Archive for category: Fréttir

 

 

 

 

 

 

 

 

Næsti viðburður á vetrardagskrá félagsins fer fram í Skeljanesi laugardaginn 20. október kl. 16-19. Þá munu þeir Ari Þórólfur Jóhannesson, TF3ARI og Benedikt Guðnason, TF3TNT, verða með kynningu á því hvernig DX-sambönd um gervitungl fara fram.

Þetta er spennandi viðburður, m.a. í ljósi þess að TF3IRA er nú að fullu QRV til fjarskipta af þessu tagi, en á laugardag verður tekið í notkun nýtt “tracking” forrit frá Northern Lights Software Associates (NLSA), Nova for Windows; útgáfa 2.2c, sem er vinsælasta forritið af þessari tegund í heiminum í dag.

Stjórn Í.R.A. hvetur félagsmenn sem hafa í hyggju að koma sér upp búnaði til gervihnattafjarskipta eða hafa áhuga á fjarskiptum af þessu tagi, að láta þennan viðburð ekki fram hjá sér fara.

Gervihnattabúnaður TF3IRA.

(1) VHF/UHF hringpóluð Yagi loftnet frá M2. VHF loftnetið er af 2MCP14 gerð; 14 staka með 10.2 dBdc ávinningi. UHF loftnetið er af 436CP30 gerð; 30 staka með 14.15 dBdc ávinningi. (2) Rótor er frá Yaesu af G-5400B gerð, sambyggður fyrir lóðréttar og láréttar stillingar. Með honum fylgir fjölstillikassi (e. Elevation Azimuth Dual Controller) stýranlegur frá tölvu. (3) VHF og UHF formagnarar eru frá SSB-Electronic GmbH. Mögnun er 20 dB/0,8 dB suðhlutfall á VHF og 20 dB/0,9 dB suðhlutfall á UHF. (4) Kenwood TS-2000 sendi-/móttökustöð félagsins er notuð til fjarskipta um gervitungl. Hún er 100W á 144-146 MHz og 50W á 430-440 MHz.

Sigurður R. Jakobsson, TF3CW, virkjaði félagsstöðina, TF3W, í Scandinavian Activity SSB keppninni helgina 13.-14. október. Vel var staðið að undirbúningi stöðvarinnar fyrir keppnina og komu margir að því verki. Þrátt fyrir afar erfið skilyrði náði Sigurður að hafa 1040 QSO; nánast einvörðungu á 14 MHz. Mestan hluta keppnistímans stóð “aurora” gildið í 10 og K-gildið í rúmlega 6, en vísun yfir 5 er flokkuð sem segulstormur.

Vel var staðið að undirbúningi keppninnar sem tók meira og minna alla síðustu viku. Auk SteppIR 3E Yagi loftnets félagsins á 14 MHz, 21 MHz og 28 MHz, munaði mest um færanlegt fjarskiptavirki Ólafs B. Ólafssonar, TF3ML, sem hann flutti á staðinn á fimmtudag. Ólafur setti upp OptiBeam OB-5 einsbandsloftnet á færanlega turninn, sem er 5 staka Yagi á 14 MHz með 15,7 dBi ávinning. Alvöru loftnet með 15,1 metra langri bómu og nær 90 kg að þyngd (eftir styrkingar). Á föstudagsmorgun var skotbómukrani síðan fluttur í Skeljanes. Hann var útbúinn með Cushcraft 2 staka Yagi loftneti á 7 MHz sem er í eigu Sigurðar. Síðar sama dag var sett upp Fritzel V-loftnet á hvolfi í eigu Ólafs fyrir 3,7 MHz. (Til skýringar: Ekki þurfti að hugsa um 160 metrana, þar sem SAC keppnirnar fara ekki fram á því bandi).

Stjórn Í.R.A. óskar Sigurði R. Jakobssyni, TF3CW, til hamingju með þann árangur sem þó náðist miðað afar erfið skilyrði. Sérstakar þakkir til Ólafs B. Ólafssonar, TF3ML, sem veitti félaginu ómetanlegan liðsstyrk með láni á búnaði og persónulegri aðkomu að undirbúningi stöðvarinnar. Það sama á við aðra félagsmenn sem veittu verkefninu aðstoð á einn eða annan hátt. Hér á eftir eru birtar nokkrar ljósmyndir til fróðleiks.

