,

Áramótahreinsun hjá kortastofu Í.R.A.

Áramótaútsending korta frá TF Í.R.A. QSL Bureau, kortastofu, fer að þessu sinni fram mánudaginn 14. janúar 2013. Áramótaútsending er í raun, þegar nánast öll kort sem safnast hafa upp hjá stofunni, (t.d. til smærri staða) eru “hreinsuð upp” og póstlögð til systurstofa kortastofunnar innan landsfélaga radíóamatöra um heiminn.

Síðasti skiladagur vegna áramótaútsendingar 2012/2013 er fimmtudagskvöldið 3. janúar 2013. Þau kort sem berast í QSL kassann í Skeljanesi það kvöld, verða örugg um að komast í flokkun og til útsendingar í janúar.

Reykjavík 9. desember 2012,


Mathías Hagvaag, TF3-Ø35, QSL stjóri Í.R.A.

/by
,

Vel heppnað fimmtudagserindi hjá TF3KB

Kristján Benediktsson TF3KB flutti fróðlegt erindi um bandplön á amatörböndum þann 6. desember.

Kristján Benediktsson, TF3KB, flutti fimmtudagserindið í félagsaðstöðunni í Skeljanesi 6. desember
s.l. Erindið fjallaði um Endurbætt HF bandplan fyrir IARU Svæði 1.Kristján útskýrði fyrst þörfina fyrir skipulag af þessu tagi, þ.e. niðurskiptingu tíðnisviðanna eftir mismunandi tegund útgeislunar og notkun. Hann skýrði einnig vel alþjóðastarfið að baki setningar leiðbeinandi reglna af þessu tagi og fór yfir bandplönin fyrir amatörböndin frá 136 kHz til 30 MHz og skýrði helstu breytingar sem gerðar voru á ráðstefnu í IARU Svæði 1 í ágúst 2011. Erindið var mjög fróðlegt og vel flutt og spurðu félagsmenn margra spurninga.

Félagi okkar, Guðmundur Ingi Hjálmtýsson, TF3IG, sá fundarmönnum fyrir veislukaffi í tilefni 70 ára afmælis síns. Alls mættu tæplega 30 félagsmenn í Skeljanes að þessu sinni.

Stjórn Í.R.A. þakkar Kristjáni Benediktssyni, TF3KB, fyrir vel heppnað og áhugavert erindi og Guðmund Inga Hjálmtýssyni, TF3IG, fyrir veislukaffið og óskar honum og fjölskyldu hans innilega til hamingju með stórafmælið þann 13. desember n.k. Þá er Jóni Svavarssyni, TF3LMN og Sigurbirni Þór Bjarnasyni, TF3SB, þakkað fyrir fyrir meðfylgjandi myndir.

Frá vinstri: Carl J. Lilliendahl TF3KJ, Gunnar Svanur Hjálmarsson TF3FIN, Sigurður Óskar Óskarsson TF2WIN, Mathías Hagvaag TF3-Ø35, Kjartan H. Bjarnason TF3BJ, Heimir Konráðsson TF1EIN, Sigurbjörn Þór Bjarnason TF3SB og Baldvin Þórarinsson TF3-Ø33.

Frá vinstri: Höskuldur Elíasson TF3RF, Vilhjálmur Ívar Sigurjónsson TF3VS, Vilhjálmur Þór Kjartansson TF3DX, Ársæll Óskarsson TF3AO, Guðmundur Ingi Hjálmtýsson TF3IG (afmælisbarn), Jón Þóroddur Jónsson TF3JA og Brynjólfur Jónsson TF5B.

Jón Gunnar Harðarson TF3PPN, G. Svanur Hjálmarsson TF3FIN og Sigurður Ó. Óskarsson TF2WIN.

Glaðst yfir góðum veitingum. Frá vinstri: Ársæll Óskarsson TF3AO, Vilhjálmur Ívar Sigurjónsson TF3VS, Höskuldur Elíasson TF3RF og Sigurbjörn Þór Bjarnason TF3SB.

