Archive for category: Fréttir

Opið hús var í félagsaðstöðu ÍRA í Skeljanesi fimmtudaginn 11. nóvember. Sérstakur gestur var Baldur Sigurðsson, TF6-009 félagsmaður okkar á Reyðarfirði (áður Egilsstöðum).

Mikið var rætt um loftnet, þ.á.m. dípóla og balun, vertíkala og Yagi lofnet. Einnig rætt um deltur sem geta verið spennandi lausn fyrir marga og m.a. vísað í fróðlega grein TF3KB sem birtist í næst síðasta hefti CQ TF (3. tbl. 2021).

Rætt um skilyrðin, en um helgina er síðasta stóra RTTY keppni ársins (WAE) á HF. Að mörgu leyti mjög áhugaverð keppni og vinsæl. Margir eru ánægðir með að 80 metrarnir eru lægsta band í keppninni því fæstir sem búa í þéttbýli hafa tök á að setja upp vel nothæft DX loftnet á því bandi.

Góð mæting var miðað við hve Covid-19 faraldurinn er að ná sér á strik, en 12 félagar komu í Skeljanes þetta frostmilda fimmtudagskvöld í vesturbænum í Reykjavík.

Stjórn ÍRA.

Vefslóð á 3. tbl. CQ TF 2021: http://www.ira.is/wp-content/uploads/2021/07/CQTF2021-3.pdf

Opið hús verður í félagsaðstöðu ÍRA í Skeljanesi fimmtudaginn 11. nóvember fyrir félagsmenn og gesti kl. 20-22. Fjarskiptaherbergi TF3IRA og QSL stofa á 2. hæð verða opin.

Kaffiveitingar verða í fundarsal og nýjustu tímaritin liggja frammi. QSL stjóri verður búinn að flokka nýjustu kortasendingarnar.

Til stendur að prófa að koma á sambandi frá Skeljanesi gegnum samskiptaforrit fyrir þá sem ekki eiga heimangengt eða búa úti á landi. Nánari upplýsingar fljótlega.

Vegna Covid-19 er þess farið á leit, að félagar sem hafa hug á að mæta í Skeljanes fresti því ef þeir kenna lasleika af einhverju tagi, af virðingu við aðra.

Verið velkomin í Skeljanes!

Stjórn ÍRA.

Ein af stóru RTTY keppnum ársins  er Worked All Europe (WAE) keppnin. Hún verður haldin helgina 13.-14. nóvember. Þetta er 48 klst. keppni, en þátttaka er leyfð samanlagt í mest 36 klst.

Í RTTY hlutanum gilda þær sérreglur, að er öllum heimilt að samband við alla. Það þýðir að sambönd á milli þátttakenda innan Evrópu eru heimil. QTC viðskipti verða hins vegar að eiga sér stað á milli stöðva á ólíkum meginlöndum.

Sambönd við hverja nýja WAE einingu (e.WAE entity) gilda sem margfaldarar, auk sambanda við hvert nýtt kallsvæði W, VE, VK, ZL, ZS, JA, BY, PY og RA8/RA9 og RAØ. Sjá nánar reglur. Til skýringar: WAE listi keppninnar samanstendur af fleiri einingum en DXCC. Skýringar eru í keppnisreglum.

Margfaldarar hafa aukið vægi eftir böndum; á 80 metrum fjórir, á 7 MHz þrír og á 14/21/28 MHz tveir. Það er DARC, landsfélag radíóamatöra í Þýskalandi sem heldur keppnina.

Með ósk um gott gengi!

Stjórn ÍRA.

Keppnisreglur: https://www.darc.de/der-club/referate/conteste/wae-dx-contest/en/wae-rules/

Alls eru fjögur viðtæki yfir netið í boði hér á landi. Þrjú KiwiSDR viðtæki þekja tíðnisviðið frá 10 kHz til 30 MHz. Þau eru staðsett í Bláfjöllum, á Bjargtöngum og á Raufarhöfn. Fjórða viðtækið yfir netið er staðsett í Perlunni í Öskuhlíð í Reykjavík. Það er Airspy R2 SDR viðtæki fyrir 24-1800 MHz. Vefslóðir á viðtækin fjögur sem í dag eru virk yfir netið:

Bláfjöll: http://bla.utvarp.com:8080/
Bjargtangar: http://bjarg.utvarp.com
Raufarhöfn: http://raufarhofn.utvarp.com
Perlan: http://perlan.utvarp.com

Í nýliðnum októbermánuði var nokkuð um bilanir í búnaði tækjanna en það er vaskur hópur manna sem leggja metnað í að halda þeim í gangi (svo ekki sé talað um tíma og fjármuni). Þetta eru þeir Ari Þórólfur Jóhannesson TF1A, Georg Kulp TF3GZ, Karl Georg Karlsson TF3CZ, Árni Helgason TF4AH (Patreksfirði) og Rögnvaldur Helgason TF3-Ø55 (Raufarhöfn).

Félagið metur þetta framlag mikils og þakkar þessum félagsmönnum fyrir dugnað og elju við að sinna verkefninu sem er mikilvægt fyrir radíóamatöra sem gera tilraunir í þessum tíðnisviðum, auk hlustara og allra sem áhuga hafa á útbreiðslu radíóbylgna.

Stjórn ÍRA.

Góð mæting var í félagsaðstöðuna í Skeljanesi fimmtudagskvöldið 28. október. Skemmtilegar umræður og menn hressir, enda CQ WW DX SSB keppnin framundan um helgina. Samt (eins og alltaf) eru vissar áhyggjur af skilyrðunum í keppninni.

Því til viðbótar var var rætt um áhugamálið á báðum hæðum; í salnum, í fjarskiptaherberginu og í herbergi QSL stofunnar en jafnt og þétt hefur borist af QSL kortum undanfarið og fengu sumir ágætan slatta.

Rætt var um loftnet, loftnetaefni, fæðilínur og mismunandi aðferðir við fæðingu loftneta. Einnig rætt um VHF/UHF stöðvar, en áhugaverðar nýjungar eru á þeim markaði þennan veturinni, þ.á.m. ný 50W Yaesu FTM-6000 bílstöð.  

Alls mættu 19 félagar + 1 gestur í Skeljanes þetta veðurmilda vetrarkvöld í vesturbænum í Reykjavík.