Opið hús verður í félagsaðstöðu ÍRA í Skeljanesi fimmtudaginn 28. apríl kl. 20-22 fyrir félagsmenn og gesti.
Góður félagsskapur og nýjustu amatörtímaritin. QSL stjóri verður búinn að fara í pósthólfið og flokka kortasendingar. Kaffi og meðlæti.
Verið velkomin í Skeljanes!
Stjórn ÍRA.
KiwiSDR viðtækið á Galtastöðum í Flóa var uppfært í gær (23. apríl). Yfirleitt er um að ræða sjálfvirkar hugbúnaðaruppfærslur, en Ari Þórólfur Jóhannesson, TF1A sagði að leita hafi þurft til framleiðandans með aðstoð sem gekk vel og viðtakan sé nú betri. Öll viðtækin fjögur yfir netið eru nú í góðu lagi.
Bjargtangar (10 kHz-30 MHz): http://bjarg.utvarp.com/
Galtastaðir í Flóa (10 kHz-30 MHz): http://floi.utvarp.com/
Perlan í Reykjavík (24 MHz til 1800 MHz): http://perlan.utvarp.com
Raufarhöfn (10 kHz-30 MHz): http://raufarhofn.utvarp.com/
Þakkir til Ara Þórólfs Jóhannessonar, TF1A.
Stjórn ÍRA.
Veðrið framan af árinu 2022 var ekki alltaf heppilegt til loftnetavinnu þegar tími gafst á frídögum eða um helgar. En á sumardaginn fyrsta, 21. apríl mætti Georg Kulp, TF3GZ í Skeljanes og gekk endanlega frá endafæddu hálfbylgjuloftneti félagsstöðvarinnar fyrir 160 metra bandið.
Hann hafði flutt 6 metra langt vatnsrör á staðinn 28. nóvember (2021) og þann dag og 4. desember fór tími í að eigintíðnistilla loftnetið og var loftnetsvírinn festur í 4 metra hátt vatnsrör. Þegar þeirri vinnu var lokið þurfti frá að hverfa (4. desember) vegna þess að myrkur var að skella á.
Aðstæður voru hins vegar ákjósanlegar 21. apríl, logn og 10°C hiti þegar hafist var handa og kom Georg fyrir 6 metra rörinu með áfastri talíu til að hægt verði að slaka vírnum niður ef aðstæður kalla á. Þar með er verkefnið í höfn. Sérstakar þakkir til Georgs Kulp, TF3GZ fyrir frábært vinnuframlag.
Félagsaðstaða ÍRA í Skeljanesi verður lokuð fimmtudaginn 21. apríl sem er sumardagurinn fyrsti.
Næsti opnunardagur er fimmtudagur 28. apríl.
Bestu óskir til félagsmanna og fjölskyldna þeirra um gleðilegt sumar!
Stjórn ÍRA.
Drifið var í að mála trévegginn við innganginn í Skeljanesi þar sem kallmerki félagsstöðvarinnar er fest (sbr. ljósmynd) í dag, 18. apríl enda vorveður í lofti, logn og 9°C hiti.
Baldvin Þórarinsson, TF3-Ø33 átti ekki heimangengt, en var með í ráðum þegar 2 hressir félagar mættu á staðinn eftir hádegið og unnu gott verk, sbr. meðfylgjandi ljósmyndir. Bestu þakkir til viðkomandi.
Stjórn ÍRA.
Páskaleikum ÍRA 2022 lauk á páskadag kl. 18:00. Þátttaka var góð, en alls var 21 kallmerki skráð til leiks og 18 hafa sent inn dagbókarupplýsingar þegar þetta er skrifað.
Kerfið verður opið til að gera leiðréttingar til miðnættis sunnudaginn 24. apríl n.k. Eftir það munu endanlegar niðurstöður liggja fyrir.
Þakkir til Hrafnkels Sigurðssonar, TF8KY, umsjónarmanns Páskaleikanna fyrir vel heppnaðan viðburð, frábæran gagnagrunn og framúrskarandi gott utanumhald.