Myndin er aðeins af hluta þess viðurgernings sem í boði var með kaffinu í tilefni stórafmælis TF3IG.

 

/by
,

TF3BJ verður á 4. sunnudagsopnun vetrarins

Kjartan H. Bjarnason TF3BJ leiðir umræður á sunnudagsopnun þann 9. desember. Ljósm.: TF3LMN.

Kjartan H. Bjarnason, TF3BJ, leiðir umræður á 4. sunnudagsopnun vetrarins á yfirstandandi vetrardagskrá, sunnudaginn 9. desember n.k. Umfjöllunarefnið í sófaumræðum er PIC smáörgjörvarásir. Húsið verður opnað kl. 10 árdegis og er miðað við að dagskrá verði tæmd á hádegi.

Stjórn Í.R.A. hvetur félagsmenn til að mæta tímanlega. Kaffiveitingar.

________

Fyrirkomulag umræðna í sunnudagsopnunum er hugsað sem afslappuð, þ.e. þar sem menn sitja með kaffibolla í stóra sófasettinu á messutíma og ræða amatör radíó. Tiltekinn leyfishafi sem hefur staðgóða þekkingu á viðkomandi umræðuefni, nú PIC smáörgjörvarásum, leiðir umræðuna og svarar spurningum

/by
,

CQ TF desemberblað er komið út

CQ TF, 4. tbl. 2012 er komið út og hefur verið sent til allra félagsmanna í tölvupósti. Þetta hefti
er nokkru síðar á ferðinni en til stóð. Sæmundur, TF3UA, hljóp hins vegar undir bagga og kom
blaðinu endanlega saman og kann ég honum kærar þakkir, ásamt Vilhjálmi Ívari, TF3VS og
formanni vorum, Jónasi, TF3JB. Njótið lestrarins og hátíðanna sem fara í hönd. 73 – Kiddi, TF3KX.

CQ TF er að þessu sinni 42 blaðsíður að stærð. Meðal efnis:

  • Ritstjóra- og aðstoðarmannsspjall eftir Sæmund E. Þorsteinsson TF3UA.
  • Frá formanni eftir Jónas Bjarnason TF3JB.
  • TF VHF leikar 2012 eftir Guðmund Löve TF3GL.
  • TF útileikar 2012 eftir Bjarna Sverrisson TF3GB.
  • Alþjóðlega vita- og vitaskipahelgin 2012 eftir Jónas Bjarnason TF3JB.
  • SYLRA ferð til Porvoo í Finnlandi 2011 eftir Önnu Henriksdóttur TF3VB og Völu Dröfn Hauksdóttur TF3VD.
  • Kaup á nýrri HF amatörstöð veturinn 2012 eftir Jónas Bjarnason TF3JB.
  • Fundargerðir stjórnarfunda eftir Sæmund E. Þorsteinsson TF3UA.
  • Keppnisdagatal radíóamatöra nóvember 2012 – febrúar 2013eftir Sæmund E. Þorsteinsson TF3UA.
  • Vetrardagskrá 2012/2013 eftir Andrés Þórarinsson TF3AM.

Blaðið verður bráðlega sett inn á vefsvæði CQ TF á heimasíðu félagsins.

/by
,

Glæsilegur árangur TF2CW í CQ WW keppninni

Sigurður R. Jakobsson TF3CW í fjarskiptaherbergi TF3IRA í október s.l. Ljósmynd: TF3LMN.

Alls skiluðu fimm íslenskar stöðvar gögnum til keppnisnefndar CQ tímaritsins vegna þátttöku í morshluta CQ World-Wide DX keppninnar sem haldin var helgina 24.-25. nóvember s.l. Bráðabirgðaniðurstöður (e. claimed scores) hafa nú verið birtar á heimasíðu keppnisnefndar. Samkvæmt þeim, náði Sigurður R. Jakobsson, TF2CW, 2. sætinu yfir Evrópu (silfurverðlaunum) og 4. sæti yfir heiminn. Sigurður keppti á 14 MHz í einmenningsflokki, háafli, aðstoð. Þetta er glæsilegur árangur miðað við afar óhagstæð skilyrði framan af fyrri keppnisdeginum og staðfestir enn einu sinni, að Sigurður er í hópi bestu keppnismanna í heimi.

