Íslenskir radíóamatörar – allar fréttir

Prófnefnd ÍRA ályktaði eftirfarandi á fundi sínum 29. apríl 2013:

————————————————————————————————————————————————–

Ályktun 29. apríl 2013

Prófnefnd ÍRA ályktar að í bókinni “Siðfræði og samskiptasiðir radíóamatöra” séu afar góðar ráðleggingar um siðfræði og aðferðir í starfi radíóamatöra. Þess heldur er mjög óheppilegt hve alvarlegar villur hafa slæðst inn í kaflann um símritun. Hann kennir áður óþekkta merkingu K og notkun símritunartákna sem stríðir gegn Alþjóða fjarskiptareglugerðinni og venju til langs tíma. Það ýtir undir rugling og getur stíað í sundur byrjendum og reyndum iðkendum símritunar. Bókin verður ekki sett á lista nefndarinnar yfir námsefni eins og hún er.

—————————————————————————————————————————————————

Þessari ályktun var beint til stjórnar ÍRA 6. maí 2013. Þá stóðu yfir viðræður við höfunda bókarinnar, í þeirri von að þeir myndu gera nauðsynlegar leiðréttingar sjálfir. Því var stjórn beðin um að bíða með kynningu uns niðurstaða fengist í það hvort svo yrði.

Mikil og vingjarnleg samskipti tókust við Belgíu sem stóðu yfir lengur en ætlað var. Á fundi stjórnar ÍRA þann 10. október 2013, þar sem mættir voru TF3SG, TF3AM, TF3CY og TF3HRY, var málið tekið fyrir og samþykkt að boða til fundar með Prófnefnd. Þá voru viðræður við höfundana á lokasprettinum, og um miðjan nóvember varð ljóst að ekki næðist samkomulag sem duga myndi til að vinda ofan af alvarlegustu villunni (AR í stað K á eftir CQ). Fundur stjórnar og Prófnefndar var þá haldinn 16. nóvember með þátttöku TF3SG, TF3AM, TF3HRY, TF3VS og TF3DX.

Þann 3. mars s.l. sendi ÍRA bréf til IARU. Þar er í grundvallaratriðum spurt hvort það hafi verið ætlun IARU að breyta ríkjandi samskiptareglum á morsi með viðurkenningu sinni á bókinni. Þremur vikum síðar barst svarbréf frá IARU, þar sem spurningunni var ákveðið svarað neitandi. Enn fremur að mikilvægt væri að snúa sér að því að koma í veg fyrir þann rugling sem bókin veldur. ÍRA var hvatt til að leggja tillögu fyrir ráðstefnu IARU-svæðis 1 (Region 1) í haust, og á það bent að aðeins vika væri til stefnu fyrir skilafrest. Stjórn ÍRA skipaði TF3DX (form. prófn.), TF3VS (ritara prófn. og þýðanda bókarinnar) og TF3KB (IARU tengilið)  í vinnuhóp til að leiða þetta mál til lykta og erindið til ráðstefnunnar náði inn á elleftu stundu.

Það og önnur gögn eru aðgengileg á slóðinni http://bit.ly/MGrcRj

Allir félagar ÍRA eru hvattir til að sýna fyllstu tillitssemi og kurteisi í garð höfunda bókarinnar ef þeir ræða málið út á við.  Hér er eingöngu um málefnalegan ágreining að ræða, alls ekki persónulegan.

73

Guðmundur, TF3SG

Stjórn Íslenskra radíóamatöra minnir á að ráðgert er að halda aðalfund ÍRA þann 17. maí 2014 í sal TR að Faxafeni 12.

Minnt er á að tillögum að lagabreytingum sem um er fjallað í 27. grein félagslaga ÍRA  verður að skila inn fyrir 15. apríl

27. gr.

