,

YOTA SUMARBÚÐIR Í KANADA

Ágætu félagar!

Mig langar til að vekja athygli á Youth on the Air Camp (Region 2) sumarbúðunum sem verða haldnar 16.-21. júlí n.k. þar sem krakkar frá norður-, suður- og mið Ameríku virkja kallmerkið VE3YOTA frá búðunum í Ottawa í Kanada.

Þau munu virkja kallmerkið inn á milli vinnustofa eða svefntíma og eru með setta tíma á HF stöðvar   17, 18., 19 og 20. júlí kl. 23:00-02:30 GMT – og um gervitungl 19. júlí kl. 14-17 GMT.

Hægt er að fylgjast með þeim hafa samband við geimfarana í alþjóðlegu geimstöðinni (ISS) og á opnunar- og lokunarhátíð sumarbúðanna á þessari vefslóð: //www.youtube.com/@yotaregion2/streams

Á sömu YouTube rás verða líka sett myndbönd um hvað þau höfðu fyrir stafni yfir daginn.

Með góðri kveðju og 73,

Elín Sigurðardóttir, TF2EQ
Ungmennafulltrúi ÍRA

/by
,

Viðtæki yfir netið að Galtastöðum.

KiwiSDR viðtækið yfir netið með staðsetningu á Galtastöðum í Flóa, var tekið niður í lok júnímánaðar. Georg Kulp, TF3GZ leitar að nýju QTH fyrir viðtækið.

Þakkir til Georgs fyrir að reka KiwiSDR viðtækin yfir netið, en hann er jafnframt eigandi og rekstraraðili KiwiSDR viðtækisins á Raufarhöfn og annars KiwiSDR viðtækjanna á Bjargtöngum.

Það er vaskur hópur félagsmanna sem standa að baki uppsetningu og annast rekstur og viðhald

viðtækja yfir netið. Þeir leggja metnað í að halda þeim gangandi – svo ekki sé talað um tíma

og fjármuni. Þetta eru Ari Þórólfur Jóhannesson TF1A, Georg Kulp TF3GZ, Árni Helgason TF4AH  og Karl Georg Karlsson TF3CZ, auk annarra sem hafa aðstoðað og komið að uppsetningu og viðhaldi.

ÍRA metur þetta framlag mikils og þakkar þessum félagsmönnum fyrir dugnað og elju við að

sinna verkefninu sem er mikilvægt fyrir radíóamatöra sem gera tilraunir í þessum tíðnisviðum,

auk hlustara og allra sem áhuga hafa á útbreiðslu radíóbylgna

Stjórn ÍRA.

/by
,

OPIÐ HÚS Í SKELJANESI 13. JÚLÍ

Mynd úr fundarsal ÍRA í félagsaðstöðunni í Skeljanesi.

Félagsaðstaða ÍRA í Skeljanesi verður opin fimmtudaginn 13. júlí fyrir félagsmenn og gesti og verður opið á milli kl. 20-22.

QSL stjóri verður búinn að tæma pósthóf félagsins og raða innkomnum kortum í hólf félagsmanna. Nýjustu tímarit landsfélaga radíóamatöra í nágrannalöndunum liggja frammi. Kaffiveitingar.

Töluvert liggur frammi af radíódóti, bæði niðri og í fundarsal.

Verið velkomin í Skeljanes!

Stjórn ÍRA.

Töluvert er í boði af radíódóti (á báðum hæðum). Fyrstur kemur, fyrstur fær.
/by
,

TF3W Í IARU HF KEPPNINNI 2023

Skeljanesi 9. júlí. Stöðin QRV á 15 metrum; tæplega 1,5 klst. eftir af keppninni.

Félagsstöðin TF3W var QRV á morsi í IARU HF Championship keppninni helgina 8.-9. júlí. Sigurður R. Jakobsson, TF3CW virkjaði stöðina frá félagsaðstöðunni í Skeljanesi.

