Fréttir – Page 80 – Íslenskir Radíóamatörar

OPIÐ HÚS Í SKELJANESI 16. SEPTEMBER

Opið hús verður í félagsaðstöðu ÍRA í Skeljanesi fimmtudaginn 16. september fyrir félagsmenn og gesti frá kl. 20:00.

Fjarskiptaherbergi TF3IRA og QSL stofa á 2. hæð verða opin. Innkomin QSL kort hafa verið flokkuð í hólf félagsmanna. Kaffi og meðlæti verður í fundarsal. Nýjustu tímaritin liggja frammi.

Vegna Covid-19 er þess farið á leit, að félagar sem hafa hug á að mæta í Skeljanes fresti því ef þeir kenna lasleika af einhverju tagi, af virðingu við aðra.

Verið velkomin í Skeljanes!

Stjórn ÍRA.

.

Myndin er af PC borðum sem TF3FG færði okkur síðasta fimmtudag. M.a. 7400 rásir í sökklum, Eprom, OPmagnarar og fleira áhugavert.

*Nýjustu tímaritin frá landsfélögum radíóamatöra liggja frammi í fundarsal á 1. hæð.*

*Radíódótið hefur verið fært til í salnum og er aðgengilegra í austurhluta húsnæðisins á 1. hæð. Ljósmyndir: TF3jB.*

12. September, 2021/by TF3JB

Almennt, Fréttir

GÓÐ MÆTING Í SKELJANES

Góð mæting var í Skeljanes fimmtudaginn 9. september. Sérstakur gestur okkar var Ralf Doerendahl, HB9GKR sem er búsettur í Aarau skammt frá Zürich í Sviss. Hann er hér á landi í 9. skipti.

Hann mætti í félagsaðstöðuna ásamt Yngva Harðarsyni, TF3Y en þeir hafa m.a. virkjað saman fjallatinda. Ralf er mikill áhugamaður um SOTA (Summits On The Air) verkefnið og hefur verið QRV frá mörgum löndum, m.a. einnig frá Færeyjum. Hann notar Elecraft KX-3 sendi-/móttökustöð og stangarloftnet (sbr. ljósmyndina sem Yngvi tók í Bláfjöllum í fyrra).

SOTA snýst um að fara á fjöll með fjarskiptatæki og búnað og hafa sambönd við aðra leyfishafa á amatörböndunum. Fjallatindar eru skilgreindir sérstaklega í hverju landi og hérlendis eru þeir alls 910.

Skemmtilegar umræður voru í félagsaðstöðunni yfir kaffinu, m.a. um SOTA málefni, mismunandi loftnet og búnað. Þá færði Hans Konrad Kristjánsson, TF3FG okkur radíódót sem verður í boði til félagsmanna frá næsta opnunarkvöldi. Alls mættu 17 félagar + 1 gestur í Skeljanes þetta ágæta haustkvöld í vesturbænum í Reykjavík.

*Ralf HB9GKR náði m.a. sambandi við leyfishafa heima í Sviss frá félagsstöðinni TF3IRA. Yngvi TF3Y fylgist með. Mynd: TF3JB.*

*Jónas TF3JB og Ralf HB9GKR á góðri stundu í félagsaðstöðunni í Skeljanesi. Ljósmynd: TF3Y.*

10. September, 2021/by TF3JB

Almennt, Fréttir

AFMÆLISGJÖF TIL ÍRA

Oddur Helgason framkvæmdastjóri ORG – Ættfræðiþjónustunnar ehf., afhenti Jónasi Bjarnasyni, TF3JB formanni ÍRA listaverk að gjöf til félagsins þann 31. ágúst í Skeljanesi. Gjöfin er í tilefni 75 ára afmælis félagsins þann 14. ágúst s.l.

Verkið ber nafnið „Bylgjur“ og er eftir listamanninn Lúkas Kárason. Það er unnið úr rekaviði af Ströndum. Oddur sagði, að þeim Reyni hafi fundist verkið passa svo vel við starfsemi radíóamatöra sem væru jú alltaf að fást við radíóbylgjur. Jónas þakkaði Oddi góð orð og sagðist taka við gjöfinni fyrir hönd félagsins með ánægju og þakkaði góðan hug þeirra félaga til ÍRA.

Listamaðurinn starfaði framan af við þróunarhjálp en tók síðari árin til við útskurð úr rekaviði. Hann hélt sýningar á verkum sínum víða um land. Lúkas lést þann 23. mars 2020.

