Fréttir – Page 221 – Íslenskir Radíóamatörar

Góðir gestir í Skeljanesi

Claudio Corcione TF2CL, Salvatore Sasso IC8SQS og Pasquale Scannapieco DJØCL/IC8SQP
skoða útprentun af fyrsta RTTY QSO’inu sem haft var frá íslenskri radíóamatörstöð (TF3IRA)
fyrir rúmum 38 árum, þ.e. þann 29. mars 1974.

Góðir gestir sóttu félagsaðstöðu Í.R.A. í Skeljanesi heim þann 2. ágúst. Það voru þeir Salvatore Sasso, IC8SQS og Pasquale Scannapieco, DJØCL/IC8SQP. Þeir félagar eru í heimsókn hér á landi hjá Claudio Corcione, TF2CL, sem er búsettur á Akranesi og komu þeir í Skeljanesið í hans fylgd. Salvatore hefur reyndar komið áður til landsins og heimsótti Í.R.A. í vor sem leið.

Salvatore og Pasquale eru báðir áhugamenn um RTTY og eldri „teletype” vélar og spunnust miklar umræður um slík mál þegar þeir komu auga á innrammaðan pappír („hard copy”) sem hékk á vegg í fjarskiptaherbergi félagsins af fyrsta RTTY QSO’inu sem haft var frá íslenskri radíóamatörstöð sem Kristján Benediktsson, TF3KB, hafði frá TF3IRA, þann 29. mars 1974 á Teletype 15 vél.

Það kom í ljós að þeir þekktu báðir vel til Teletype véla, ásamt Siemens og Olivetti. Umræðan náði síðan nýjum hæðum þegar Ari Þór Jóhannesson, TF3ARI, kom inn í herbergið og tjáði þeim að hann hafi verið viðgerðarmaður hjá Pósti & síma um áratuga skeið með sérhæfingu í að gera við og setja upp þessar vélar (þá sem telex búnað). Salvatore og Pasquale voru afar hrifnir af þeirri forsjálni að halda til haga pappírnum frá 1. QSO’inu á RTTY frá landinu. Spurðu þeir mikið um þennan TF3KB
og báðu fyrir góðar kveðjur til hans. IC8SQS, DJØCL/IC8SQP og TF2CL eru allir Ítalir að uppruna og ættaðir frá eyjunni Ischia sem er um 30 km frá Napólí.

Umrætt innrammað pappírsafrit af fyrsta RTTY QSO’i frá Íslandi sem haft var frá TF3IRA fyrir rúmum 38 árum og hangir á vegg í fjarskiptaherbergi félagsins.

Líkt og fram kemur að ofan, var sá sem hafði ofangreint QSO frá TF3IRA árið 1974, Kristján Benediktsson, TF3KB. Sambandið var við K3KV á 14 MHz. Móttekið RST var 579; nafnið var John; og QTH nærri Philadelphia í Bandaríkjunum. Sent RST var 599. Kristján notaði Teletype 15 vél ( http://www.baudot.net/teletype/M15.htm ) og heimasmíðaðan afmótara (e. demodulator). Þáverandi QTH félagsins var vestast á Vesturgötunni í Reykjavík. Sendiafl var 30W og loftnet, tvípóll.

Þegar þetta fyrsta RTTY samband var haft fyrir rúmum 38 árum notuðu radíóamatörar svokallaðar fjarritvélar (einnig nefndar “telex” eða “teletype” vélar). Vélarnar “hömruðu” stafina á pappír sem á þeim tíma var fáanlegur á þáverandi lager hjá Landssímanum í kjallara Landssímahússins við Sölvhólsgötu. Afar ánægjulegt er, að upphaflega pappírsafritið af QSO’inu hefur varðveist. Sú innrömmun sem sjá má á myndinni að ofan, er “endurnýjuð” innrömmun og bætt að gæðum. Þess má geta, að þegar eldri ramminn var “opnaður” til að nálgast upphaflega pappírinn til endurinnrömmunar, kom í ljós að pappírinn hafði verið notaður báðum megin og eru á bakhliðinni (sem reyndar sést ekki) afrit af prófunum Kristjáns, TF3KB, áður heldur en hann fór í loftið þetta kvöld í mars 1974 og kallaði út fyrsta CQ’ið á RTTY “de TF3IRA”. Þetta sýnir að menn nýttu pappírinn vel á þessum tíma.