Notuð voru þrjú bönd: 20, 15 og 10 metrar og var þetta frumraun á nýju Yagi loftneti félagsins fyrir 18-28 MHz, sem sett var upp í síðustu viku og kom glimrandi vel út.

Heildarfjöldi sambanda var tæplega 1800; nettó fjöldi: 1772. Skipting á milli banda: 20 m. 1100, 15 m. 667 og 10 m. 5 QSO. Fjöldi ITU svæða: 60 og fjöldi HQ stöðva: 35. Viðvera: 13,32 klst. Niðurstaða: 645.430 heildarpunktar.

Sérstakar þakkir til Sigurðar R. Jakobssonar, TF3CW fyrir að virkja stöðina.

Stjórn ÍRA.

Klukkan orðin 12:03 og keppninni lokið. Siggi sagðist ánægður með nýja Yagi loftnetið sem hafi komið mjög vel út.

/by
,

NÝR TURN OG NÝTT YAGI LOFTNET

Nýtt Yagi loftnet fyrir TF3IRA var reist í Skeljanesi þann 2. júlí kl. 15:44. Tengingum og stillingum var lokið í gær, 5. júlí og reyndist standbylgjuhlutfall vera 1.3 eða betra á öllum böndum. Mannvirkið er staðsett í austurhluta portsins í Skeljanesi (við enda gömlu skemmunnar).

Nýja loftnetið er 9 staka Yagi frá OptiBeam, gerð OBDYA9-4, fyrir 17, 15, 12 og 10 metra böndin. Rótor er frá Pro.Sis.Tel, gerð PST2051D. Loftnetið situr í u.þ.b. 11 m. hæð á turni sem Benedikt Sveinsson, TF1T gaf félaginu og Georg Magnússon, TF2LL yfirfór fyrir uppsetningu og smíðaði festingar ásamt  rótorfestingu og frágangi á burðarlegu. Loftnetið er fætt með 1/2“ „hardline“ kóaxkapli frá Andrews sem er um 90 m. að lengd.

Báðir framleiðendur veittu félaginu bestu afsláttarkjör. Nettókostnaður félagssjóðs vegna kaupa á loftneti, balun, rótor og stjórnkassa, „hardline“ kóaxi og stýrikapli nemur 210 þúsund krónum. Þá hafa tekjur af sölu radíódóts félagsins á flóamarkaði 9. október 2022 og 7. maí 2023 verið frádregnar.

Sex félagar báru hitann og þungann af uppsetningu og frágangi í Skeljanesi og fá þeir sérstakar þakkir. Það voru Georg Magnússon TF2LL, Sigurður R. Jakobsson TF3CW, Georg Kulp TF3GZ, Sæmundur E. Þorsteinsson TF3UA, Jónas Bjarnason TF3JB og Þórður Adolfsson, TF3DT sem gaf alla vinnu og kom með vörubíl með krana í tvö skipti, sem reyndist ómetanlegt framlag.

Ennfremur ber að þakka Benedikt Sveinssyni TF3T, Heimi Konráðssyni TF1EIN, Ara Þórólfi Jóhannessyni TF1A, Jóni Guðmundssyni TF3LM og Þorvaldi Bjarnasyni TF3TB fyrir aðstoð í sambandi við verkefnið.

Stjórn ÍRA.

Allt næstum orðið klárt fyrir að hífa. TF3DT búinn að festa tóið og TF3CW og TF2LL festa flutningslínurnar í turninn.
Turninn meir en hálfnaður í lokastöðu.
Nýi turninn var reistur sunnudaginn 2. júlí. Þá var klukkan 15:44.
Að loknu frábæru dagsverki. Sæmundur TF3UA, Georg TF2LL og Sigurður TF3CW. Á myndina vantar Þórð TF3DT, sem var farinn þegar myndin var tekin. Ljósmyndir: TF3JB.
/by
,

World Radio Team Championship 2023

Vegna Covid-19 faraldursins var WRTC 2022 frestað um eitt ár. Leikarnir 2022 verða því haldnir helgina 8.-9. júlí 2023 í borginni Bologna á Ítalíu.

