Íslenskir radíóamatörar – allar fréttir

Frá vel heppnuðum fimmtudagsfundi þann 15. september 2011 í félagsaðstöðunni í Skeljanesi.

Góð mæting var á sérstakan fimmtudagsfund í félagsaðstöðunni þann 15. september og mættu yfir 30 félagar í Skeljanesið. Á fundinum fór fram kynning á fyrri hluta vetrardagskrár félagsins starfsárið 2011/2012 fyrir tímabilið október-desember n.k. og kynning á helstu alþjóðlegum keppnum á næstunni, auk dagskrárliðar um opna málaskrá (eftir kaffihlé).

Fram kom m.a. í kynningu formanns, Jónasar Bjarnasonar, TF2JB, að alls verða 20 viðburðir í boði á vetrardagskránni; þar af átta erindi auk annarra viðburða og að alls eru 16 félagsmenn sem standa að dagskránni. Að þessu sinni hefjast sunnudagsopnanir þann 20. nóvember og eru þær fjórar. Þá verður flóamarkaður að hausti með nýju sniði og var fyrirkomulagið sérstaklega kynnt á fundinum. Þá má nefna ánægjulega nýjung, sem er að sérfræðingur hjá Póst-og fjarskiptastofnun, mun koma og flytja erindi í félagsaðstöðunni í desember n.k. Vetrardagskráin verður nánar til kynningar hér á heimasíðunni frá og með 19. september n.k., auk þess sem hún verður birt í heild í 4. tbl. tölublaði CQ TF. Undir 2. dagskrárlið voru kynntar helstu alþjóðlegar keppnir út árið (sbr. meðfylgjandi töflu), þ.m.t. breyting á reglum í SAC keppnunum og nýtt stjórnunarfyrirkomulag.

Kjartan Bjarnason, TF3BJ, varaformaður, annaðist stjórn 3. dagskrárliðar sem var opin málaskrá ásamt Benedikt Sveinssyni, TF3CY, meðstjórnanda. Kjartan útskýrði, að hugmyndin að baki þessum dagskrárlið væri m.a. að opna vettvang fyrir skoðaskipti á milli stjónar og félagsmanna. Rætt var m.a. um keppnir og keppnisþátttöku frá félagsstöðinni, tæki, búnað og loftnet félagsstöðvarinnar o.m.fl. Þá voru menn mjög áhugasamir um SDR tæknina og var rædd uppsetning SDR viðtækis á Garðskaga á vegum TF3ARI og TF8SM, sem Ari skýrði vel.

Fundinum var í alla staði mjög jákvæður og var umræðum slitið kl. 22:20. Stjórn Í.R.A. þakkar félögum góða mætingu og ánægjulegan fund. Sérstakar þakkir til Geirabakarís í Borganesi fyrir veglegt kaffimeðlæti.

Jónas Bjarnason, TF2JB, formaður, kynnti nýju vetrardagskrá og flutti kynningu á helstu alþjóðlegum keppnum.

Benedikt Sveinsson, TF3CY, meðstjórnandi og Kjartan Bjarnason, TF3BJ, varaformaður kynntu 3. dagskrárlið.

Jón Óskarsson TF1JI; Jón Þ. Jónsson TF3JA; Ásbjörn Harðarson TF3LA; og Sveinn Bragi Sveinsson TF3SNN.

Óðinn Þór Hallgrímsson, TF2MSN; Guðjón Helgi Egilsson, TF3WO; og Benedikt Guðnason, TF3TNT.

Jón Þóroddur; TF3JA; Benedikt, TF3CY; Ari Þór, TF3ARI; Sæmundur, TF3UA; og Guðmundur, TF3SG.

fundarhléi á góðri stundu. Heimir Konráðsson, TF1EIN og Baldvin Þórarinsson, TF3-033.

Í fundarhléi á góðri stundu. Sæmundur E. Þorsteinsson, TF3UA og Kjartan H. Bjarnason, TF3BJ.

Höskuldur Elíasson, TF3RF, sagðist vera mjög ánægður með fundinn.

(Ljósmyndir: Matthías Hagvaag, TF3-035 og Jónas Bjarnason, TF2JB).

Sigurður R. Jakobsson, TF3CW.

Sigurður R. Jakobsson, TF3CW, var með afgerandi bestan árangur TF-stöðva.

Í septemberhefti CQ tímaritsins 2011 eru birtar niðurstöður úr CQ World-Wide DX CW keppninni sem fram fór dagana 27.-28. nóvember 2010. Ágæt þátttaka var frá TF, en alls sendu sjö TF-stöðvar inn keppnisdagbækur; þær dreifast á eftirfarandi sex keppnisflokka:

Öll bönd, SOP-H: Einmenningsflokkur, öll bönd, hámarks útgangsafl.
Öll bönd, SOP-H-a: Einmenningsflokkur, öll bönd, hámarks útgangsafl – aðstoð.
Öll bönd, SOP-L: Einmenningsflokkur, öll bönd, mest 100W.
Öll bönd, SOP-L-a: Einmenningsflokkur, öll bönd, mest 100W útgangsafl – aðstoð.
7 MHz, SOP-H-a: Einmenningsflokkur, 7 MHz, hámarks útgangsafl – aðstoð.
1.8 MHz, SOP-H-a: Einmenningsflokkur, 1.8 MHz, hámarks útgangsafl – aðstoð.