*Oddur Helgason framkvæmdastjóri ORG – Ættfræðiþjónustunnar ehf., á skrifstofu sinni í Skeljanesi.*

*Reynir Björnsson TF3JL meðeigandi ORG – Ættfræðiþjónustunnar ehf., á skrifstofu sinni í Skeljanesi. Ljósmyndir: TF3JB.*

8. September, 2021/by TF3JB

Almennt, Fréttir

NÁMSKEIÐ HEFST Í OKTÓBER

Næsta námskeið ÍRA til amatörleyfis hefst í október og lýkur með prófi Fjarskiptastofu í desember.

Námskeiðið verður í fjarnámi, þ.e. haldið yfir netið og kennt í gegnum tölvu (eða snjalltæki) þar sem leiðbeinandi og þátttakandi „hittast“ í rafrænni kennslustund gegnum eigin búnað.

Kennd verður raffræði, radíótækni, reglugerð og radíóviðskipti. Námskeiðið fer fram þrjá daga í viku, mánudaga, þriðjudaga og miðvikudaga kl. 18:30-21:30.

Til skoðunar er að bjóða próf samtímis á þremur stöðum á landinu, í Hafnarfirði, á Akureyri og á Egilsstöðum.

Nánari upplýsingar verða kynntar hér í næstu viku.

Til grundvallar er reglugerð um starfsemi radíóáhugamanna nr. 348/2004 með síðari breytingum. Vefslóð: https://www.reglugerd.is/reglugerdir/eftir-raduneytum/samgonguraduneyti/nr/3732

*Mynd úr prófi til amatörleyfis í félagsaðstöðu ÍRA í Reykjavík. Ljósmynd: TF3JB.*

7. September, 2021/by TF3JB

Almennt, Fréttir

VÍSBENDING UM VIRKNI

Teknar voru saman upplýsingar um TF kallmerki sem fengu skráningu á þyrpingu (e. cluster) vikuna 28. ágúst til 5. september 2021. Samskonar samantektir voru gerðar í janúar, febrúar, apríl, maí og júní á þessu ári.

Alls fengu 11 íslenskir radíóamatörar skráningu að þessu sinni. Flestir voru QRV á stafrænum mótunum (FT8 og FT4), en einnig á morsi (CW), tali (SSB) og RTTY á 15, 17, 20, 30, 40 og 60 metrum.

Upplýsingarnar eru fengnar á http://www.dxsummit.fi/#/ Sambærilegar síður eru í boði á netinu til samanburðar. Fyrst er skráð kallmerki, þá tegund/-ir útgeislunar og band/bönd:

TF1EIN FT8 á 60 metrum.
TF1OL/P FT4, FT8 á 20 metrum.
TF2MSN FT4 á 20 metrum.
TF3AO RTTY á 20 metrum.
TF3JB FT8 á 30 metrum.
TF3MH FT8 á 17 metrum.
TF3PPN FT4, FT8 á 17 og 20 metrum
TF3VG FT8 á 60 metrum.
TF3VS FT8 á 17, 30 og 40 metrum.
TF5B FT8 á 15 og 17 metrum.
TF6JZ CW og SSB á 20 metrum.

Til skoðunar er að taka reglulega saman upplýsingar af þessu tagi.

*Jóhannes Zoëga TF6JZ var virkur á tímabilinu á morsi og tali. Myndin er af fjarskiptaaðstöðu hans á Neskaupsstað. Ljósmynd: TF6JZ.*

6. September, 2021/by TF3JB

Almennt, Fréttir

WORKED ALL EUROPE KEPPNIN Á SSB

Ein af stóru keppnum ársins er Worked All Europe (WAE) keppnin. SSB hlutinn verður haldinn helgina 11.-12. september. Þetta er 48 klst. keppni, en þátttaka er leyfð samanlagt í mest 36 klst.

Markmiðið er að hafa sambönd við stöðvar utan Evrópu, þ.e. sambönd innan Evrópu gilda ekki í keppninni. Skilaboð: RS+raðnúmer. QTC skilaboð gefa punkta aukalega.

Sambönd við hverja nýja DXCC einingu (e. entity) gilda sem margfaldarar, auk sambanda við hvert nýtt kallsvæði í Bandaríkjunum, Kanada, Ástralíu, Nýja Sjálandi, Suður-Afríku, Japan og Brasilíu, auk kallsvæðanna RA8 og RA9.

Margfaldarar hafa aukið vægi eftir böndum; á 80 metrum fjórir, á 7 MHz þrír og á 14/21/28 MHz tveir.

WAE er haldin á vegum landsfélags radíóamatöra í Þýskalandi.

Vefslóð á keppnisreglur: https://www.darc.de/der-club/referate/referat-conteste/worked-all-europe-dx-contest/en/

Með ósk um gott gengi!

