Archive for category: Fréttir

ÁRÍÐANDI!

ÍRA hafa borist upplýsingar um sjö tíðnir á HF sem hefur verið teknar til notkunar fyrir neyðarfjarskipti radíóamatöra, eftir að jarðskjálfti 7,8 að stærð reið yfir suðurhluta Tyrklands s.l. nótt.

Staðfest eru yfir 5000 andlát en óttast er að enn fleiri hafi látist, bæði í Tyrklandi og nágrannaríkinu Sýrlandi.

160 metrar: 1.855 MHz
80 metrar: 3.777 MHz.
40 metrar: 7.092 MHz.
20 metrar: 14.270 MHz.
15 metrar: 21.270 MHz.
17. metrar: 18.155 MHz.
10. metrar: 28.540 MHz.

Þess er farið á leit að íslenskir radíóamatörar taki tillit til forgangsfjarskipta á þessum tíðnum (og nærri þeim).

Stjórn ÍRA.

Félagsaðstaða ÍRA í Skeljanesi verður opin fimmtudaginn 9. febrúar frá kl. 20 til 22 fyrir félagsmenn og gesti.

Fundarsalur, fjarskiptaherbergi TF3IRA og QSL stofa á 2. hæð verða opin.

Sending af QSL kortum er væntanleg og mun QSL stjóri vitja kortanna í pósthólf félagsins á miðvikudag og flokka í hólf félagsmanna fyrir fimmtudagskvöld.

Nýjustu tímaritin liggja frammi. Kaffiveitingar.

Verið velkomin í Skeljanes!

Stjórn ÍRA.

Félagsaðstaðan í Skeljanesi var opin fimmtudaginn 2. febrúar. Skemmtilegt kvöld og góðar umræður á báðum hæðum.

Sérstakir gestir okkar voru Erik Finskas, OH2LAK (TF3EY) frá Mankkaa í Espoo í Finnlandi og Albert (Bert) Flower III, N1MXO frá Nantucket í Massachusetts í Bandaríkjunum.

Mikið var rætt um tækin, loftnet og annan búnað. Ennfremur um góð skilyrði á böndunum og um alþjóðlegar keppnir sem fram fóru um nýliðna helgi.

Erik og Benedikt tengdust FlexRadio Systems 6300 stöð Eriks sem sett var upp í fjarskiptaaðstöðu TF3T og TF3SG við Eyrarbakka í síðustu viku. Eins og sjá má á meðfylgjandi myndum voru menn áhugasamir þegar Benedikt var í sambandi við TF2MSN og TF3VE á 80 metrum um 6300 stöðina frá Eyrarbakka yfir netið í félagsaðstöðunni í Skeljanesi.

Ari Þórólfur Jóhannesson, TF1A hafði fært í hús ýmislegt radíódót, m.a. kóaxkapla með N-tengjum, HF og VHF RF magnara (100 og 500W), Yaesu rótora með stýrikössum og margt fleira sem var vinsælt og gekk vel út.

Alls mættu 22 félagar og 3 gestir í Skeljanes þetta ágæta fimmtudagskvöld á miðvetri í léttri rigningu í vesturbænum í Reykjavík.

Stjórn ÍRA.

EUDXCC (Eoropean Contest Club) boðar til 3. alþjóðlegu European Union DX keppninnar 2023.

Keppnin er opin radíóamatörum um allan heim og fer fram á 160, 80, 40, 20, 15 og 10 metrum á tali (SSB) og morsi (CW) helgina 4.-5. febrúar. Hún hefst kl. 12 á hádegi á laugardag og lýkur kl. 12 á hádegi á sunnudag.

Stöðvar í ESB senda: RS(T) + 2 bókstafi og 2 tölustafi (sem tákna land og hérað í ESB).
TF stöðvar senda: RS(T) + ITU svæði (TF er í ITU svæði 17).

Punktagjöf: QSO við stöðvar í löndum ESB=10; QSO innan TF= 2; QSO við stöðvar í öðrum löndum í Evrópu= 3; og sambönd við stöðvar í öðrum löndum heimsins=5 punktar.

Margfaldarar: Fyrir hvert samband við stöð í ESB á hverju bandi = 1.
Fyrir hvert samband við stöð á DXCC/WAE listum + IG9/IH9 á hverju bandi = 1.

Ath. að skoða í reglunum kóða fyrir stöðvar í löndum sem tengjast ESB löndunum Danmörku, Frakklandi og Hollandi, t.d. DK06 fyrir Færeyjar og Grænland;  FR20 fyrir Frönsku Polynesíu og NL13 fyrir Aruba, o.fl.  Frestur til að skila keppnisgögnum er til kl. 12 á hádegi 12. febrúar.

Með ósk um gott gengi!

Stjórn ÍRA.

Keppnisreglur: https://www.eudx-contest.com/rules/

Ágæti félagsmaður!

Með tilvísan til 17. gr. félagslaga, er hér með boðað til aðalfundar ÍRA sunnudaginn 19. febrúar 2023.

Fundurinn verður haldinn í safnaðarheimili Neskirkju við Hagatorg í Reykjavík og hefst stundvíslega kl. 14:00.

Dagskrá er samkvæmt 19. gr. félagslaga.

Reykjavík 27. janúar 2023,
fyrir hönd stjórnar ÍRA,

Jónas Bjarnason, TF3JB,
formaður