,

8 milljónir stiga í CQ World-Wide WPX keppninni

Sigurður R. Jakobsson, TF3CW.

Sigurður R. Jakobsson, TF3CW, tók þátt í CQ Word-Wide WPX keppninni (SSB hluta) helgina 26.-27. mars og gekk framúrskarandi vel. Niðurstaðan var: 3.285 QSO og 1170 forskeyti eða alls 8.085.560 stig. Sigurður notaði hámarks leyfilegan þátttökutíma í keppninni, eða 36 klst. en miðað er við 12 klst. lágmarkshvíld keppenda. Sigurður var að jafnaði með 91,4 QSO á klst., sem samsvarar 1,8 QSO á mínútu – allan þátttökutímann; enda voru skilyrðin mjög góð. Til marks um það má nefna að hann gat haldið sömu vinnutíðni í 10 klst. samfleytt (QRG 14,154 MHz). Sigurður keppti í einmenningsflokki, hámarksafli, á 14 MHz. Hann notaði 4 staka ZX einbands Yagi loftnet í 20 metra hæð.

Stjórn félagsins óskar Sigurði til hamingju með þennan frábæra árangur.

TF2JB

/by
,

TF3HRY verður með fimmtudagserindið

Henry Arnar Hálfdánarson, TF3HRY, stillir Collins 75S-3C viðtækið í fjarskiptaherberginu. Ljósmynd: TF3AM.

Næsta erindi á vetrardagskrá félagsins verður haldið fimmtudaginn 31. mars n.k., kl. 20:30 í félagsaðstöðunni í Skeljanesi. Fyrirlesari kvöldsins er Henry Arnar Hálfdánarson, TF3HRY, og nefnist erindið Loftnet og útgeislun á lægri böndum. Henry mun einkum fjalla um amatörböndin frá 500 kHz og neðar. Hugmyndin er, að velta fyrir sér “praktískum” lausnum á því hvað meðal radíóamatörinn getur gert á þessum böndum, þar sem verið er að kljást við “reactive” loftnet, háa spennu, litla nýtni o.s.frv. Henry mun fjalla um þann ramma sem takmarkar hvað flestir leyfishafar geta gert í garðinum hjá sér og sýna fram á að í raun er ýmislegt hægt að gera.

Stjórn Í.R.A. hvetur félagsmenn til að taka frá næstkomandi fimmtudagskvöld og mæta stundvíslega í Skeljanesið. Kaffiveitingar verða í boði félagsins.

TF2JB

/by
,

Fróðlegur “EchoLink” fimmtudagur í Skeljanesi

Þór Þórisson, TF3GW, flutti fróðlegt erindi um “EchoLink” þann 24. mars.

Þór Þórisson, TF3GW, flutti áhugavert og fróðlegt erindi í félagsaðstöðu Í.R.A. fimmtudaginn 24. mars. Erindið nefndi hann Reynslan af rekstri EchoLink á Íslandi. Þór er mikill áhugamaður um fyrirbærið og setti m.a. upp tengingu fyrir “EchoLink” hér á landi þegar árið 2006. Hann er ábyrgðar- og rekstrar aðili “EchoLink” þjónustu sem er í boði til leyfishafa á 145.350 MHz.

Í erindi sínu útskýrði Þór m.a. hvernig EchoLink vinnur. Um er að ræða tengingu tveggja amatörstöðva (eða fleiri) sem nota tveggja metra bandið. Merkin fara yfir netið þannig að annar leyfishafinn getur t.d. verið staddur hérlendis og hinn erlendis, í raun hvar sem er í heiminum. Forsendan er, að hvor leyfishafi um sig hafi aðgang að endurvarpa með nettengingu og búi yfir upplýsingum um svokallað “node” númer sem er 6 tölustafir. “EchoLink” hugbúnaðurinn kom fyrst fram árið 2002 og er skráður samkvæmt einkaleyfi, en radíóamatörum er heimilt að nota hann frítt. Hönnuður hugbúnaðarins er Jonathan Taylor, K1RFD. Talið er, að fjöldi radíóamatöra sem nota “EchoLink” í heiminum sé í dag um 200 þúsund, þar af eru um 5 þúsund QRV hverju sinni. Þór svaraði fjölda spurninga í lok erindisins. Alls mættu um 20 manns í Skeljanesið í þetta sinn.

Fram kom m.a. að um 200 þúsund radíóamatörar eru QRV á EchoLink í heiminum. Ljósmynd: TF3LMN.

