,

VEL HEPPNAÐIR PÁSKALEIKAR

Páskaleikum ÍRA 2021 lauk í gærkvöldi (páskadag) kl. 18:00. Næstbesta þátttaka frá upphafi; 24 kallmerki voru skráð og 20 hafa sent dagbókarupplýsingar inn í gagnagrunn leikanna m.v. 5. apríl. Hrafnkell Sigurðsson, TF8KY, umsjónarmaður, hélt vel utan um viðburðinn og uppfærður gagnagrunnur stóð undir væntingum.

Vel heppnuð viðbót þetta árið var innsetning endurvarpanna sem og ný tímasetning, frá kl. 18 á föstudag til kl. 18 á sunnudag, auk þess sem þátttakendur geta sótt adif skrá í gagnagrunninn sem hægt er að hlaða inn í flest rafræn dagbókarforrit.

Kerfið verður opið til að gera leiðréttingar til miðnættis sunnudaginn 11. apríl n.k. Þannig að eftir það munu endanlegar niðurstöður liggja fyrir. Óhætt er að fullyrða, að röð leyfishafa í fyrstu þremur sætunum mun þó haldast óbreytt:

1. sæti. Ólafur Örn Ólafsson, TF1OL (169.125 heildarstig).*
2. sæti. Hrafnkell Sigurðsson, TF8KY (86.800 heildarstig).*
3. sæti. Óðinn Þór Hallgrímsson, TF2MSN (71.072 heildarstig).*
(*Fyrirvari er gerður um endanlegan fjölda heildarstiga sem kann að breytast).

Þakkir til Hrafnkels Sigurðssonar, TF8KY, umsjónarmanns Páskaleikanna fyrir vel heppnaðan viðburð, frábæran gagnagrunn og framúrskarandi gott utanumhald.

Hamingjuóskir til TF1OL, TF8KY og TF2MSN fyrir verðskuldaðan árangur sem og til félagsmanna fyrir framúrskarandi góða þátttöku.

Stjórn ÍRA.

Ljósmynd af opnunarsíðu gagnagrunns Páskaleikanna 5. apríl 2021. Ljósmynd: TF3JB.
/by
,

CQ WW WPX SSB KEPPNIN 2021

CQ World Wide WPX SSB keppnin fór fram 27.-28. mars s.l. Fjórar TF stöðvar skiluðu gögnum í jafn mörgum keppnisflokkum, auk samanburðardagbókar (check-log).

Bráðabirgðaniðurstöður (e. raw scores) liggja fyrir frá keppnisnefnd samkvæmt áætlaðri stöðu í viðkomandi keppnisflokki yfir heiminn (H) og yfir Evrópu (EU). Endanlegar niðurstöður verða birtar í júníhefti CQ tímaritsins 2021.

TF2MSN 61,348 heildarstig; einm.flokkur, öll bönd, lágafl – 782/H; 479/EU.
TF3AO 24,656 heildarstig; einm.flokkur, 20 metrar, háafl – 180/H; 108/EU.
TF3T 27,048 heildarstig; einm.flokkur, 40 metrar, háafl – 106/H; 63/EU.
TF8KY 74,496 heildarstig; einm.flokkur, öll bönd, háafl – 983/H; 442/EU.
TF3JB samanburðardagbók (e. check-log).

Hamingjuóskir til viðkomandi.

Stjórn ÍRA.

https://www.cqwpx.com/rawcall.htm?mode=ph

/by
,

RITSTJÓRI KALLAR EFTIR EFNI

Við upphaf nýs starfsárs (mars 2021 til mars 2022) vil ég byrja á að þakka félagsmönnum fyrir allt það frábæra efni sem sent var inn á síðasta tímabili.

Líkt og á síðasta starfsári eru 4 tölublöð framundan, þ.e. í apríl, júlí, október og janúar (2022) og hlakka ég til áframhaldandi samvinnu við ykkur.

Næsta tölublað CQ TF, 2. hefti 2021 kemur út sunnudaginn 25. apríl n.k.

Allt efni um áhugamálið er vel þegið í blaðið, s.s. frásagnir, ljósmyndir, eða jafnvel aðeins punktar og ábendingar um efni sem vinna má úr.

Skilafrestur er til 14. apríl n.k.