6. August, 2012/by TF3JB

Almennt, Fréttir

TF3IRA að fullu QRV á ný á 14-52 MHz

Sumarmynd af SteppIR 3E 3 staka Yagi loftnet TF3IRA þann 1. ágúst 2012.

Í dag var unnið við að forrita “stoppið” á AlfaSpid rótor félagsins, sem snýr SteppIR 3E Yagi loftneti félagsstöðvarinnar, TF3IRA. Yngvi Harðarson, TF3Y, annaðist verkefnið, sem tókst vel. Að auki var farið yfir aðrar stillingar rótors og loftnets. Stöðin er nú að fullu QRV á sex böndum á ný, þ.e. 14, 17,21, 24, 28 og 50 MHz.

Líkt og fram kom í frásögn af lokaviðgerð rótorsins sem TF3CY annaðist og lauk s.l. fimmtudag, þá þarf að fella turninn á næstunni til að vatnsverja rótorhúsið, enda Atlandshafið aðeins örfáa metra frá loftnetsturninum. Í vettvangsskoðun í dag kom ennfremur í ljós, að hluti bómunnar, þ.e. frá “drifna” stakinu að “reflectornum” virðist vera snúin. Þetta má sjá glögglega á meðfylgjandi ljósmynd af loftnetinu (sjá stakið sem er fjærst).

Í gær barst síðan staðfesting frá SteppIR, vegna pöntunar á sérstökum “High-wind” festingum fyrir loftnetið, sem samþykkt var að kaupa á stjórnarfundi í félaginu s.l. fimmtudag. Að sögn Erlings Guðnasonar, TF3EE, sem annaðist pöntunina, er þess að vænta að festingarnar berist til landsins innan mánaðar.

Stjórn Í.R.A. þakkar þeim Yngva Harðarsyni, TF3Y og Erling Guðnasyni, TF3EE, fyrir þeirra ágætu aðkomu að þessu verkefni.

4. August, 2012/by TF3JB

Almennt, Fréttir

Árangur TF3CW er á heimsmælikvarða

Sigurður R. Jakobsson, TF3CW

Í ágústhefti CQ tímaritsins 2012 eru birtar niðurstöður úr SSB-hluta CQ World-Wide DX keppninnar sem fram fór dagana 29.-30. október 2011. Þátttaka var mjög góð frá TF en alls sendu 11 TF-stöðvar inn keppnisdagbækur og dreifðust keppendur á átta mismunandi keppnisflokka. Sigurður R. Jakobsson, TF3CW, náði afburðaárangi í sínum keppnisflokki, en hann keppti í einmenningsflokki á 14 MHz, hámarksafli. Heildarárangur varð 1.378.428 stig. Að baki þessum stigafjölda voru 3.871 QSO, 38 CQ svæði og 136 DXCC einingar. Sigurður varð í 1. sæti yfir Evrópu og handhafi Evrópubikarsins. Þessi niðurstaða tryggði honum jafnframt 3. sæti yfir heiminn; bronsverðlaunin.Árangurinn er framúr-
skarandi góður og til þess fallinn að efla áhuga íslenskra leyfishafa á þátttöku í alþjóðlegum keppnum.

Árangur Yngva Harðarsonar, TF3Y, sem tók þátt í keppninni frá TF4X er einnig framúrskarandi góður. Yngvi keppti í einmenningsflokki á 28 MHz, hámarksafli. Heildarárangur hans varð alls 538.785 stig.Að baki þessum stigafjölda
voru 3.098 QSO, 25 CQ svæði og 92 DXCC einingar. Árangur Andrésar Þórarinsssonar, TF3AM, var einnig góður. Andrés keppti í einmenningsflokki á öllum böndum, hámarksafli. Heildarárangur hans varð alls 445.250 stig. Að baki
þeim stigafjölda voru 1.233 QSO, 61 CQ svæði og 213 DXCC einingar.