Aðrar stöðvar reyndust vera með ágætan árangur. Þar má nefna TF4X sem náði 14. sæti yfir Evrópu og 35. sæti yfir heiminn í sínum keppnisflokki og TF3SG sem náði 29. sæti yfir Evrópu og 25. sæti yfir heiminn í sínum keppnisflokki. Sjá nánar í meðfylgjandi töflu.

Stjórn Í.R.A. óskar Sigurði R. Jakobssyni, TF3CW, innilega til hamingju með þennan glæsilega árangur svo og öðrum þátttakendum með þeirra niðurstöður.

Keppnisflokkur

Kallmerki

Yfir heiminn

Yfir Evrópu

Heildarstig
Einmenningsflokkur, 20 metrar, háafl, aðstoð

TF3CW

4. sæti

2. sæti

1,114,920
Einmenningsflokkur, 80 metrar, háafl, aðstoð

TF3SG

35. sæti

29. sæti

44,304
Einmenningsflokkur, öll bönd, lágafl

TF3DX/M

580. sæti

337. sæti

135,036
Einmenningsflokkur, öll bönd, lágafl, aðstoð

TF3VS

520. sæti

260. sæti

34,668
Fleirmenningsflokkur, öll bönd, háafl, aðstoð

TF4X*

35. sæti

14. sæti

9,436,500

*TF4X op’s: G3SWH N3ZZ TF3DC TF3Y UA3AB WA6O.


Hægt er að skoða bráðabirgðaniðurstöður (e. claimed scores) í einstökum keppnisflokkum á heimasíðu keppnisnefndar CQ tímaritsins á þessari vefslóð: http://www.cqww.com/claimed.htm?mode=cw

/by
,

Almenn ánægja með umfjöllun RÚV

RÚV Logo

Almenn ánægja ríkir meðal félagsmanna Í.R.A. með umfjöllun RÚV í innslagi um starfsemi radíóamatöra sem sýnt var í frétta- og þjóðlífsþættinum Landanum, sem sýndur var sunnudaginn 2. desember s.l.

Stjórn Í.R.A. þakkar þeim Leifi Haukssyni og Einari Rafnssynistarfsmönnum RÚV fyrir framúrskarandi vel unnið verkefni og fagleg vinnubrögð.


Sjá má þáttinn með því að smella á eftirfarandi vefslóð.
http://www.ruv.is/sarpurinn/landinn/02122012/radioamatorar

/by
,

TF3KB verður með fimmtudagserindið

Kristján Benediktsson, TF3KB

Kristján Benediktsson, TF3KB, verður með næsta erindi á vetrardagskrá félagsins. Það verður haldið fimmtudaginn 6. desember n.k. í félagsaðstöðunnni við Skeljanes undir yfirskiftinni Endurbætt bandplan fyrir IARU Svæði 1.

Tíðniheimildir radíóamatöra eru settar fram í reglugerðum í sérhverju aðildarlanda ITU, þ.m.t. hér á landi og eru að miklu leyti samræmdar um allan heim. Ísland er hluti af IARU Svæði 1 og á ráðstefnum landsfélaga á svæðinu sem haldnar eru þriðja hvert ár, eru ríkjandi bandplön m.a. til umfjöllunar. Á ráðstefnu Svæðis 1 (haustið 2011) var samþykkt uppfærsla á planinu og mun Kristján m.a. kynna þær breytingar.

Erindið hefst stundvíslega kl. 20:30 og hvetur stjórn Í.R.A. félagsmenn til að mæta tímanlega. Kaffiveitingar.