Netfang ritstjóra: tf3sb@ox.is

Páskakveðjur og 73,
TF3SB, ritstjóri CQ TF.

Myndin er af þremur síðustu tölublöðum CQ TF. Frá vinstri: 1. tbl. 2021 (kom út 27. janúar 2021); 4. tbl. 2020 (frá september 2020) og 3. tbl. 2020 (frá júní 2020). Hvert tölublað var yfir 50 blaðsíður að stærð. Ljósmynd: TF3JB.

/by
,

PÁSKALEIKAR 2021, FJARSKIPTADAGBÓK

Fyrir þá sem ekki færa sambönd í páskaleikunum beint inn í tölvu er ágætt að nota fyrirframprentuð dagbókareyðublöð.

Meðfylgjandi er mynd af dagbókareyðublaði fyrir félagsstöðina TF3IRA. Eyðublaðið var sett upp í Word forriti en allt eins má nota Excel, aðra töflureikna eða önnur ritvinnsluforrit.

Eyðublaðið er kynnt hér til upplýsingar ef einhvern vantar fyrirmynd.

Sambönd í Páskaleikunum 2021 frá TF3IRA verða færð inn á dagbókareyðublöð og síðan slegin inn í gagnagrunn leikana á netinu. Það hefur sýnt sig undanfarin ár að mjög er til þæginda að forprenta QSO númer og reitanúmer, auk þess sem villur verða færri.

/by
,

PÁSKAKVEÐJUR FRÁ ÍRA

Stjórn ÍRA óskar félagsmönnum gleðilegrar páskahátíðar.

Við vonum að þessir dagar bjóði upp á góðar stundir í faðmi fjölskyldunnar við þær óvenjulegu aðstæður sem nú ríkja í samfélaginu.

Athygli er vakin á páskaleikum félagsins sem hefjast föstudag kl. 18 og lýkur á sama tíma á sunnudag.  

Hægt er að skrá sig allan tímann sem leikarnir standa yfir. Vefslóð: http://leikar.ira.is/paskar2021/

Stjórn ÍRA.

/by
,

PÁSKALEIKAR ÍRA 2021 NÁLGAST

Kæru félagar!

Nú er komið að því sem allir hafa verið að bíða eftir.  Það eru að koma páskar.  Það þýðir bara eitt…PÁSKALEIKAR. Þetta verður hrikalega gaman. Allir upp með græjurnar, upp á heiðar, fjöll og út í eyjar…eða bara láta fara vel um sig heima í „sjakknum“. Frábært tækifæri til að prófa nýja dótið, eða gamla dótið. Það besta er, það þarf ekki að vera með rándýrar græjur. Einföld handstöð frá Kína er allt sem þarf til að vera með. Það þarf ekkert endilega að vera „all-in“ alla helgina.  Endilega hoppa inn á tíðnirnar þegar tími gefst. Það getur bara verið gaman.

NÝJUNG!  Getum notað endurvarpa! Endurvarpar koma sem sér band í leikinn.  Þetta á eftir að auka möguleika hand-stöðva, örva notkun endurvarpa og við lærum betur á útbreiðslu þeirra. Gerum þetta með stæl, sýnum á FB hvað við erum virkir amatörar. Allir “grobbpóstar” kærkomnir.

Eins og venjulega verður “online” leikjavefur þar sem þátttakendur skrá sig til leiks.  Hægt verður að skrá sig inn í leikinn allan tímann þar til leikurinn endar. Slóðin á leikjavefinn er http://leikar.ira.is/paskar2021

Endilega kíkið á vefinn, lesið leiðbeiningar og skráið ykkur til leiks. Þetta er auðveldara en menn gætu haldið. ATH ATH ATH! Breyttur tími. Blásið verður til leiks kl. 18 föstudag 2. apríl og leikurinn stendur til kl. 18 sunnudag 4. apríl.

Hittumst í loftinu….23cm, 70cm, 2m, 4m, 6m, 80m og síðast en ekki síst, endurvarpar! 73 de TF8KY.

Myndin er af opnunarsíðu leikjavefjar Páskaleikanna 2021. Höfundur: Hranfkell Sigurðsson TF8KY.
/by
,

ÁHUGAVERÐ VÍSBENDING.