Sigurður R. Jakobsson, TF3CW náði afgerandi bestum árangri af TF-stöðvum í keppninni og var með 734,880 stig – 2,737 QSO. Sigurður keppti í einmenningsflokki á 7 MHz, hámarks afli – aðstoð. Óskar Sverrisson, TF3DC, náði ágætum árangri og var með 154,840 stig – 414 QSO. Óskar keppti í einmenningsflokki á öllum böndum, 100W – aðstoð. Þorvaldur Stefánsson, TF4M, náði einnig athyglisverðum árangri, en hann keppti í einmenningsflokki á 1.8 MHz í erfiðum skilyrðum og var með 31,032 stig – 197 QSO. Sjá nánar í meðfylgjandi töflu.

*Bestur árangur í viðkomandi keppnisflokki (innan TF) og handhafi viðurkenningarskjals.
Lágmarks þátttökutími til að hljóta viðurkenningarskjal í keppninni er 12 klukkustundir.

Hamingjuóskir til þátttakenda með árangurinn.

DXCC viðurkenningarskjöl félagsstöðvarinnar TF3IRA eru komin til landsins og tilbúin til innrömmunar.

DXCC viðurkenningarskjölin frá ARRL fyrir TF3IRA komu í hús á fimmtudag. Um er að ræða þrjú viðurkenningarskjöl, þ.e. fyrir mors (CW), tal (Phone) og allar tegundir útgeislunar (Mixed). Hugmyndin var upphaflega að leitast við að fá skjölin til landsins í tíma fyrir 65 ára afmæli félagsins þann 14. ágúst s.l., sem náðist ekki. Mestu skiptir þó að þau eru komin í hendur félagsins (á afmælisárinu) og verða sett í innrömmun þegar í næstu viku. Í framhaldi verður þeim valin staðsetning í fjarskiptaherbergi félagsins í samráði við Benedikt Sveinsson, TF3CY, stöðvarstjóra. Búist er við, að hægt verði að sækja um fjórða skjalið fyrir stafrænar mótanir (Digital modes), s.s. RTTY, PSK-31, JT65 og fleiri, síðar á árinu. Þess má geta, að ARRL hefur staðfest að þetta eru fyrstu DXCC skjölin sem gefin hafa verið út fyrir TF3IRA.

Stjórn Í.R.A. þakkar þeim Matthíasi Hagvaag, TF3-Ø35 og Guðlaugi K. Jónssyni, TF8GX, fyrir aðkomu þeirra að verkefninu, en Matthías tók saman kortin og vann umsóknir og Guðlaugur, sem er trúnaðarmaður ARRL vegna DXCC-umsókna hér á landi, annaðist yfirferð og sendingu gagna vestur um haf.

Matthías Hagvaag, TF3MG og Guðlaugur K. Jónsson, TF8GX.

Myndin var tekin í félagsaðstöðu Í.R.A. 21. júlí s.l. þegar Matthías lagði fyrir Guðlaug, síðustu kortin vegna DXCC umsóknanna til ARRL.

Líkt og skýrt var frá á þessum vettvangi þann 7. júlí s.l., kallaði Póst- og fjarskiptastofnun nýlega eftir samráði við hagsmunaaðila um nýja tíðnistefnu til næstu fjögurra ára, 2011-2014. Skjal stofnunarinnar þessa efnis, auk sérstaks umræðuskjals um farnetsþjónustur og úthlutun tilheyrandi tíðnisviða, hefur verið til birtingar á heimasíðu stofnunarinnar frá 1. júlí s.l. og er frestur gefinn til að skila umsögnum og athugasemdum til 19. ágúst n.k.

Efni tíðnistefnunnar sem sérstaklega varðar radíóamatöra, er birt í kafla 6.11 (á bls. 27) í eftirfarandi texta: “6.11 Radíóáhugamannaþjónusta. Þjónusta fyrir radíóáhugamenn (radíóamatöra) er viðurkennd af hálfu ITU með formlegri þjónustuskilgreiningu í fjarskiptareglum og sérstaklega úthlutuðu tíðnisviði fyrir þá. Það er mat PFS að auka þurfi fræðslu og eftirlit með þessari þjónustu og meta hvort ástæða sé til að endurskoða hámarkssendistyrk sem leyfður er í þéttbýli Þá verður metið hvort ástæða er til að gera kröfur um tiltekna lágmarksfjarlægð loftnets frá íbúðarhúsnæði m.t.t. alþjóðlegra viðmiða”.

Á þeim tíma sem liðinn er frá kynningu PFS, hefur stjórn Í.R.A. fjallað um þau fjögur meginatriði tíðnistefnunnar sem snerta radíóamatöra, þ.e. mat stofnunarinnar um þörf á aukinni fræðslu, aukið eftirlit, hvort ástæða sé til að endurskoða hámarkssendistyrk í þéttbýli og lágmarksfjarlægð loftnets frá íbúðarhúsnæði. Í framhaldi umfjöllunar um þessi atriði, var formlega fjallað um málið á stjórnarfundi sem haldinn var í félaginu þann 19. júlí s.l. og samþykkt, að óska eftir samráðsfundi með fulltrúum stofnunarinnar. Sérstakur samráðsfundur var síðan haldinn með fulltrúum Póst- og fjarskiptastofnunar þann 16. ágúst s.l., þar sem m.a. var farið yfir framangreind meginatriði. Stjórn Í.R.A. er þeirrar skoðunar að fundurinn hafi verið mjög gagnlegur og þjónað tilgangi sínum í því að efla skilning hjá báðum aðilum. Nánar verður gerð grein fyrir fundinum í næsta tölublaði CQ TF sem kemur út í september n.k.

Tíðnistefnu PFS má nálgast á þessum hlekk: http://www.pfs.is/default.aspx?cat_id=112&module_id=220&element_id=3259