nýja netið er 7.20 metrar á hæð. Það er samsett úr fjórum “stökkuðum” 5/8 loftnetum á VHF; ávinningur er 9.3 dBi. Á UHF er það samsett úr 11 “stökkuðum” 5/8 loftnetum; ávinningur er 13 dBi. Veðurþol er 40 m/sek. óstagað. Ljósmynd: TF3JB.
Ari Þórólfur Jóhannesson TF1A setur N-tengin á Ultraflex-10 kóax kapalinn. Ljósmynd: TF3JB.
Stóra stundin! RigExpert AA-1400 loftnetsgreinirinn sýndi standbylgju 1.2 í resónans bæði á 2 metrum og 70 sentímetrum. Þá gátu menn andað léttar, farið niður á neðri hæðina og fengið sér kaffi. Ljósmynd: TF3JB.
Yaesu FT-7900E VHF/UHF stöð TF3IRA opnaði endurvarpann Búra auðveldlega á nýja loftnetinu. Styrkur merkisins frá Búra í móttöku í Skeljanesi var 5 strik. Ljósmynd: TF3JB.

/by
,

TÍÐNIISKIPAN TIL ENDURSKOÐUNAR

Alþjóðasamtök landsfélaga radíóamatöra, IARU, hafa skipað sérhæfðan vinnuhóp til endurskoðunar á tíðniplönum á HF böndunum með sérstöku tilliti til fjarskipta á stafrænum tegundum útgeislunar.

Verkefnið er að endurskoða staðsetningu fjarskipta fyrir stafrænar tegundir útgeislunar, með það í huga að auka tíðnisviðið. Ástæðan er, mikil aukning í fjarskiptum þar sem notaðir eru t.d. FT4 og FT8 samskiptahættir sem eru samskiptareglur undir MFSK mótun. Þátttakendur í þessu starfi eru sérfræðingar í tíðninefndum frá öllum IARU Svæðum I, II og III.

Tíðniplön/tíðniskipan eru einskonar „umferðarreglur“ radíóamatöra á böndunum, sem við setjum okkur sjálfir innan ríkjandi tíðniheimilda stjórnvalda.

Starfið hófst í byrjun þessa mánaðar (ágúst) og hafa þegar verið haldnir góðir fundir, m.a. með Joseph H. Taylor, K1JT sem fer fyrir WSJT hópnum sem þróaði FT8 og FT4 samskiptahættina. Fleiri fundir eru framundan en þess er vænst að tillögur hópsins liggi fyrir í vetrarbyrjun.

Stjórn ÍRA fagnar frumkvæði IARU í málinu.

https://www.iaru.org/2020/hf-digital-mode-band-plan-review/

/by
,

LOFTNETAMÁL TF3RPK Á SKÁLAFELLI

Ari Þórólfur Jóhannesson TF1A, Ólafur B. Ólafsson TF3ML; Samúel Þór Hjaltalín TF3SUT og Árni Þór Ómarsson TF3CE gerðu ferð á Skálafell síðdegis 12. ágúst. Á dagskrá var, að koma loftneti endurvarpans TF3RPK í lag fyrir veturinn.

Í ljós kom, að fæðilína loftnetsins var verr á sig komin en menn höfðu talið, þannig að bráðabirgðaloftnetið sem sett var upp í ferð þeirra TF1A og TF3GZ á fjallið þann 30. júlí s.l., verður notuð áfram uns tækifæri gefst til að endurnýja kapalinn.

Að sögn Ara, voru aðstæður á fjallinu ekki þær hagstæðustu, rigning, vindur og 3°C lofthiti. Áætlað er að ljúka verkefninu í næstu ferð, sem farin verður fljótlega.

–

Á myndinni til vinstri má sjá Samúel Þór TF3SUT yfirfara kapalinn þar sem hann liggur upp í turninn úr kapalrennunni. Ljósmynd: Árni Þór TF3CE.

.

Ari les af RigExpert AA-1400 loftnetsgreininum. Niðurstaða: Skipta út kaplinum! Ljósmynd: Árni Þór Ómarsson TF3CE.
Á Skálafelli 12. ágúst áður en haldið var niður af fjallinu. Samúel Þór Hjaltalín TF3SUT, Ólafur B. Ólafsson TF3ML og Ari Þórólfur Jóhannesson TF1A. Ljósmynd: Árni Þór Ómarsson TF3CE.
/by
,

UPPFÆRÐ DXCC STAÐA TF STÖÐVA

DXCC er þekktasta og eftirsóttasta viðurkenning á meðal radíóamatöra. Í boði er að senda umsókn til ARRL þegar náðst hafa staðfest sambönd við a.m.k. 100 DXCC einingar (lönd). Í boði eru alls 19 viðurkenningar; 12 eftir tíðnisviðum, 4 eftir tegund útgeislunar og 3 samkvæmt öðrum kröfum, auk skráningar á heiðurslista.