Club Log er gagnagrunnur fyrir radíóamatöra þar sem leyfishöfum býðst m.a. að hlaða upp afritum af fjarskiptadagbókum sínum. G7VJR hjá Club Log tók nýlega saman upplýsingar úr innsendum dagbókum um skiptingu sambanda eftir mótun á HF tíðnum, á árinu 2020.

Meðfylgjandi kökurit EI7GL gefur vísbendingu um skiptinguna á milli mótunartegunda á HF árið 2020. Samkvæmt því var mótunartegundin FT8 undir samskiptareglum MFSK mótunar algengust (51,4%) þá mors (22,6%) og loks tal (15,1%). Aðrar mótunartegundir voru samtals með 10,1%.

Upplýsingarnar veita ákveðna vísbendingu um skiptingu eftir tegundum mótunar, en til grundvallar eru innfærð sambönd úr fjarskiptadagbókum fyrir 83.842 kallmerki á árinu 2020.

/by
,

FRIEDRICHSHAFEN 2021 AFLÝST

Tilkynning barst til félagsins í morgun, 26. mars, þess efnis að Ham Radio sýningin í Friedrichshafen sem fyrirhugað var að halda 25.-27. júní n.k., hafi verði aflýst vegna Covid-19 faraldursins.

Dagsetning fyrir sýninguna á næsta ári, 2022, er 24.-25. júní.

Á hverju ári eru haldnar fjölmargar ráðstefnur og sýningar fyrir radíóamatöra um allan heim. Þrjár eru stærstar: Ham Radio í Friedrichshafen í Þýskalandi, Dayton Hamvention í Ohio í Bandaríkjunum og Tokyo Ham Fair í samnefndri höfuðborg Japans. Dayton sýningunni 2021 sem fyrirhugað var að halda 21.-23. maí n.k., var aflýst 11. janúar s.l., einnig vegna Covid-19 faraldursins.

https://www.hamradio-friedrichshafen.com/no-get-together-in-2021-ham-radio-exhibition-once-again-suspended

/by
,

LOKAÐ Í SKELJANESI FIMMTUDAG 25. MARS

Stjórn ÍRA hefur ákveðið að félagsaðstaðan í Skeljanesi verði lokuð fimmtudaginn 25. mars.

Ákvörðunin var tekin í ljósi minnisblaðs sóttvarnalæknis varðandi um tillögur að hertum opinberum sóttvarnaaðgerðum vegna COVID-19 til heilbrigðisráðherra, sem mun setja reglugerð sem tekur gildi frá og með 25. mars um hertar aðgerðir þar sem almennar fjöldatakmarkanir miðast m.a. við mest 10 manns og nándarregla miðast við 2 metra.

Í ljósi þessa, hefur stjórn ÍRA ákveðið að félagsaðstaðan í Skeljanesi verði lokuð frá og með morgundeginum, 25. mars þar til stjórnvöld heimila tilslakanir á ný.

Námskeiði félagsins til amatörprófs er frestað frá sama tíma.

Það er von okkar að þessari ákvörðun fylgi ríkur skilningur.

Stjórn ÍRA.

.

Frá fréttamannafundi ríkisstjórnarinnar í Hörpu 24. mars um hertar sóttvarnaaðgerðir. Ljósmynd: Heilbrigðisráðuneytið.
/by
,

PÁSKALEIKARNIR 2021 NÁLGAST

Páskaleikar ÍRA 2021 verða haldnir helgina 2.-4. apríl n.k.

Meðal nýjunga að þessu sinni er sú breyting, að leikarnir hefjast föstudaginn 2. apríl kl. 18:00 og lýkur eftir tvo sólarhringa, sunnudaginn 4. apríl kl. 18:00.

Þessi breyting á tímasetningu er sú sama og var kynnt í VHF/UHF leikunum í fyrra og almenn ánægja var með.

Hrafnkell Sigurðsson, TF8KY, umsjónarmaður leikanna mun kynna reglurnar fljótlega á þessum vettvangi.

Stjórn ÍRA.

.

Glæsileg verðlaun verða í boði fyrir fyrstu þrjú sætin í leikunum 2021. Myndin er af verðlaunagripum í fyrra (2020). Ljósmynd: TF3JB.
/by