Stjórn Í.R.A. óskar Sigurði R. Jakobssyni, TF3CW, innilega til hamingju með frábæran árangur í keppninni, svo og öðrum íslenskum leyfishöfum sem tóku þátt að þessu sinni. Í meðfylgjandi töflu má sjá útkomuna eftir keppnisflokkum.

Keppnisflokkur	Kallmerki	Árangur, stig	QSO	CQ svæði	DXCC einingar
Öll bönd, einmenningsflokkur, hámarksafl	TF3AM*	445.250	1.233	61	213
Öll bönd, einmenningsflokkur, hámarksafl, aðstoð	TF3SG*	89.964	460	36	117
Öll bönd, einmenningsflokkur, hámarksafl, aðstoð	TF3IG	2.709	48	14	29
Öll bönd, einmenningsflokkur, lágafl, aðstoð	TF3DC*	30.502	144	33	118
Öll bönd, einmenningsflokkur, lágafl, aðstoð	TF3PPN	26.001	177	29	78
28 MHz, einmenningsflokkur, hámarksafl	TF4X*	537.785	3.058	25	92
28 MHz, einmenningsflokkur, lágafl	TF8GX*	254.790	1.487	24	71
14 MHz, einmenningsflokkur, hámarksafl	TF3CW*	1.378.428	3.861	38	136
21 MHz, einmenningsflokkur, hámarksafl, aðstoð	TF3AO*	146.718	1.071	18	81
21 MHz, einmenningsflokkur, hámarksafl, aðstoð	TF3CY	113.886	629	28	83
3.7 MHz, einmenningsflokkur, hámarksafl	TF3ZA*	135.136	960	18	85

*Bestur árangur í viðkomandi keppnisflokki (innan TF) og handhafi viðurkenningarskjals frá CQ tímaritinu.

3. August, 2012/by TF3JB

Almennt, Fréttir

Nýir embættismenn taka við

Benedikt Guðnason TF3TNT nýr stöðvarstjóri TF3IRA. Fráfarandi stöðvarstjóri, Benedikt Sveinsson.

TF3CY, sést í baksýn uppi í loftnetsturni félagsins. Ljósmynd: Jón Svavarsson TF3LMN.

Mathías Hagvaag TF3-Ø35 nýr QSL stjóri Í.R.A. tekur við lyklunum af Guðmundi Sveinssyni TF3SG, fráfarandi QSL stjóra Í.R.A. Ljósmynd: Jón Svavarsson TF3LMN.

Tveir nýir embættismenn félagsins tóku formlega til starfa s.l. fimmtudag, þann 26. júlí. Það eru þeir Benedikt Guðnason, TF3TNT, sem tók við starfi stöðvarstjóra TF3IRA af Benedikt Sveinssyni, TF3CY. Benedikt hætti formlega sem stöðvarstjóri þann 17. febrúar s.l., en tók að sér að gegna embættinu til bráðabirgða þar til nýr stöðvarstjóri yrði skiptaður.

Mathías Hagvaag, TF3-Ø35, tók við starfi QSL stjóra Í.R.A. sama dag af Guðmundi Sveinssyni, TF3SG. Guðmundur hætti formlega sem QSL stjóri þann 4. júní s.l., en tók að sér að gegna embættinu til bráðabirgða þar til nýr QSL stjóri yrði skipaður. Formleg skipan fór fram á stjórnarfundi nr. 2/2012 þann 5. f.m.

Stjórn Í.R.A. býður nýja embættismenn velkomna og óskar þeim farsældar í starfi. Fráfarandi embættismönnum eru þökkuð góð störf í þágu félagsins.

