,

ÁGÆT MÆTING Í SKELJANES 4. MARS

Það var ágæt mæting og létt yfir mannskapnum í félagsaðstöðunni í Skeljanesi fimmtudaginn 4. mars. Daggeir Pálsson, TF7DHP, félagsmaður okkar frá Akureyri var sérstakur gestur. Þá kom Hans Konrad Kristjánsson, TF3FG færandi hendi með radíódót, auk þess sem menn sóttu og komu með kort til útsendingar til QSL stofunnar.

Mikið var rætt um loftnet og skilyrðin almennt og sérstaklega í ljósi truflana vegna segulstorma að undanförnu, VHF endurvarpa, mismunandi gæði fæðilína, tæknina og heimasmíðar.

Alls mættu 14 félagar og 1 gestur í Skeljanes þetta ágæta fimmtudagskvöld í mildu veðri í vesturbænum í Reykjavík.

Skeljanesi 4. mars. Frá vinstri: Mathías Hagvaag TF3MH, Georg Kulp TF3GZ, Ólafur Örn Ólafsson TF1OL og Garðar Valberg Sveinsson TF8YY. Ljósmynd: Wilhelm Siguðrsson TF3AWS.
Frá vinstri: Benedikt Sveinsson TF1T, Daggeir Pálsson TF7DHP, Ari Þórólfur Jóhannesson TF1A, Erling Guðnason TF3EE og Ólafur Örn Ólafsson TF1OL. Ljósmynd: Georg Kulp TF3GZ.
Hluti af radíódótinu sem Hans Konrad Kristjánsson TF3FG færði í hús 4. mars. Ljósmynd: Wilhelm Sigurðsson TF3AWS.
/by
,

ARRL INTERNATIONAL DX SSB KEPPNIN

ARRL International DX keppnin 2021 á SSB verður haldin helgina 6.-7. mars. Þetta er tveggja sólarhringa keppni á 160, 80, 40, 20, 15 og 10 metrunum.

Markmiðið er að hafa eins mörg QSO og mögulegt er á þessum tíma við aðrar amatörstöðvar í Bandaríkjunum og Kanada. Mest er hægt að hafa 63 margfaldara á einu bandi.

Bandarískar og kanadískar stöðvar gefa upp skilaboðin: RS og skammstöfun fyrir ríki/fylki. Aðrar stöðvar (þ.á.m. frá TF) gefa upp RS og afl sendis.

Hvert ríki í Bandaríkjunum og hvert fylki í Kanada telja. Öll ríki í Bandaríkjunum gilda þannig sem margfaldarar nema KH6 og KL7 en “District of Columbia, DC” kemur inn sem margfaldari í keppninni.

  • 48 ríki Bandaríkjanna (e. contiguous states) og „District of Columbia (DC)“.
  • 14 fylki Kanada: VO1, VO2, NB, NS, PEI (VY2), VE2, VE3, VE4, VE5, VE6, VE7, VE8 (NWT), VY1 (YUK), VY0.

Með ósk um gott gengi,

Stjórn ÍRA.

Keppnisreglur: http://www.arrl.org/arrl-dx

/by
,

OPIÐ Í SKELJANESI FIMMTUDAG 4. MARS

Félagsaðstaðan í Skeljanesi verður opin fimmtudaginn 4. mars.

Grímuskylda er ásamt 1m nálægðarmörkum. Aðgangur að herbergi QSL stofu á 2. hæð verður takmarkaður við 1 félaga í einu, en fjarskiptaherbergi verður lokað. Ekki verður boðið upp á veitingar. Félagsaðstaðan verður opin kl. 20-22.

Vegna Covid-19 er þess farið á leit, að félagar sem hafa hug á að mæta í Skeljanes fresti því ef þeir kenna lasleika af einhverju tagi, af virðingu við aðra.

Velkomin í Skeljanes!

Stjórn ÍRA.

.

.

.
Andlitsgrímur og handspritt eru í boði við inngang í sal.

Mynd úr félagsaðstöðu ÍRA í Skeljanesi í Reykjavík. Ljósmynd: TF3JB.
/by
,

GÓÐ MÆTING Í SKELJANES 25. FEBRÚAR

Það var góð mæting og létt yfir mannskapnum fimmtudagskvöldið  25. febrúar í Skeljanesi.  Umræður voru í hverju horni og áhugamálið í brennidepli. Mikið var rætt um loftnet, viðhald þeirra og uppsetningu enda vortilfinning  eftir léttan vetur og milt veður hingað til.

Margir voru að skila af sér kortum eða sækja innkomin kort og voru að hitta mann og annan, auk þess sem verðlaun og viðurkenningar ÍRA vegna viðburða á vegum félagsins á árinu 2020 voru til afhendingar. Alls mættu 19 félagar og 1 gestur í félagsaðstöðuna í Skeljanesi þetta ágæta fimmtudagskvöld í mildu rigningarveðri í vesturbænum í Reykjavík.

