FRÁBÆR FIMMTUDAGUR Í SKELJANESI

Hrafnkell Sigurðsson, TF8KY mætti í Skeljanes 17. nóvember með erindið „Fjarhlustun á HF með Airspy+DiscoverySDR“.

Keli hefur haft verulegar truflanir í viðtöku merkja heima í Vogum, einkum á lægri böndunum. Í baráttu við truflanirnar, gerði hann tilraunir með margskonar vírloftnet, lárétt, lóðrétt, há og lág. Að auki rammaloftnet, m.a. RAØSMS (WellGood loop), „Wideband Active Loop“ með formagnara frá LZ1AQ og heimasmíðuð rammaloftnet (e. active loops), auk þess að prófa QRM Eliminator frá WiMO.

Sumar tilraunir skiluðu árangri. Til dæmis voru mörg dæmi þess að rammanetin gerðu ólesanleg merki vel læsileg. Mest hjálp var af þeim á merkjum á stökkbylgju (e. sky wave) innanlands. QRM Eliminator tækið náði stundum að að bæta S/N hlutfallið verulega, en ekki voru gerðar tilraunir með uppsetningu á sérstöku „truflanaloftneti“ (e. auxiliary antenna). Niðurstaðan af þessum tilraunum varð sú, að e.t.v. væri best að færa móttökuna á annan stað.

Það gekk eftir þegar Keli fékk aðstöðu fyrir Airspy+DiscoverySDR viðtæki (0.5-31 MHz, auk 60-260 MHz) í húsnæði við Elliðavatn. Þar prófaði hann ýmis vírloftnet og beina (e. router). Þar til á þessu ári (2022) virkaði það fyrirkomulag þokkalega þar sem það gerði honum kleift að hafa mörg QSO. Fyrirkomulag var þó ekki gallalaust í fyrstu m.a. vegna seinkunar (e. latency), auk þess sem móttaka átti til að frjósa.

Fyrirkomulagið var endurskoðað í sumar og þegar búið var að fella út feril merkisins í gegnum skýið (e. tunnelling) og breytt var um hugbúnað í SDR++ („cross-platform and open source SDR software“) náðist mikið betri stöðugleiki (hvarf út uppsöfnuð seinkun), þ.e. einfaldlega er smellt á „connect“ og viðtaka hefst.

Erindið var vel unnið og afar fróðlegt. Það var byggt upp á skyggnusýningu (glærum) þar sem inn á milli sýnt myndskeið með hljóðskrám sem var afar áhugavert. Þegar Keli byrjaði erindið leyfði hann okkur að sjá og heyra merki á viðtækinu heima í Vogum á 40 metrum. Móttakan var hreint út sagt ólæsileg. Þannig að hann hefur fundið lausn truflununum og getur nú verið QRV á böndunum innanlands og í DX þegar honum hentar. Keli sagði að lokum það hafi verið verst hvað tilraunirnar hafi tekið mikinn tíma frá því að vera í loftinu en niðurstaðan væri mjög ásættanleg.

Sérstakar þakkir til Hrafnkels Sigurðssonar, TF8KY fyrir vandað, vel samsett, skemmtilegt og afar fróðlegt erindi. Skyggnur og hljóðskrár verða settar á heimasíðu ÍRA. Alls mættu 33 félagar og 1 gestur á erindið í Skeljanesi þetta milda vetrarkvöld í vesturbænum í Reykjavík.

Stjórn ÍRA.