WRTC (World Radiosport Team Championship) er einskonar „heimsmeistarakeppni“ radíóamatöra þar sem lið leyfishafa sem eru skipuð þekktum keppnismönnum koma saman og keppa, hvert við annað, öll frá sömu landfræðilegu staðsetningunni. Keppnin er haldin 4. hvert ár og var fyrsta WRTC keppnin haldin í Seattle í Washington Bandaríkjunum árið 1990.

Strangar reglur gilda um loftnet og búnað. Sérhver keppni er undirbúin og henni stjórnað af svokallaðri „fastanefnd“, sem er skipuð sérhæfðum hópi reyndra leyfishafa (sem hljóta tilnefningu eftir ákveðnum reglum) ásamt fulltrúum þess landsfélags radíóamatöra þar sem keppnin er haldin hverju sinni.

Val á keppendum byggir á þátttöku leyfishafa í einhverjum/öllum 24 tiltekinna alþjóðlegra keppna á tveggja ára undangangandi tímabili. Keppnirnar og þátttaka hefur mismunandi vigt, m.a. eftir keppnisflokkum. Alls keppa 58 tveggja manna lið í WRTC 2022 keppninni árið 2023, sem eru frá Evrópu, N-Ameríku, S-Ameríku, Asíu, Afríku og Eyjaálfu.

Vefslóð: https://wrtc.info/wrtc-2022-competition-rules/
Vefslóð: https://www.wrtc2022.it/en/selection-criteria-7.asp

Öll 63 liðin í WRTC 2022 [árið 2023] eru síðan þátttakendur ásamt radíóamatörum um allan heim í IARU HF Championship keppninni sem fram fer á sama tíma og sömu daga á 3.5, 7, 14, 21 og 28 MHz, SSB og CW.

Vefslóð: http://www.arrl.org/iaru-hf-world-championship

Stjórn ÍRA.

Félagsstöð ÍRA í Skeljanesi mun taka þátt í IARU HF Championship keppninni 8.-9. júlí 2023 á morsi og nota loftnetið sem sést á myndinni, sem er 4 staka OptiBeam net af gerðinni OB4-20OWA.
/by
,

Námskeið til amatörprófs 25. september

Næsta námskeið ÍRA til amatörprófs verður haldið í Háskólanum í Reykjavík 25. september til 7. nóvember n.k. Í boði verður hvorttveggja, staðnám og fjarnám.

Námskeiðið er öllum opið og eru ekki gerðar kröfur um sérstaka menntun eða undirbúning. Kennt verður á mánudögum, þriðjudögum og miðvikudögum kl. 18:30-21:30. Hægt er að mæta í kennslustofu í HR þegar það hentar og/eða taka þátt yfir netið þegar það hentar.

Námskeiðsgjald er kr. 22.500. Miðað er við að greiðsla hafi borist til félagsins fyrir 3. september n.k. Í framhaldi verður námsefni á prenti póstlagt. Greiðsluupplýsingar: http://www.ira.is/skraning-a-namskeid/ Bent á fræðslustyrki stéttarfélaga og Vinnumálastofnunar til þeirra sem sækja námskeiðið.

Sjá meðfylgjandi vefslóðir á skipulag námskeiðsins, samantekt á vefslóðir með námsefni og kynningarefni um amatör radíó og félagið Íslenskir radíóamatörar (ÍRA).

Fyrirspurnum má beina póstfang félagsins: ira@ira.is

Stjórn ÍRA.

Skipulag: https://tinyurl.com/namsk-haust23
Vefslóðir á námsefni: https://tinyurl.com/namsefni-haust23
Kynningarefni: http://www.ira.is/wp-content/uploads/2021/12/Kynning-2022.pdf

/by
,

OPIÐ HÚS Í SKELJANESI FIMMTUDAG 6. JÚLÍ

Félagsaðstaða ÍRA í Skeljanesi verður opin fyrir félagsmenn og gesti fimmtudaginn 6. júlí kl. 20-22.