Ólafur Örn Ólafsson TF1OL tók þátt í öllum þremur viðburðum ÍRA á árinu 2020. Hann náði framúrskarandi góðum árngri og varð í 1. sæti í TF útileikunum. Í verðlaun var ágrafinn veggplatti og sértakt viðurkenningarskjal fyrir árangurinn. Þá varð Ólafur í 2. sæti í VHF/UHF leikum félagsins. Í verðlaun var vandaður verðlaunagripur. Hann hlaut að auki sérstakar viðurkenningar félagsins fyrir bestu ljósmyndina í leikunum og fyrir skemmtilegustu færsluna á Facebook.
Frá vinstri: Einar Kjartansson TF3EK (heldur á viðurkenningarskjali fyrir 2. sætið í TF útileikunum 2020), Mathías Hagvaag TF3MH, Baldvin Þórarinsson TF3-033, Ari Þórólfur Jóhannesson TF1A (standand), Ólafur B. Ólafsson TF3ML, Ólafur Örn Ólafsson TF1OL og Wilhelm Sigurðsson TF3AWS (með bak í myndavél). Á myndinni er Óli (TF3ML) að skoða VHF magnara sem Ari (TF1A) hafði með sér í Skeljanes til að sýna félögunum.
Frá vinstri: Mathías Hagvaag TF3MH (bak í myndavél), Baldvin Þórarinsson TF3-033, Ólafur B. Ólafsson TF3ML, Ólafur Örn Ólafsson TF1OL, Ari Þórólfur Jóhannesson TF1A, Wilhelm Sigurðsson TF3AWS, Einar Kjartansson TF3EK, Vilhjálmur Ívar Sigurjónsson TF3VS og Georg Kulp TF3GZ.
Alltaf er áhugi á radíódóti. Frá vinsti: Georg Kulp TF3GZ, Wilhelm Sigurðsson TF3AWS, Hans Konrad Kristjánsson TF3FG, Benedikt Sveinsson TF3T, Einar Kjartansson TF3EK (bak í myndavél) og Valgeir Pétursson TF3VP. Ljósmyndir: TF3JB.

/by
,

CQ WW SSB 160 METRA KEPPNIN 2021

CQ WORLD-WIDE 160 metra keppnin á SSB fer fram um helgina. Keppnin hefst föstudag 26. febrúar og lýkur á sunnudag 28. febrúar.  Markmiðið er að ná eins mörgum samböndum og unnt er við aðrar stöðvar radíóamatöra um allan heim á keppnistímanum.

QSO punktar: QSO við TF stöðvar 2 punktar; innan Evrópu 5 punktar; utan Evrópu 10 punktar og við /MM stöðvar 5 punktar.

Margfaldarar:

  • Einingar á DXCC lista.
  • Lönd á WAE lista: GM (Hjaltlandseyjar), IG9/IH9 (Lampedusa og Pantelleria eyjar), IT, JW (Bjarnareyja), TA1 (Evrópuhluti Tyrklands) og 4U1VIC.
  • 48 ríki Bandaríkjanna (e. contiguous states) og „District of Columbia (DC)“.
  • 14 fylki Kanada: VO1, VO2, NB, NS, PEI (VY2), VE2, VE3, VE4, VE5, VE6, VE7, VE8 (NWT), VY1 (YUK), VY0.

Leyfilegt tíðnisvið í keppninni á IARU Svæði 1 (okkar svæði) er 1810-2000 kHz. Ath. að G-leyfishafar sem ætla að vinna á 1850-1900 kHz á fullu afli þurfa að hafa sótt um tíðni- og aflheimildir til PFS (sbr.  tilkynningu þess efnis hér á heimasíðunni dags. 23. janúar s.l.).

Keppnisreglur: https://www.cq160.com/

Með ósk um gott gengi!

Stjórn ÍRA.

/by
,

ÁRAMÓTASENDING – NÝR SKILADAGUR.

Fjölmargir félagsmenn hafa óskað eftir meiri tíma til að ganga frá QSL kortum. Í ljósi þess verður síðasti skiladagur vegna áramótaútsendingar fimmtudagurinn 11. mars 2021.

Þau kort sem berast í QSL kassann í Skeljanesi það kvöld verða örugg með að komast í flokkun og til útsendingar fyrir páska. Þá verða öll kort sem borist hafa til QSL stofunnar (þ.á.m. til smærri staða) póstlögð til kortastofa systurfélaganna. Gjaldskrá er óbreytt, 10 krónur á kort, sama verð hvert sem er í heiminum.

Fyrirvari er gerður ef aðgerðir stjórnvalda vegna Covid-19 hamla því að þessi áætlun gangi eftir.

Ofangreindu til staðfestingar,

Mathías Hagvaag, TF3MH,
QSL stjóri ÍRA.

Vefslóð á skilagrein til útprentunar: Skilagrein-form.pdf

/by
,

OPIÐ Í SKELJANESI 25. FEBRÚAR

Félagsaðstaðan í Skeljanesi verður opin fimmtudaginn 25. febrúar.