Þór náði strax sambandi á 2 metra handstöðinni við radíóamatör í Odense í Danmörku um EchoLink búnaðinn.

Bestu þakkir til Þórs Þórissonar, TF3GW, fyrir erindisflutninginn og til Jóns Svavarssonar, TF3LMN, fyrir myndatökuna.

TF2JB

/by
,

Afar vel heppnað fimmtudagserindi Vilhjálms, TF3DX

Vilhjálmur Þór Kjartansson, TF3DX, fjallaði af innlifun um loftnetafræðina og fangaði hugi viðstaddra.

Vilhjálmur Þór Kjartansson, TF3DX, flutti síðari hluta erindis síns um Sendiloftnet á 160 metrum; sjónarmið við hönnun fimmtudagskvöldið 17. mars s.l. Þeir sem lögðu leið sína í Skeljanesið urðu ekki fyrir vonbrigðum frekar en þegar fyrri hluti erindisins var fluttur þann 24. febrúar s.l. Vilhjálmur fór á kostum og beinlínis fangaði hugi viðstaddra með faglegri og áhugaverðri framsetningu. Umfjöllunarefnið, var sem fyrr, sprottið af hönnun hans á sendiloftneti fyrir Þorvald Stefánsson, TF4M á 1,8 MHz.

Vilhjálmur setti efnið þannig fram, að hvorutveggja hentaði byrjendum og þeim sem lengra eru komnir í fræðunum.

Fyrst rifjaði Villi upp helstu niðurstöður úr fyrri hlutanum, síðan hvernig útgeislað svið er í réttu hlutfalli við flatarmálið undir straumferlinum. Það skýrði hvers vegna geislunarviðnám í stuttum loftnetum stígur með lengd þeirra í öðru veldi. Því næst fjallaði hann um raunhæfa straumgleypa og hvernig hallandi vírar í topphatti vinna að hluta gegn straumnum í lóðrétta leggnum. Það leiðir til þess geislunarviðnámið fer að falla aftur ef þeir eru síkkaðir of mikið. Síðan útskýrði Villi kúplað tapsviðnám frá jörð í mótvægisvíra, og hvernig það minnkar þegar þeim er lyft. Hann tók dæmi af 1,8 MHz loftneti TF4M um öll þessi atriði, og sýndi að nóg var að nota 2 víra uppi og aðra 2 niðri ef rétt væri farið að. Mælingar í haust (2010) bentu til að nýtnin væri milli 80 og 90%.

Myndin sýnir aðeins hluta þeirra sem gerðu sér ferð í Skeljanesið þetta fimmtudagskvöld; mæting var alls 28 manns.

Stjórn Í.R.A. þakkar Vilhjálmi, TF3DX, fyrir afar vel heppnað erindi og Gísla G. Ófeigssyni, TF3G, fyrir myndatökuna.

TF2JB

/by
,

Skil efnis í CQ TF fyrir lok vikunnar

Minnt er á að skilafrestur efnis í aprílhefti CQ TF er nk. sunnudag, 27. marz. Í góðu lagi er að senda ritstjóra punkta, ábendingar og efni, sem ritstjóri getur unnið úr frekar. Og myndir eru auðvitað alltaf velkomnar og “segja meira en þúsund orð”.

Efni má senda ritstjóra, Kristni Andersen – TF3KX:

cqtf@ira.is
GSM 825-8130

/by
,

Góður árangur TF3W í RDXC keppninni 2011

TF3SG lánaði 21 m. háa stöng fyrir 80 metrana. Ljósm.: TF2JB.
(Myndin var tekin 6.12.2009).

Alls náðust 1,783 QSO frá TF3W í Russian DX Contest 2011 (RDXC) keppninni sem lauk kl. 11:59 í dag, 20. mars. Samkvæmt þessari niðurstöðu er áætlaður heildarárangur um 3 milljónir punkta. Að sögn Sigurðar R. Jakobssonar, TF3CW sem skipulagði keppnina er þessi niðurstaða mjög ásættanleg miðað við skilyrðin og í annan stað, að um var að ræða æfingar- og kynningarkeppni fyrir félagsmenn sem vildu kynnast þátttöku í alþjóðlegum keppnum. Sigurður gat þess einnig, að þrátt fyrir allt, hafi heildarárangurinn sem stefnt var að, þ.e. 2,000 QSO, verið í sjónmáli. Þátttaka var bæði á CW og SSB.

