Íslenskir radíóamatörar – allar fréttir

Alþjóðadagur radíóamatöra er 18. apríl ár hvert og ber að þessu sinni upp á miðvikudag. Það var þann mánaðardag árið 1925 sem alþjóðasamtök landsfélaga radíóamatöra, International Radio Amateur Union, I.A.R.U., voru stofnuð fyrir 87 árum.

Einkunnarorðin eru að þessu sinni: Gervitungl radíóamatöra: 50 árum fagnað í geimnum (Amateur Radio Satellites: Celebrating 50 Years in Space). Fyrstu gervitungl radíóamatöra voru OSCAR 1 og OSCAR 2 sem send voru á braut umhverfis jörðu þann 12. desember 1961 annarsvegar, og 2. júní 1962 hinsvegar.

Aðildarfélög I.A.R.U. eru í dag starfandi í 166 löndum heims með nær 4 milljónir leyfishafa.

Stjórn Í.R.A. óskar félagsmönnum til hamingju með daginn!

Páskahátíðin nálgast. Næstkomandi fimmtudag, þann 5. apríl, er skírdagur. Félagsaðstaða Í.R.A. við Skeljanes verður lokuð þann dag. Næsti opnunardagur verður fimmtudaginn 12. apríl. Þann dag verður í boði erindi Benedikts Sveinssonar, TF3CY, um QRO málefni (sem verður nánar kynnt síðar).

Stjórn Í.R.A. óskar félagsmönnum og fjölskyldum þeirra gleðilegrar páskahátíðar.

Jónas Bjarnason, TF2JB,
formaður.

Vilhjálmur Þór Kjartansson, TF3DX, formaður prófnefndar í Skeljanesi 30. mars.

Í.R.A. bauð upp á sérstakt kynningarkvöld þann 30. mars í félagsaðstöðunni í Skeljanesi vegna fyrirhugaðs prófs til amatörleyfis sem haldið verður þann 28. apríl n.k. án undangengins námskeiðs, sem auglýst var á heimasíðu félagsins nýlega.

Vilhjálmur Þór Kjartansson, TF3DX, formaður prófnefndar félagsins annaðist kynninguna. Hann lagði fram og kynnti nýja samantekt nefndarinnar fyrir þá sem áhuga hafa á að sitja próf til amatörleyfis: Námsefni og próf fyrir radíóamatöra. Í framhaldi fór Vilhjálmur yfir og kynnti prófkröfur samkvæmt gildandi reglugerð um starfsemi radíóamatöra. Þá kynnti hann eftirfarandi námsgögn sem lágu frammi á fundinum:
______________________________

(1) Passport to Amateur Radio (J. Lawrence, GW3JGA);
(2) Amatörpróf í raffræði og raftækni, 1. útgáfa. (Prófnefnd Í.R.A.);
(3) Samantekt á námsefni fyrir radíóamatörpróf í reglum og viðskiptum (Prófnefnd Í.R.A.);
(4) Námsefni úr reglugerð um raforkuvirki fyrir radíóamatöra (Prófnefnd Í.R.A.); og
(5) Truflanir frá sendum (Vilhjálmur Þór Kjartansson, TF3DX).

Auk tilgreindra þátta úr ritinu Siðfræði og samskiptasiðir radíóamatöra (J. Devoldere, ON4UN og M. Demeuleneere, ON4WW) í þýðingu Vilhjálms Ívars Sigurjónssonar, TF3VS;
_______________________________

Fram kom m.a., að Póst- og fjarskiptastofnun hefur staðfest að prófið verður haldið í félagsaðstöðu Í.R.A. í Skeljanesi laugardaginn 28. apríl n.k. kl. 10 árdegis. Prófað verður bæði á íslensku og ensku. Þess má geta, að flest það efni sem vísað er til hér að ofan má finna á nýju vefsvæði prófnefndar Í.R.A. á  heimasíðu félagsins á eftirfarandi vefslóð: http://www.ira.is/namsefni/

Stjórn Í.R.A. þakkar Vilhjálmi Þór Kjartanssyni, TF3DX, fyrir vel heppnaðan viðburð í Skeljanesi og óskar væntanlegum próftökum góðs gengis þann 28. apríl n.k.

Frá kynningarfundi vegna prófs til amatörleyfis í félagsaðstöðunni í Skeljanesi 30. mars.