2. August, 2012/by TF3JB

Almennt, Fréttir

TF útileikarnir um næstu helgi – verslunarmannahelgina

TF útileikarnir fara fram að venju um verslunarmannahelgina, næstu helgi, og standa yfir í 3 sólarhringa, frá kl. 00z á laugardegi til kl. 24z á mánudegi. Munið aðalþátttökutímabilin:

kl. 1700-1900 laugardag
kl. 0900-1200 sunnudag
kl. 2100-2400 sunnudag
kl. 0800-1000 mánudag

en auðvitað má hafa sambönd hvenær sem er yfir helgina. Ágætt er að nota kalltíðnina 3637 kHz til að hefja sambönd, en mæla sér svo mót á öðrum tíðnum ef þörf er á.

Íslenskir radíóamatörar, hérlendis og erlendis, eru hvattir til að taka þátt, og gjarnan senda logga og jafnvel myndir eða frásagnir úr útileikunum, til Bjarna, TF3GB. Nánari upplýsingar um útileikana má finna í júlíhefti CQ TF og á vef ÍRA.

31. July, 2012/by Kristinn Andersen

Almennt, Fréttir

SteppIR loftnet TF3IRA er komið í lag

Benedikt Sveinsson TF3CY lagfærir AlfaSpid rótorinn við SteppIR 3E Yagi loftnet TF3IRA s.l. fimmtudagskvöld. Ljósmynd: Jón Svavarsson TF3LMN.

Líkt og fram kom á póstlista félagsins í gær, þann 27. júlí, kleif Benedikt Sveinsson, TF3CY, loftnetsturn félagsins á fimmtudagskvöldið og náði að gera við AlfaSpid rótorinn. Stífan, sem sett var upp s.l. laugardag var því fjarlægð og er nú hægt að snúa loftnetinu. Næsta skref er að endurstilla stýriboxið svo það sýni rétta stefnu og forrita endastopp, þar sem við sama tækifæri tókst að gera við rás sem telur snúninga mótorsins. Að sögn Benedikts, er rótorinn nú
tryggilega fastur.

Í viðtali við Benedikt í dag kom m.a. fram, að hann telur að fyrir haustið þurfi að fella turninn og vatnsverja vel rótorhúsið og gera loftnetið að öðru leyti klárt fyrir vetrarveðrin. Þess má geta, að samþykkt var á stjórnarfundi s.l. fimmtudag að félagssjóður festi kaup á sérstökum “High Wind” festingum fyrir SteppIR loftnetið. Áætlað innkaupsverð er um 22 þúsund krónur.

Stjórn Í.R.A. þakkar Benedikt fyrir frábært framtak og vel unnið verk.

28. July, 2012/by TF3JB

Almennt, Fréttir

WAS viðurkenningaskjölin komin til landsins

WAS viðurkenningarskjöl félagsstöðvarinnar TF3IRA eru komin til landsins. Ljósmynd: TF2JB.

Worked All States Award (WAS) viðurkenningarskjölin frá ARRL fyrir TF3IRA komu í hús s.l. fimmtudag. Um er að ræða þrjú viðurkenningarskjöl, þ.e. svokallað “basic” skjal fyrir allar tegundir útgeislunar (mixed), fyrir mors (CW) og fyrir tal (Phone). ARRL hefur staðfest að þetta eru fyrstu WAS viðurkenningaskjölin sem gefin hafa verið út til félagsstöðvarinnar, TF3IRA. Skjölin verða nú send til innrömmunar og að því loknu valinn staður í fjarskiptaherbergi félagsins í samráði við stöðvarstjóra.

Stjórn Í.R.A. þakkar þeim Mathíasi Hagvaag, TF3-Ø35 og Guðlaugi Kristni Jónssyni, TF8GX, fyrir aðkomu þeirra að verkefninu, en Matthías tók saman kortin og vann umsóknir og Guðlaugur, sem er trúnaðarmaður ARRL hér á landi, annaðist yfirferð korta og sendingu gagna vestur um haf. Þess má geta, að ARRL felldi niður öll gjöld vegna umsóknanna.

27. July, 2012/by TF3JB

Almennt, Fréttir

Júlíhefti CQ TF komið út

Júlíhefti CQ TF er komið út og er aðgengilegt félagsmönnum á vef ÍRA. Jafnframt er blaðið sent í tölvupósti á netföng allra félagsmanna.

