GÓÐAR UMRÆÐUR Í SKELJANESI 6. JÚNÍ

Góð mæting var á opið hús í félagsaðstöðunni fimmtudaginn 6. júní. Mest var rætt um heimaloftnet og bílloftnet á HF; enda sumarið loftnetatími hjá radíóamatörum.

Þrjú loftnet voru til sýnis á staðnum. AM PRO 160 bílloftnet fyrir 160m (kostar £41.46 frá NevadaRadio UK); ½λ tvípóll fyrir 6m (kostar £14.96) og ½λ Halo tvípóll fyrir 6m (kostar £41.63). 50 MHz loftnetin voru keypt frá Moonraker UK. (Halo loftnetið er svokallaður „beygður“ tvípóll, rétthyrndur í lögun og óstefnuvirkur).

TF3JB skýrði m.a. frá, að hann noti 1.8 MHz bílnetið fest við húsþakið með járnið á þakinu sem mótvægi. Það hafi komið ótrúlega vel út, því á tímabilinu 11.11.2018-11.2.2019 hafði hann QSO við alls 54 DXCC einingar á FT8 tegund útgeislunar og fékkst síðasta landið staðfest 31. maí s.l. Menn sýndu 50 MHz loftnetunum einnig áhuga, enda er 6 metra „vertíðin“ að hefjast um þessar mundir.

Mæting var góð í Skeljanes þetta fallega sumarkvöld í Reykjavík, alls 15 félagar og 2 gestir.