Hluti nemenda sem sat próf til amatörleyfis í félagsaðstöðunni við Skeljanes í maí 2011.

Alls skráðu sig 15 manns í fyrirhugað próf til amatörleyfis án undangengins námskeiðs, sem auglýst var á heimasíðu Í.R.A. nýlega. Stjórn félagsins hefur nú borist jákvæð umsögn prófnefndar félagsins hvað varðar prófhald laugardaginn 28. apríl. Prófað verður bæði á íslensku og ensku. Í.R.A. hefur, í framhaldi, farið þess formlega á leit við Póst- og fjarskiptastofnun að prófið verði haldið þann dag.

Félagið býður hér með upp á sérstakt kynningarkvöld föstudaginn 30. mars kl. 20:30 í félagsaðstöðu Í.R.A. Sagt verður frá fyrirkomulagi prófs og hvert námsefnið er. Fjölrituð eintök verða á boðstólum. Nýirpróftakar eru sérstaklega hvattir til að koma. Fyrirspurnum má beina á ira hjá ira.is

Félagsheimili ÍRA

Vinna við aprílhefti CQ TF hefst eftir helgina, en á sunnudag, 25. marz, er frestur til að skila efni í blaðið eða hafa samband við ritstjóra um efni sem kann að vera á leiðinni.

Allt efni um amatör radíó er vel þegið, s.s. frásagnir, greinar, myndir eða einfaldlega ábendingar um efni sem væri áhugavert.

73 – Kiddi, TF3KX – ritstjóri CQ TF
Netfang: cqtf@ira.is GSM 825-8130

Í tengslum við 8. EVE Online Fanfest hátíð tölvuleikjaframleiðandans CCP sem haldin verður í Reykjavík dagana 22.-24. mars n.k. ætla nokkrir nemendur í Háskólanum í Reykjavík að senda upp „geimskip” hangandi neðan í loftbelg. Eitthvað skemmtilegt verður í loftbelgnum en það sem snýr að radíóamatörum er að þeir hafa áhuga á að nota APRS til að ferilvakta flugið.

Ein tilraunauppsending fór nýlega fram og var “SPOT” notað til að ferilvakta belginn. Í það skiptið fór belgurinn í boga yfir Ísland og endaði í hafinu miðja vegu milli Færeyja og Íslands. Það sem kom á óvart var að SPOT sendi engar upplýsingar á miðkafla leiðarinnar, engin skýring hefur enn fengist á því en einhverjum datt í hug að hugsanlega væri ferilvöktunin ekki höfð virk í SPOT-
kerfinu eftir vissa hæð og ofar, af öryggisástæðum.

Meginverkefni okkar radíóamatöra er í raun að tryggja að núverandi APRS kerfi verði virkt og fram kom hugmynd um að nýta loftnetið sem ætlað fyrir samskipti við gervihnetti í félagsaðstöðu Í.R.A. í Skeljanesi fyrir APRS á meðan á fluginu stendur. Undirritaður gerir ráð fyrir að sjá um að tengja TF3RPG við loftnetið og áætlar að tengja lágsuðsmagnara við stöðina til að auka næmni hennar. Væntanlega verða fleiri úr APRS hópnum í Skeljanesi þegar flugið fer fram og verður opið fyrir alla félagsmenn að koma og fylgjast með. TF3ARI er með áætlanir á prjónunum um að keyra austur fyrir fjall og vera með stafapétur/I-gátt í bíl og auka þannig enn frekar möguleika þess að ferilvöktunin takist vel.

Loftbelgurinn fer mjög hratt upp og nær líkast til um 30-35 km hæð og þess vegna verulegar líkur á að bæði TF3RPG og TF8TTY nái sendingum hans megnið af flugtímanum.

HR hópurinn ætlar ekki að láta loftbelginn fljúga mjög lengi kannski í um það bil tvo tíma og þá eru líkur á að hann fari um 300 km frá upphafsstað, í hvaða átt er kannski ekki alveg vitað núna en líkur á að hann fari svipaða leið og í fyrsta tilraunafluginu.

Verkefnið er spennandi og upplagt tækifæri fyrir sem flesta sem áhuga hafa á APRS að fylgjast með og jafnvel setja upp eigin búnað, stafpétra eða I-gáttir, til dæmis væri virkilega áhugavert að sjá hvort Akureyri gæti náð einhverjum hluta leiðarinnar.

(Samantekt: Jón Þóroddur Jónsson, TF3JA).