Flest sambönd voru höfð á 20 metrunum í gær (laugardag) en í morgun (sunnudag) þegar opnaðist á 15 metrunum, komu þeir vel inn. Tæplega 200 QSO náðust á 80 metrunum, sem er góður árangur miðað við skilyrðin, en mjög gott loftnet var til ráðstöfunar í keppninni (lánað af TF3SG).

Þátttakendur voru: Benedikt Sveinsson, TF3CY; Guðmundur Sveinsson, TF3SG; Jón Þóroddur Jónsson, TF3JA; Óskar Sverrisson, TF3DC; Sigurður Óskar Óskarsson, TF2WIN; Stefán Arndal, TF3SA; Sveinn Guðmundsson, TF3T; og Yngvi Harðarson, TF3Y. Margir félagsmenn lögðu leið sína í Skeljanesið og fylgdust með “okkar mönnum” í keppninni um helgina.

Stjórn Í.R.A. óskar hlutaðeigandi til hamingju með árangurinn.

TF2JB

/by
,

TF3GW verður með fimmtudagserindið

Þór Þórisson, TF3GW. Myndin er tekin á Rjúpnahæð 2008. Ljósm.: TF3AM.

Næsta erindi á vetrardagskrá félagsins verður haldið fimmtudaginn 24. mars n.k. kl. 20:30. Fyrirlesari kvöldsins er Þór Þórisson, TF3GW, og nefnist erindið Reynslan af rekstri “EchoLink” á Íslandi. Þór er mikill áhugamaður um “EchoLink” verkefnið og setti m.a. fyrst upp tengingu fyrir “EchoLink” hér á landi árið 2006. Þór er ábyrgðar- og rekstraraðili “EchoLink” þjónustu sem er í boði 145.350 MHz.

Þór er félagsmönnum af góðu kunnur. Hann hefur tekið virkan þátt í félagsstöfunum Í.R.A. í gegnum árin, m.a. sem stjórnarmaður og ábyrgðarmaður einstakra verkefna, auk þess að hafa skrifað greinar í CQ TF og kennt á námskeiðum félagsins til amatörréttinda. Hann er handhafi leyfisbréfs nr. 126.

“EchoLink” hugbúnaðurinn kom fyrst fram árið 2002. Hugbúnaðurinn gerir radíóamatörum kleift að nota Internetið sem einskonar “milliþátt” í fjarskiptum sínum. Hönnuður forritsins er bandarískur radíóamatör, Jonathan Taylor, K1RFD. Í grein, sem Jón Þóroddur Jónsson, TF3JA, skrifaði í 4. tbl. CQ TF 2009, segir m.a. “D-STAR aðferðin, eða samskiptamátinn, tengir saman stafræn fjarskipti og alnetið og svipar þannig til fjarskipta um EchoLink, en með D-STAR tækninni eru talfjarskiptin færð yfir í stafræna mótun sem, ásamt meiri gagnaflutningshraða, eykur gæði talflutningsins og flutningsgetu gagnasambandsins”. Talið er, að fjöldi radíóamatöra sem nota “EchoLink” í heiminum sé um 200 þúsund, þar af séu um 5 þúsund “í loftinu” hverju sinni.

Stjórn Í.R.A. hvetur félagsmenn til að fjölmenna. Kaffiveitingar verða í boði félagsins.

 TF2JB
/by
,

TF3CW og TF4M í 4. og 7. sæti yfir heiminn

Úrslit í ARRL International DX Contest – CW hlutanum 2010 – hafa verið birt. Alls sendu sex TF-stöðvar inn keppnisdagbækur að þessu sinni, í fimm keppnisflokkum. Tveir íslenskir leyfishafar náðu afburða árangri í keppninni. Það eru þeir Sigurður R. Jakobsson, TF3CW, sem náði 4. sæti yfir heiminn í einmenningsflokki á 14 MHz, hámarksafli; hann var með alls 306,210 punkta og Þorvaldur Stefánsson, TF4M, sem náði 7. sæti yfir heiminn í einmenningsflokki á 1,8 MHz, hámarksafli; hann var með 59.730 punkta. Keppnin fór fram helgina 20.-21. febrúar 2010.