Yngvi Harðarson, TF3Y, er með bestan árangur TF-stöðva en hann eini íslenski leyfishafinn með skráningu á heiðurslista DXCC. Hann er með 344 lönd staðfest. Vart þarf að taka fram að þetta er glæsilegur árangur. Uppfærð staða TF-stöðva með bestan árangur í hverjum flokki var eftirfarandi þann 12. ágúst 2020:

  • DXCC Honor Roll, Mixed: TF3Y 344 lönd.
  • Mixed: TF3Y 344 lönd.
  • Phone: TF8GX 290 lönd.
  • CW: TF3Y 324 lönd.
  • RTTY/Digital: TF5B 207 lönd.
  • 10 metrar: TF3DC 216 lönd.
  • 12 metrar: TF3DC 207 lönd.
  • 15 metrar: TF8GX 215 lönd.
  • 17 metrar: TF3DC 242 lönd.
  • 20 metrar: TF5B 277 lönd.
  • 30 metrar: TF3DC 196 lönd.
  • 40 metrar: TF3SG 202 lönd.
  • 80 metrar: TF3SG 229 lönd.
  • 160 metrar: TF4M 240 lönd.
  • Challenge: TF3DC 1766 punktar.

Upplýsingar miðast við „virka skráningu“ í gagnagrunni DXCC þann 12. ágúst 2020. Virk skráning miðast við að uppfærsla gagna (frá hendi leyfishafa) hafi farið fram eftir 1. janúar 1994.

Hamingjuóskir til viðkomandi.

Stjórn ÍRA.

Mynd úr fjarskiptaherbergi TF3IRA í Skeljanesi. Félagsstöðin TF3IRA hefur alls fjögur DXCC viðurkenningarskjöl: DXCC Mixed, Phone, CW og RTTY/Digital sem er það nýjasta og bíður innrömmunar. Ljósmynd: Jónas Bjarnason TF3JB.

/by
,

VITA- OG VITASKIPAHELGIN 2020

Alþjóðlega vita- og vitaskipahelgin 2020 fer fram helgina 22.-23. ágúst n.k. Um er að ræða tveggja sólarhringa viðburð, en miðað er við að flestir sem koma til dvalar í vita, á vitaskipi eða í nágrenni vita hafi komið sér fyrir upp úr hádegi á laugardag.

Í dag, 11. ágúst, hafa tveir íslenskir vitar verið skráðir til þátttöku á heimasíðu viðburðarins:

  • Knarrarósviti, ÍS-0001: Svanur Hjálmarsson TF3AB og Ársæll Óskarsson TF3AO ásamt fleirum. Knarrarósviti er staðsettur í um 5 km fjarlægð frá Stokkseyri.
  • Selvogsviti, ÍS-0006: Ólafur Örn Ólafsson TF1OL. Selvogsviti er staðsettur austarlega á sunnanverðum Reykjanesskaga.

Að jafnaði eru yfir 500 tilgreind kallmerki starfrækt þessa helgi frá um 40 þjóðlöndum.

Stjórn ÍRA óskar viðkomandi góðs gengis.

Vefslóð:  https://www.illw.net/index.php/entrants-list-2020

Knarrarósviti stendur austan við Stokkseyri. Hann er 26,2 metrar á hæð og var hannaður af Axel Sveinssyni verkfræðingi eftir hugmyndum Guðjóns Samúelssonar húsameistara ríkisins árin 1938-1939 og var fyrsti viti hér á landi byggður úr steinsteypu.
Selvogsviti er staðsettur á sunnanverðum Reykjanesskaga. Hann var byggður árið 1919 og endurbyggður árið 1931 þegar byggður var 15,8 m hár vitaturn úr steinsteypu. Árið 1987 voru veggir ljóshúss endurnýjaðir. Vitinn var raflýstur ári síðar og settur á hann radarsvari.

/by
,

TF3W QRV Í WAE DX KEPPNINNI

Sigurður R. Jakobsson, TF3CW virkjaði félagsstöðina TF3W frá Skeljanesi í Worked All Europe (WAE) DX keppninni 8. ágúst.

Þetta var morshluti keppninnar, en SSB hlutinn verður haldinn 12.-13. september n.k. og RTTY hlutinn 14.-15. nóvember n.k. Landsfélag þýskra radíóamatöra stendur fyrir keppninni.

Siggi var ánægður með árangurinn miðað við aðstæður. Skilyrðin lágu aðallega til Evrópu, en voru sæmileg vestur um haf og niður til Suður-Ameríku, en ekkert sérstök til Asíu og Kyrrahafsins. Í þessari keppni eru ekki leyfið sambönd milli stöðva innan Evrópu, heldur einvörðungu utan, þar sem evrópskir radíóamatörar keppa innbyrðis um að ná sem flestum samböndum við aðra annarsstaðar í heiminum.

A.m.k. fjórar aðrar TF stöðvar heyrðust taka þátt í keppninni.

Sigurður R. Jakobsson TF3CW var einbeittur á svip þegar hann virkjaði félagsstöðina TF3W á morsi í WAE DX keppninni laugardaginn 8. ágúst. Ljósmynd: TF3JB.

/by