Mathías Hagvaag, QSL stjóri verður búinn að tæma pósthólfið, flokka kort og raða í hólfin.

Nýjustu tímarit frá landsfélögum radíóamatöra í nágrannalöndunum liggja frammi. Kaffiveitingar.

Verið velkomin í Skeljanesi!

Stjórn ÍRA.

TF3IRA tók þátt í VHF/UHF leikunum um síðustu helgi. Jón Guðmundsson TF3LM virkjaði stöðina sunnudaginn 2. júlí. Mynd: TF3JB.
/by
,

IARU HF CHAMPIONSHIP KEPPNIN 2023

IARU HF Championship keppnin hefst laugardaginn 8. júlí kl. 12 á hádegi. Þetta er sólarhringskeppni sem lýkur á hádegi sunnudaginn 9. júlí. Keppnin fer samtímis fram á SSB og CW. Skilaboð:

Markmiðið er að hafa sambönd við eins margar stöðvar radíóamatöra eins og frekast er unnt um allan heim á 160, 80, 40, 20, 15 og 10 metrum.

Keppnin fer fram samtímis á SSB og CW. Skilaboð: RS(T)+ITU svæði. (TF = ITU svæðis 17).

Keppnisflokkar eru tveir: Einmenningsstöðvar og fleirmenningsstöðvar. Í flokki einmenningsstöðva eru í boði 3 undirflokkar, þ.e. á tali, morsi og hvoru tveggja. Valið er um þátttöku á háafli, lágafli eða QRP. Í flokki fleirmenningsstöðva með einn sendi, er einn flokkur í boði, þ.e. á tali og morsi (Mixed mode).

Með ósk um gott gengi!

Stjórn ÍRA.

http://www.arrl.org/iaru-hf-world-championship

Heimskort yfir ITU svæðin í heiminum. Í IARU HF Championship keppninni þarf að gefa upp ITU svæði (ITU zone). Fyrir TF er ITU svæðið nr. 17 og erum við eina DXCC einingin í því svæði. Höfundur korts: EI8IC
/by
,

VEL HEPPNAÐIR VHF/UHF LEIKAR

Kæru félagar!

Þá eru VHF-UHF leikum 2023 lokið. Þetta var góð skemmtun þar sem gleðin var við völd. Ég þakka öllum sem tóku þátt. Þetta var svooo gaman. Leikjasíðan verður opin í viku, til sunnudagskvölds 9. júlí, svo þátttakendur geti lagað innsláttarvillur í „loggnum“ sínum. Þá munu endanlegar stigatölur liggja fyrir. Úrslitin eru þó ótvíræð og ólíkleg til að breytast.

TF1AM sigrar VHF/UHF leika 2023 örugglega. Hrá stig 174.994 (ef öll sambönd staðfestast). Hann vinnur þetta ekki bara með margföldurum, heldur með mörgum langdrægum samböndum. Hann er með flest stig og flesta margfaldara. Vel gert Andrés!

TF2MSN sigrar í flokki fjölda sambanda. Hann er QSO kóngur VHF/UHF leika 2023 með 215 sambönd. Hann vinnur þetta með því að vera QRV á öllum böndum og vera alltaf að hlusta, alltaf að kalla. Vel gert Óðinn! Sannkallaður QSO þjarkur 😉

TF3EK og TF1JI höfðu lengstu beinu samböndin í leiknum. 223km á bæði 70cm og 2m. Eruð þið ekkert að djóka með þetta ??? Vá!!! TF1AM og TF1JI með næstum 300km á endurvarpa (293km.). Vel gert, það verður varla lengra!!!

6 stöðvar höfðu yfir 100 QSO í leiknum. Heildarfjöldi sambanda í leiknum fóru yfir 700 (skv. tölum þegar þetta er skrifað).

Takk aftur fyrir þátttökuna félagar! Þið eruð flottir radíóamatörar 😏

73 de TF8KY.

P.s.: nokkrar tölur úr kerfinu fylgja hér. Ath. þetta eru alveg glænýjar hráar tölur og eiga eftir að breytast.

/by