Ákveðið hefur verið að fjölfalda blaðið ekki á pappír og senda þannig til félagsmanna, eins og verið hefur. Er þetta gert í sparnaðarskyni og vonandi taka félagar ÍRA því vel. Þá ber að geta þess að Vilhjálmur Í. Sigurjónsson, TF3VS, hefur lagt útgáfunni lið með því að taka að sér uppsetningu og umbrot efnis og á hann skildar kærar þakkir félagsins fyrir gott verk.

Njótið lestrarins og vonandi fáum við skemmtilegt og fróðlegt efni – texta og myndir – frá radíóafrekum félagsmanna í lok sumars. Skilafrestur efnis í næsta blað er sunnudagurinn 23. september.

73 – Kiddi, TF3KX, ritstjóri CQ TF

25. July, 2012/by Kristinn Andersen

Almennt, Fréttir

Nýtt loftnet tengt við endurvarpann TF5RPD

Útbreiðslumynd fyrir TF5RPD sem er staðsettur í Vaðlaheiði norðaustan Akureyrar.

Nýtt loftnet hefur verið sett upp og tengt við endurvarpann TF5RPD. Um er að ræða öflugt skipanet úr trefjagleri sem er rúmlega 7 metrar á hæð og hefur tæplega 9 dB ávinning og var notað við endurvarpann til ársins 2009 er það féll til jarðar. Í millitíðinni var notað heima smíðað “Slim-Jim” loftnet”. Að sögn Þórs Þórissonar, TF3GW, var fæðilína endurnýjuð við sama tækifæri. Frágangi var lokið í gær, þann 19. júlí.

Fyrstu prófanir lofa góðu. TF5B og TF3GL/m höfðu t.d. samband um TF5RPD þegar TF3GL/m var staddur á erfiðum stað til fjarskipta við Mývatn. Það gekk ágætlega að sögn TF5B.

Endurvarpinn tekur á móti á 145.025 MHz og sendir út á 145.725 MHz. Hann er staðsettur í Vaðlaheiði sem er 550 metra hátt fjall norðaustur af Akureyri. Endurvarpinn er búinn auðkenni á morsi.

Stjórn Í.R.A. þakkar þeim Guðmundi Sigurðssyni, TF3GS og Þór Þórissyni, TF3GW, fyrir að annast verkefnið.

23. July, 2012/by TF3JB

Almennt, Fréttir

SteppIR loftnet TF3IRA stífað af

SteppIR 3E þriggja staka Yagi loftnet TF3IRA er 6 banda loftnet í tíðnisviðum frá 14-52 MHz.

Erling Guðnason, TF3EE, átti ferð framhjá félagsaðstöðunni í Skeljanesi skömmu eftir hádegi í dag, 21. júlí, ásamt Jakob Helgasyni, TF3EJ. Þá þegar var vindur orðinn nokkur í vesturbænum og SteppIR 3E Yagi loftnet TF3IRA farið að sveiflast laust. Í framhaldi var ákveðið að vinda bráðan bug að því að stífa loftnetið af, enda verðurspá slæm fyrir kvöldið og nóttina.

Nokkru síðar mættu þeir Ari Þór Jóhannesson, TF3ARI og Baldvin Þórarinsson, TF3-Ø33, á staðinn og var hafist handa, turninn klifinn og gengið trygglega frá festingu bómunnar við turnrörið, auk þess sem bóman var stífuð af til öryggis. Verkinu var lokið um kl. 17 í eftirmiðdaginn. Það var samdóma álit þeirra þriggja, að panta þurfi a.m.k. svokallað “High Wind Kit” frá SteppIR, (sjá mynd neðar á síðunni) auk þess sem líklega þurfi að endurskoða rótormál.

Stjórn Í.R.A. þakkar þeim Erling Guðnasyni, TF3EE, Ara Þór Jóhannessyni TF3ARI, og Baldvin Þórarinssyni, TF3-Ø33, fyrir vinnuframlag þeirra félaga í dag til að tryggja sem best að loftnet félagsins verði ekki fyrir skemmdum. Sérstakar þakkir til TF3ARI fyrir meðfylgjandi ljósmyndir.