Úrslit í keppninni fyrir TF-stöðvar urðu að öðru leyti samkvæmt eftirfarandi:

Keppnisflokkur

Kallmerki

Árangur, punktar

QSO

Margfaldarar
Einmenningsflokkur – 1,8 MHz – hámarksafl
TF4M
59,730
369
55
Einmenningsflokkur – 7 MHz – hámarksafl

TF3Y

94,248

567

56
Einmenningsflokkur – 14 MHz – hámarksafl

TF3CW

306,210

1,739

59
Einmenningsflokkur – 14 MHz – lágafl

TF3G

6,660

80

30
Einmenningsflokkur – 21 MHz – hámarksafl

TF8GX

71,604

471

52
Einmenningsflokkur – öll bönd – hámarksafl, aðstoð

TF3DC

170,520

409

140


Stjórn Í.R.A. óskar hlutaðeigandi innilega til hamingju með árangurinn.


Sjá nánar: http://www.arrl.org/files/file/Contest%20Line%20Scores/2010/2010%20DX%20CW%20Line%20Scores%20v1.pdf

TF2JB

/by
,

QSL – Bureau – flokkun korta eftir löndum

Sælir félagar, mig langar að biðja alla í mestu vinsemd, sem skila ínn kortum til QSL Bureau að flokka þau vandlega eftir löndum (ekki í stafrófsröð).  Það er mjög tímafrekt fyrir QSL Manager að standa í því að flokka kort sem ekki eru flokkuð eftir löndum.  Oft flækjast stök kort inn á milli, t.d.eitt kort JY inni á milli korta sem eiga að fara á JA.  Vinsamlegast skoðið vel upplýsingar á heimasíðu ÍRA og QSL Bureau um þau lönd sem ekki starfrækja QSL Bureau.  Það er ekki hægt að leggja það á núverandi QSL Manager nema í undantekningartilvikum að taka við kortum sem stíluð eru á QSL Bureau sem ekki eru starfrækt.

Það gildir eftir sem áður að kort sem fara til þýskalands skal einnig raða og flokka eftir forskeytum, þ.e. DE, DF, DM o.s.frv. Þvi til viðbótar er nú vinsamlegast komið á framfæri að kortum sem fara til USA, Bandaríkja N-Ameríku sé raðað saman eftir svæðum, þ.e. W1, K1, WA1 saman o.s.frv.

Allt er þetta sagt til að auka skilvirkni QSL Buerau svo og að þjónusta QSL Bureau megi vera til fyrirmyndar.

73

Guðmundur, TF3SG

Sjá nánar: http://www.ira.is/pages/viewpage.action?pageId=4194457

/by
,

TF3DX verður með fimmtudagserindið

Vilhjálmur Þór Kjartansson, TF3DX/M, nærri Bíldudal á Vestfjörðum haustið 2010. Ljósmynd: Þorvaldur, TF4M.

Næsta fimmtudagserindi á vetrardagskrá félagsins verður haldið fimmtudaginn 17. mars n.k. kl. 20:30. Fyrirlesari kvöldsins er Vilhjálmur Þór Kjartansson, TF3DX, og mun hann nú flytja okkur síðari hluta erindisins “Sendiloftnet TF4M á 160 metrum; sjónarmið við hönnun” en fyrri hlutinn var fluttur fyrir þremur vikum. Vilhjálmur segir sjálfur, að sem áður muni hann leitast við að setja efnið þannig fram, að hvorutveggja höfði til byrjenda sem og þeirra sem eru lengra komnir í loftnetafræðum.

Síðast lagði Vilhjálmur upp með grundvallarspurninguna um lárétta eða lóðrétta skautun og hvernig það tengist þeim vanda sem er samfara hönnun loftneta þegar bylgjulengdin er 160 metrar og ekki reynist unnt að koma þeim hærra en sem nemur 1/8 úr bylgjulengd eða svo. Hann útskýrði einnig áhrifin af jarðleiðni, ekki síst kosti þess að hafa loftnet við sjávarsíðuna eins gert var með umrætt loftnet. Loks drap hann á áhrifin af mismunandi hæð lóðréttra loftneta. Í síðari hluta erindis síns mun hann fjalla um tapsvalda og sjónarmið við hönnun topphatts og mótvægis, með nýtni að leiðarljósi.

Stjórn Í.R.A. hvetur félagsmenn til að taka frá næstkomandi fimmtudagskvöld og mæta stundvíslega í Skeljanesið. Kaffiveitingar verða í boði félagsins.

Vilhjálmur, TF3DX, við tengikassa fyrir fæðilínu í 160 metra sendiloftnet TF4M haustið 2010. Ljósmynd: TF4M.

TF2JB

 

/by