 

 

 

 

 

 

 

 

Næsti viðburður á vetrardagskrá félagsins er stöðutaka í morsi, sem fram fer
laugardaginn 13. október kl. 15:00-17:00 í félagsaðstöðu Í.R.A. í Skeljanesi.
Stefán Arndal, TF3SA og Guðmundur Sveinsson, TF3SG, annast viðburðinn.

Þeir sem eiga eftir að skrá þátttöku geta sent töluvpóst á Guðmund. Tölvupóstfang
hans er: dn (hjá) hive.is eða hafa samband við hann í síma 896-0814. Líkt og áður
hefur komið fram, er stöðutakan fyrir alla leyfishafa, þ.e. jafnt fyrir þá sem eru rétt
að byrja sem og þá sem lengra eru komnir.

Stjórn Í.R.A. hvetur félagsmenn til að nýta sér þetta tækifæri.

Líkt og kunnugt er, var Kenwood endurvarpi félagsins sem var tengdur við TF8RPH á Garðskaga fluttur þann 9. september s.l. til TF1RPH í Bláfjöllum og skipt út fyrir stöðina þar sem varð fyrir eldingu.

Í því augnamiði að nota aðstöðuna á Garðskaga til tilrauna uns til nýr endurvarpi verður tengdur, gerðu þeir Ari Þórólfur Jóhannesson, TF3ARI og Sigurður Smári Hreinsson, TF8SM ferð í vitavarðarhúsið á Garðskaga í dag, þann 6. október, og tengdu Kenwood TM-D700A VHF/UHF sendi-/móttökustöð við VHF/UHF húsloftnet félagsins á staðnum (sem áður var tengt við TF8RPH).

Frá því skömmu eftir hádegi í dag (6. október) hefur TM-700A stöðin þannig unnið frá Garðskaga sem krossband endurvarpi í tengslum við TF1RPB í Bláfjöllum. Þetta þýðir, að þegar merki er sent út á tíðninni 434.500 MHz, er það áframsent á tíðninni 145.150 MHz (frá Garðskaga) sem opnar viðtæki TF1RPB í Bláfjöllum og sendir merkið út á 145.750 MHz. Að sama skapi, þegar merki er sent inn á TF1RPB er það móttekið á Garðskaga og sent út á tíðninni 434.500 MHz. Í báðum tilvikum er notuð CTCSS tónlæsing á 88,5 riðum. Eins og áður hefur komið fram, er hægt að hlusta á fjarskiptin á þessum tíðnum þótt stöð eða viðtæki sé ekki búið tónlæsingarbúnaði.

Hugmyndin er, að þessi uppsetning verði í gangi um óákveðinn tíma í tilraunaskyni. Það er TF3ARI sem lánar stöðina og TF8SM sem lánar aflgjafann. Stjórn Í.R.A. lýsir yfir ánægju sinni með framtak þeirra félaga og hvetur félagsmenn til að taka þátt í þessu spennandi verkefni.

Fyrsti fundur starfshóps sem skipaður var af stjórn Í.R.A. þann 17. f.m. til að gera tillögur um neyðarfjarskiptastefnu félagsins var haldinn í félagsaðstöðunni í Skeljanesi þann 1. október s.l. Fundin sátu Jón Þóroddur Jónsson, TF3JA, neyðarfjarskiptastjóri Í.R.A. og formaður starfshópsins; Sigurður Óskar Óskarsson, TF3WIN, fulltrúi stjórnar Í.R.A.; Henry Arnar Hálfdánarson, TF3HRY; Jón Svavarsson, TF3LMN; og Jónas Friðgeirsson, TF3JF. Ari Þórólfur Jóhannesson, TF3ARI, er einnig í starfshópnum, en var fjarstaddur vegna vinnu. Jónas Bjarnason, TF3JB, formaður Í.R.A. sat fundinn. Fram kom í inngangsræðu hans, að stjórn félagsins væntir mikils af störfum hópsins og óskaði hann viðstöddum góðs gengis í vinnu sinni.

Fundurinn stóð í um tvær klukkustundir. Jón Þóroddur Jónsson, TF3JA, sagðist vera mjög ánægður með þennan fyrsta fund. Menn hafi verið áhugasamir og margt áhugavert hafi komið fram sem lofi góðu um framtíðarvinnu starfshópsins. Næsti fundur er boðaður að þremur vikum liðnum. Sjá nokkrar ljósmyndir frá fundinum hér fyrir neðan.