Grímuskylda er ásamt þeirri kvöð að leitast verði við að halda 2m nálægðarmörkum. Aðgangur að herbergi QSL stofu á 2. hæð verður takmarkaður við 1 félaga í einu, en fjarskiptaherbergi verður lokað. Ekki verður boðið upp á veitingar. Félagsaðstaðan verður opin kl. 20-22.

Vegna Covid-19 er þess farið á leit, að félagar sem hafa hug á að mæta í Skeljanes fresti því ef þeir kenna lasleika af einhverju tagi, af virðingu við aðra.

Velkomin í Skeljanes!

Stjórn ÍRA.

.

Andlitsgrímur og handspritt eru í boði við inngang í húsnæðið.

Fundarsalur ÍRA í Skeljanesi, suðurhluti. Ljósmynd: TF3JB.

/by
,

CQ WPX RTTY KEPPNIN 2021

CQ WPX RTTY keppnin fór fram helgina 13.-14. febrúar síðastliðinn.

Þetta er tveggja sólarhringa keppni og markmiðið er að ná samböndum við eins margar aðrar stöðvar radíóamatöra um heiminn með eins mörgum mismunandi forskeytum og frekast er unnt á 3.5, 7, 14, 21 og 28 MHz.

Keppnisdagbækur voru sendar inn fyrir fimm TF kallmerki: TF1AM, TF2MSN, TF3DC og TF3VE, samkvæmt eftirfarandi:

TF1AM – einmenningsflokkur – háafl.
TF2MSN – einstaklingsflokkur – lágafl.
TF3AO – einstaklingsflokkur – háafl.
TF3VE – einstaklingsflokkur – lágafl.
TF3DC – samanburðardagbók (e. check-log).

Niðurstöður verða birtar í júlíhefti CQ tímaritsins.

https://cqwpxrtty.com/logs_received.htm

/by
,

AÐALFUNDUR ÍRA 2021 – AÐALFUNDARBOÐ

Ágæti félagsmaður!

Með tilvísan til 17. gr. félagslaga, er hér með boðað til aðalfundar ÍRA laugardaginn 13. mars 2021.

Fundurinn verður haldinn í safnaðarheimili Neskirkju við Hagatorg í Reykjavík og hefst stundvíslega kl. 13:00.

Dagskrá er samkvæmt 19. gr. félagslaga.

Reykjavík 19. febrúar 2021,
fyrir hönd stjórnar ÍRA,

Jónas Bjarnason, TF3JB,
formaður.

/by
,

FIMMTUDAGUR 18. FEBRÚAR Í SKELJANESI

Félagsaðstaða ÍRA var opin 18. febrúar. Þetta var önnur opnunin eftir samfellda 5 mánaða lokun vegna Covid-19; en fyrsta opnun var s.l. fimmtudag.

Allir með andlitsgrímur og allir sprittuðu hendur við inngang  í húsnæðið. Þór Þórisson, TF1GW, kom færandi hendi með radíódót úr dánarbúi TF3GB sem var til boða fyrir viðstadda samkvæmt forsendunni : „fyrstur kemur…fyrstur fær“. Hver félagi mátti hafa með sér þrjá hluti úr húsi. Margt nytsamlegt var í boði.  

Að vanda voru fjörugar umræður, m.a. um loftnet; ýmsar lausnir við uppsetningu vírneta, eins- og margbanda. Töluvert rætt um aflmagnara. Einnig rætt um aflgjafa, m.a. um  veikleika „switch-mode“aflgjafa samanborið við „linear“. Síðan vangaveltur um VHF og UHF böndin, m.a. að það mætti vera meiri virkni á 2 metrum.

Fjarskiptaherbergi félagsins var áfram lokað og aðgangur að herbergi QSL stofunnar var takmarkaður við einn félaga í einu. Allir voru sáttir við það fyrirkomulag.

Vel heppnað opnunarkvöld og almenn ánægja með að félagsaðstaðan væri aftur opin. Alls mættu 12 félagar í Skeljanes þetta ágæta febrúarkvöld í vesturbænum í Reykjavík.

Skeljanesi 18. febrúar. Frá vinstri: Sigmundur Karlsson TF3VE, Wilhelm Sigurðsson TF3AWS, Benedikt Sveinsson TF3T, Georg Kulp TF3GZ og Mathías Hagvaag TF3MH.
Frá vinstri: Mathías Hagvaag TF3MH, Jón Björnsson TF3PW, Garðar Valberg Sveinsson TF8YY, Sigmundur Karlsson TF3VE og Wilhelm Sigurðsson TF3AWS.
Fremst á mynd til vinstri og til hægri: Hans Konrad Kristjánsson TF3FG og Sigmundur Karlsson TF3VE. Fjær: Mathías Hagvaag TF3MH, Jón Svavarsson TF3JON og Wilhelm Sigurðsson TF3AWS. Ljósmyndir: TF3JB.

/by