/by
,

Innslag um radíóamatöra á RÚV á sunnudag

RÚV menn við upptöku í fjarskiptaherbergi TF3IRA 21. nóvember s.l. Frá vinstri: Leifur Hauksson RÚV, Einar Rafnsson RÚV og Jónas Bjarnason TF3JB formaður Í.R.A. Ljósmynd: TF3KB.

Landinn er frétta- og þjóðlífsþáttur þar sem fréttamenn RÚV færa áhorfendum fréttir og fróðleik. Markmiðið er þó ekki síst að segja sögur af fólkinu í landinu. Í næsta þætti Landans, sem sýndur verður á morgun, sunnudag, verður innslag um starfsemi radíóamatöra, m.a. frá keppnisþátttöku og fleira. Þátturinn er á dagskrá sunnudaginn 2. desember kl. 19:40.

Stjórn Í.R.A. þakkar framlag þeirra félagsmanna sem komu að verkefninu.

/by
,

Innslag um radíóamatöra á RÚV á sunnudag

RÚV menn við upptöku í fjarskiptaherbergi TF3IRA 21. nóvember s.l. Frá vinstri: Leifur Hauksson RÚV, Einar Rafnsson RÚV og Jónas Bjarnason TF3JB formaður Í.R.A. Ljósmynd: TF3KB.

Landinn er frétta- og þjóðlífsþáttur þar sem fréttamenn RÚV færa áhorfendum fréttir og fróðleik. Markmiðið er þó ekki síst að segja sögur af fólkinu í landinu. Í næsta þætti Landans, sem sýndur verður á morgun, sunnudag, verður innslag um starfsemi radíóamatöra, m.a. frá keppnisþátttöku og fleira. Þátturinn er á dagskrá sunnudaginn 2. desember kl. 19:40.

Stjórn Í.R.A. þakkar framlag þeirra félagsmanna sem komu að verkefninu.

/by
,

Vel heppnað fimmtudagserindi TF3GL

Guðmundur Löve TF3GL flutti erindi um endurvarpsstöðvar á VHF/UHF í Skeljanesi 29. nóvember.

Guðmundur Löve, TF3GL, flutti fróðlegt erindi í félagsaðstöðu Í.R.A. við Skeljanes fimmtudaginn 29. nóvember s.l. undir heitinu: Áhugaverðar nýjungar í endurvarpsstöðvum á VHF/UHF.

Hann fjallaði m.a. um samanburð á merkjum frá endurvarpa, bílstöð og handstöð á VHF og UHF, út frá mismunandi tæknilegum forsendum og mismunandi staðsetningu endurvarpa, s.s. á Skarðsmýrarfjalli, Skálafelli, í Bláfjöllum, Vestmannaeyjum, á Garðskaga og víðar. Guðmundur sýndi m.a. afar áhugaverðar útbreiðslumyndir í Radio Mobile forriti VE2DBE.

Miklar umræður fóru fram yfir kaffibollum (og dönskum piparkökum) og síðan færðu menn sig yfir á tússtöfluna eftir að formlegu erindi lauk. Alls mættu 25 félagsmenn í Skeljanes þrátt fyrir rigningu og hvassviðri í höfuðborginni og áttu saman fróðlega og skemmtilega kvöldstund.

Stjórn Í.R.A. þakkar Guðmundi Löve, TF3GL vel heppnað og áhugavert erindi og TF3JB og TF3SB,
fyrir myndatökuna.

Sýna má áhugaverðar og nákvæmar útbreiðslumyndir í “Radio Mobile” forritinu; hér frá 4 endurvörpum.

TF3ARI skýrði m.a. frá fyrirhugaðri uppsetningu nýs FM endurvarpa í eigu TF3ML á Skarðsmýrarfjalli.

Menn hlustuðu af athygli þegar TF3GL ræddi mikilvægi næmni endurvarpa og jákvæð áhrif tónlæsingar.

Áhugaverðar umræður fóru m.a. fram um aukna möguleika með innleiðslu “kross-band” varpa á UHF.

/by