Stjórn ÍRA.

6. September, 2021/by TF3JB

Almennt, Fréttir

GÓÐ MÆTING Í SKELJANES 2. SEPTEMBER

Góð mæting var í félagsaðstöðuna í Skeljanesi fimmtudaginn 2. september. Sérstakur gestur okkar var Peter Ens, HB9RYV, sem er búsettur í Sursee skammt frá Lucerne í Sviss.

Hann er staddur hér á landi um þessar mundir og mætti í félagsaðstöðuna ásamt Yngva Harðarsyni, TF3Y. Peter er mikill áhugamaður um SOTA (Summits On The Air) verkefnið. Málið snýst um að fara á fjöll með fjarskiptatæki og búnað og hafa sambönd við aðra leyfishafa á amatörböndunum. Fjallatindar eru skilgreindir sérstaklega í hverju landi og hérlendis eru þeir alls 910.

Í ár (2021) var hann þegar búinn að virkja Eldfell, Dalsfjall og Heimaklett í Vestmannaeyjum. Í fyrra (2020) virkjaði hann m.a. Drangshlíðarfjall, Sandkúlur, Heiðarfjall, Fagradalsfjöll, Sönghofsfjall og Stafdalsfell. Árið 2017 virkjaði hann m.a. Stafdalsfell, Pétursey, Hatta, Búrfell (í Mýrdal), Skálafell, Kirkjufell (í Eyrarsveit) og Heklu.

Ólafur Örn Ólafsson, TF1OL færði okkur 3 staka Yagi loftnet fyrir 2 metra bandið sem verður í boði til félagsmanna frá næsta opnunarkvöldi. Alls mættu 14 félagar+1 gestur þetta ágæta haustkvöld í vesturbænum í Reykjavík.

*Skeljanesi 2. september. Peter Ens HB9RYV og Kristján Bendiktsson TF3KB ræða málin með kaffibolla í hendi. Ljósmynd: TF3Y.*

Ólafur Örn Ólafsson TF1OL færði í hús 2. september þetta 3 staka Yagi loftnet fyrir 2 metra bandið. Ljósmynd: TF3JB.

3. September, 2021/by TF3JB

Almennt, Fréttir

ALL ASIAN SSB DX KEPPNIN 2021

62. All Asian DX keppnin – SSB hluti, verður haldin helgina 4.-5. september.

Keppnin fer fram á 160, 80, 40, 20, 15 og 10 metrum. Skilaboð í keppninni eru RS+aldur. Ef þátttakandi er t.d. 39 ára eru skilaboðin: 5939 o.s.frv.

Flestir QSO punktar eru fyrir sambönd á lægri böndum en margfaldarar ráðast af fjölda stöðva sem haft er sambönd við á meginlandi Asíu (alls 44 einingar; sami listi og er notaður í CQ WPX keppnum).

Sjá keppnisreglur á þessari vefslóð: https://www.jarl.org/English/4_Library/A-4-3_Contests/2021AA_rule.htm

JARL, landsfélag radíóamatöra í Japan stendur fyrir keppninni.

Með ósk um gott gengi!

Stjórn ÍRA.

.

Sýnishornið af viðurkenningu í keppninni er fengið að láni frá SX2IMA.

1. September, 2021/by TF3JB

Almennt, Fréttir

FÉLAGSAÐSTAÐAN OPIN 2. SEPTEMBER

Opið hús verður í félagsaðstöðu ÍRA í Skeljanesi fimmtudaginn 2. september fyrir félagsmenn og gesti frá kl. 20:00.

Fjarskiptaherbergi TF3IRA og QSL stofa á 2. hæð verða opin. QSL kort eru tekin að berast aftur og hafa verið flokkuð í hólf félagsmanna. Kaffi og meðlæti verður í fundarsal. Nýjustu tímaritin liggja frammi.

Vegna Covid-19 er þess farið á leit, að félagar sem hafa hug á að mæta í Skeljanes fresti því ef þeir kenna lasleika af einhverju tagi, af virðingu við aðra.

Verið velkomin í Skeljanes!

Stjórn ÍRA.

.

Leitað var til ráðgefandi opinberra aðila í tilefni nýrrar reglugerðar um samkomutakmarkanir vegna kórónaveirufaraldurs. Niðurstaða er að okkur er heimilt að bjóða upp á kaffiveitingar, enda sé búnaður til að sótthreinsa hendur áður en áhöld eru notuð. Gæta beri að 1 metra nálægðarreglu og góðri loftræstingu. Fram kom ennfremur, að jákvætt er talið að nota andlitsgrímur.