Félagslögum verður aðeins breytt á aðalfundi, enda hafi frumvarp að nýjum eða breyttum greinum borist stjórn félagsins fyrir 15. apríl og verið dreift með aðalfundarboði. Þó getur aðalfundur samþykkt breytingar á félagslögum, sem fram koma á fundinum, séu 88% fundarmanna samþykkir. Breytingartillögur sem fram koma á aðalfundi skulu einungis varða þær tillögur er þar liggja fyrir og nauðsynlegar afleiðingar þeirra. Með tillögum að breytingum skal fylgja skrifleg greinargerð þar sem gerð er grein fyrir ástæðum tillagnanna og væntum áhrifum þeirra. Sé ætlunin að lagabreyting hafi víðtækari áhrif en eingöngu á félagslögin sjálf, svo sem ógildi sérstakar aðalfundarályktanir eða sérstakar samþykktir fyrri aðalfunda skal sérstaklega vísað til þeirra í viðkomandi breytingartillögu og greinargerð.

73

Guðmundur, TF3SG

Nokkrir kjarkmiklir karlamatörar, rúmlega einn tugur, áttu mjög skemmtilega stund með þeim Önnu, TF3VG og Völu, TF3VD í Skeljanesi í gærkvöldi. Þær kynntu alþjóðlega YL ráðstefnu sem fram fer í Reykjavík núna í maí og var kynningin allt að einu fróðleg, lifandi og framúrskarandi vel flutt.

Það var áhugavert að fá þessa skemmtilegu kynningu á YL starfinu og á vönduðum undirbúningi þeirra fyrir ráðstefnuna og heyra líka af SYLRA 2015, Scandinavian Young Ladies Radio Amateurs ráðstefnunni sem verður haldin hér á landi á næsta ári.

ÍRA félagar eru hvattir til að taka þátt og mæta á kvöldverðinn í vor, ennþá er hægt að skrá sig með því að senda tölvupóst á Völu, tf3vd@centrum.is, sjá nánar fréttina hér á undan.

Anna og Vala

Takk Anna og Vala fyrir frábært kvöld

heimasíða ráðstefnunnar: www.iyl.ritmal.is

TF2SUT og TF3JA fóru í Bláfjöll um kvöldmatarleytið í gær og settu upp nýtt loftnet á APRS stafapéturinn, TF3APB. Sett var upp Kathrein tveggja staka loftnet sem vísar í austurátt og inná suðurhluta miðhálendis landsins. Búnaðurinn virkar vel að því er virðist við fyrstu prófanir. Loftnetið hafði brotnað og fokið út í veður og vind snemma vetrar. Stafavarpinn vann samt sem áður í allan vetur á slitnum RG-58 kóax en með mjög skertri ruglingslegri virkni sem skýrist af sveiflandi kóaxenda í ýmsum veðrum og vindum. Hér fyrir neðan er vindhraðakúrfa við Bláfjallaskála síðasta sólarhring. Verkinu lauk uppúr níu í gærkvöldi. Ekki verður sagt annað en að þjónusta Bláfjallastarfsfólks hafi verið frábær því þegar þeir sáu eftir að lyftum hafði verið lokað að einn lítill rauður Yaris stóð eftir mannlaus á bílastæðinu og óveður í aðsigi fundu þeir út með hjálp lögreglu hver var á bílnum og hringdu til að kanna hvort ekki væri allt í lagi. Svo vel vildi til að þeir TF2SUT og TF3JA voru þá eimmitt að týa sig til heimferðar og eins og hendi væri veifað kom Bláfjallastarfsmaður á vélsleða og skutlaði þeim niður á bílastæðið ásamt öllum búnaði í tveimur ferðum. Í vor er á döfinni loftbelgjaflug og jafnvel eldflaugarskot hér á skerinu.

Vindhraði við Bláfjallaskála

Tilkynning,

Ráðgert er að aðalfundur ÍRA 2014 verði haldinn 17. maí 2014 í sal og húsnæði TR, Faxafeni 12.

Auglýsing um aðalfund verður send út síðar.

73

Guðmundur, TF3SG