Stjórn ÍRA.
Alþjóðadagur radíóamatöra er 18. apríl. Þann dag árið 1925 voru alþjóðasamtök landsfélaga radíóamatöra – International Amateur Radio Union, IARU – stofnuð, fyrir 97 árum. Aðildarfélög voru í upphafi 25, en eru í dag 174 talsins í jafn mörgum þjóðlöndum heims með nær 5 milljónir leyfishafa.
Sérstakt kallmerki ÍRA, TF3WARD, verður virkjað á alþjóðadaginn. Viðskeytið stendur fyrir „World Amateur Radio Day“.
Hamingjuóskir til íslenskra radíóamatöra!
Stjórn ÍRA.
.
KiwiSDR viðtækið á Raufarhöfn komst í lag í gær (16. apríl) og vinnur nú eðlilega. Bestu þakkir til Rögnvalds Helgasonar, TF3-055 sem vann verkið í samráði við Georg Kulp, TF3GZ. Hin viðtækin þrjú yfir netið eru einnig í góðu lagi.
Bjargtangar (10 kHz-30 MHz): http://bjarg.utvarp.com/
Galtastaðir í Flóa (10 kHz-30 MHz): http://floi.utvarp.com/
Perlan í Reykjavík (24 MHz til 1800 MHz): http://perlan.utvarp.com
Raufarhöfn (10 kHz-30 MHz): http://raufarhofn.utvarp.com/
Það er vaskur hópur manna sem leggja metnað í að halda viðtækjum yfir netið í gangi (svo ekki sé talað um tíma og fjármuni). Þetta eru þeir Ari Þórólfur Jóhannesson TF1A, Georg Kulp TF3GZ, Karl Georg Karlsson TF3CZ, Árni Helgason TF4AH (Patreksfirði) og Rögnvaldur Helgason TF3-Ø55 (Raufarhöfn).
Félagið metur þetta framlag mikils og þakkar þessum félagsmönnum fyrir dugnað og elju við að sinna verkefninu. Tilkoma þessara tækja er mikilvæg fyrir radíóamatöra sem gera tilraunir í þessum tíðnisviðum, auk hlustara og allra sem hafa áhuga á útbreiðslu radíóbylgna.
Stjórn ÍRA.
Páskaleikarnir hófust í gær, 15. apríl kl. 18 og standa yfir þar til á morgun sunnudag, kl. 18:00.
Félagsstöðin TF3IRA var QRV laugardaginn 16. apríl frá kl. 10 f.h. til kl. 16 síðdegis. Á þessum tíma voru höfð alls 41 samband á 144 MHz (FM og SSB), 433 MHz (FM og SSB) 50 MHz (SSB), 70 MHz (SSB) og 3.6 MHz (SSB og CW).
Opið hús var á sama tíma í Skeljanesi og mættu 12 félagar og 2 gestir í hús og þáðu kaffi og veitingar. Margir voru áhugasamir um að skoða nýju ICOM IC-9700 „All Mode“ stöðina sem félagið hafði að láni. En stöðin er 100/75/10W á 2M/70CM/23CM.
Alls voru 18 TF kallmerki skráð í Páskaleikana síðdegis í dag, laugardag – en í boði er vandaður „on-line“ leikjavefur TF8KY og er hægt að skrá sig inn þangað til leikurinn endar. Slóð: http://leikar.ira.is/paskar2022
Stjórn ÍRA.
Stjórn ÍRA óskar félagsmönnum og fjölskyldum þeirra gleðilegrar páskahátíðar.
Athygli er vakin á páskaleikum félagsins sem hefjast á morgun, föstudag kl. 18 og lýkur á sama tíma á sunnudag.
Hægt er að skrá sig allan tímann sem leikarnir standa yfir. Vefslóð: http://leikar.ira.is/paskar2022/
Stjórn ÍRA.
