Archive for category: Fréttir

Opið var í félagsaðstöðu ÍRA í Skeljanesi í dag, laugardag 7. október.

Benedikt Sveinsson, TF3T og Guðmundur Sveinsson, TF3SG mættu í Skeljanes kl. 14:00 og sýndu félagsmönnum  Elecraft K4D sendi-/móttökustöð sína. Stöðin var keypt til landsins skömmu fyrir CQ WW morskeppnina í fyrra (2022) og er því innan við ársgömul.

K4D stöðin var sett upp á stóra borðinu í fundarsalnum með stórum Dell borðskjá (snertiskjá) og tengd við OptiBeam OB4-20OWA Yagi loftnet TF3IRA. Benedikt kveikti síðan á tækinu og fjallaði um og sýndi viðstöddum hvernig nota má stöð í þessum gæðaflokki, sem er af svokallaðri „Direct Sampling SDR“ gerð.

K4D er búin stórum 7“ snertiskjá í lit. Allar stillingar eru einfaldar og þótt margir takkar hafi fleiri en eitt hlutverk er staðsetning þeirra hugsuð með tilliti til notkunartíðni sem er til þæginda, bæði dagsdaglega og sérstaklega í keppnum.

Fram kom m.a. að K4D er búin tveimur aðskildum viðtækjum og svokölluðu „Diversity Module“ sem gerir mögulegt að hlusta á tvö merki samtímis. Elecraft, FlexRadio og Apache Labs eru einu framleiðendurnir sem bjóða stöðvar með hreinan aðskilnað á milli tveggja viðtækja, sem tryggir besta mögulega hlustun á veikum DX merkjum.

Tækið er að öllu leyti afar glæsilegt og er í flokki með bestu stöðvum sem er boði eru á markaði fyrir radíóamatöra. K4D kostar um 1 milljóna króna komin til landsins í dag. Upplýsingar: https://ftp.elecraft.com/K4/K4%20Brochure.pdf

Elecraft býður þrjár gerðir af K4 sendi-/móttökustöðvum:

Gerð K4/10-F sem er 10W sendi-/móttökustöð á $4.389.95
Gerð K4-F sem er 100W sendi-/móttökustöð á $4.789.95
Gerð K4D-F sem er 100W sendi-/móttökustöð á $5.789.95

Sérstakar þakkir til Benedikts Sveinssonar, TF3T og Guðmundar Sveinssonar, TF3SG fyrir að koma með tækið í Skeljanes.

Stjórn ÍRA.

.

Fyrsta opnunarkvöld félagsins samkvæmt nýrri fræðsludagskrá var 5. október og setti Jónas Bjarnason, TF3JB formaður ÍRA viðburðinn kl. 20:30.

Andrés Þórarinsson, TF1AM varaformaður ÍRA annaðist afhendingu verðlauna í VHF/UHF leikunum 2023 í fjarveru Hrafnkels Sigurðssonar, TF8KY umsjónarmanns og Einar Kjartansson, TF3EK umsjónarmaður annaðist afhendingu verðlauna í TF útileikunum 2023.

Sérstakur gestur félagsins var Íris Lilliendahl, sem færði okkur kaffibrauð og kökur í tilefni þess að eiginmaður hennar, Carl J. Lilliendahl [og félagsmaður ÍRA] hefði orðið 77 ára þennan dag, en hann lést fyrir tæpum þremur árum. Þakkir til Írisar.

Erlendir gestir félagsins voru Greg Zier, KA9VDU og XYL Brenda sem eru búsett í Mcfarland í Wisconsin í Bandaríkjunum. Þetta var í annað skiptið sem þau mættu í Skeljanes, en í millitíðinni höfðu þau farið hringveginn og  voru yfir sig hrifin af af náttúru landsins.

Vel heppnað og skemmtilegt fimmtudagskvöld í Skeljanesi. Þakkir til Andrésar og Einars fyrir afbragðsgóð inngangserindi og hamingjuóskir til félagsmanna sem voru viðstaddir til að taka á móti verðlaunum og viðurkenningum fyrir þessa fjarskiptaviðburði félagsins.

Alls voru 33 í húsi (þar af 3 gestir) í Skeljanesi þetta ágæta haustkvöld í vesturbænum í Reykjavík.

Stjórn ÍRA.

Fyrsta opnunarkvöld félagsins samkvæmt nýrri fræðsludagskrá ÍRA að hausti hefst fimmtudaginn 5. október og verður félagsaðstaðan í Skeljanesi fyrir félagsmenn og gesti frá kl. 20:00 til kl. 22:00.

Dagskrá verður sett kl. 20:30 og verða verðlaunagripir og viðurkenningarskjöl afhent til þeirra félagsmanna sem náðu bestum árangri í VHF/UHF leikunum 2023 og TF útileikunum 2023. Þeir eru:

VHF/UHF leikar, verðlaunagripir:

1. Andrés Þórarinsson, TF1AM – 185.380 heildarstig.
2. Óðinn Þór Hallgrímsson, TF2MSN – 77.880 heildarstig.
3. Hrafnkell Sigurðsson, TF8KY –  49.856 heildarstig.

VHF/UHF leikar, viðurkenningarskjöl fyrir flest sambönd:

1. Óðinn Þór Hallgrímsson, TF2MSN – 215 QSO.
2. Sigmundur Karlsson, TF3VE, TF8KY – 181 QSO.
3. Eiður Kristinn Magnússon, TF1EM – 158 QSO.

TF útileikar, verðlaunagripur:

1. Hrafnkell Sigurðsson – 1.386 heildarstig.

TF útileikar, viðurkenningarskjöl:

1. Hrafnkell Sigurðsson, TF8KY – 1.386 heildarstig.
2. Einar Kjartansson, TF3EK – 1.030 heildarstig.
3. Óðinn Þór Hallgrímsson, TF2MSN – 987 heildarstig.
4. Pier Albert Kaspersma, TF3PKN – 968 heildarstig.
5. Eiður Kristinn Magnússon, TF1EM – 546 heildarstig.

Veglegar kaffiveitingar.

Hamingjuóskir til viðkomandi!

Stjórn ÍRA.

Félagsaðstaða ÍRA í Skeljanesi var opin fimmtudaginn 28. ágúst. Umræður voru á báðum hæðum, allir hressir og TF3IRA var í loftinu á 7 MHz á morsi og 14 MHz á SSB.

Sérstakir gestir okkar voru þau Greg Zier, KA9VDU og XYL Brenda sem eru búsett í Mcfarland í Wisconsin í Bandaríkjunum og frá Reyðarfirði, Baldur Sigurðsson, TF6-ØØ9. Greg náði m.a. samböndum við tvo radíóamatöra heima í Mcfarland á 14 MHz SSB.

Glæsileg fræðsludagskrá félagsins sem hefst í næstu viku (5. október) lá frammi á prentuðu formi fyrir viðstadda að taka með heim. Dagskráin er komin á heimasíðuna og má sækja hana með því að smella á þessa vefslóð: http://www.ira.is/wp-content/uploads/2023/09/dagskr.pdf

Yfir kaffinu var m.a. rætt um námskeið ÍRA til amatörprófs sem hófst í Háskólanum í Reykjavík 25. september s.l. Einnig var rætt um loftnet, tæki og búnað og skilyrðin á böndunum, þ.á.m. um QO-100 gervitunglið.

Alls mættu 23 (þar af 3 gestir) í Skeljanes þetta ágæta fimmtudagskvöld í vesturbænum í Reykjavík.

Stjórn ÍRA.