Íslenskir radíóamatörar – allar fréttir

Félagsaðstaða ÍRA í Skeljanesi var opin fimmtudaginn 10. ágúst.

Umræður voru á báðum hæðum, menn hressir og TF3IRA var í loftinu á FM á 2 metrum og á morsi á 17 metrum.

Yfir kaffinu var m.a. rætt um TF útileikana sem haldnir voru um síðustu helgi og báru menn saman bækur sínar. Einar Kjartansson, TF3EK umsjónarmaður leikanna staðfesti að mikið væri komið inn af dagbókum, en skilafrestur er fram á mánudag. Einnig var mikið rætt um loftnet, tæki og búnað og skilyrðin á böndunum, m.a. um QO-100 gervitunglið sem sendir merki á 10.489 GHz.

Þór Þórisson, TF1GW færði félaginu töluvert af vönduðu radíódóti.

Alls mættu 24 félagar og 1 gestur í Skeljanes þetta ágæta fimmtudagskvöld í sumarblíðu og logni í vesturbænum í Reykjavík.

Stjórn ÍRA.

KiwiSDR viðtæki Georgs Kulp, TF3GZ yfir netið á Raufarhöfn var tekið niður í gær, 8. ágúst.

Það hafði verið tengt í fjögur ár; var sett upp 10. ágúst 2019. Georg leitar að nýjum stað til uppsetningar fyrir tækið. KiwiSDR viðtæki Georgs á Bjargtöngum verður áfram QRV ásamt viðtæki Árna Helgasonar, TF3AH.

Þakkir til þeirra Georgs Kulp, TF3GZ, Árna Helgasonar TF4AH og Karl Georgs Karlssonar TF3CZ fyrir dugnað og elju við að sinna verkefninu um viðtæki yfir netið – sem er mikilvægt fyrir radíóamatöra sem gera tilraunir í HF, VHF og UHF tíðnisviðum, auk hlustara sem áhuga hafa á útbreiðslu radíóbylgna.

Stjórn ÍRA.

TF útileikum ÍRA 2023 lauk í dag, 7. ágúst á hádegi.

Á annan tug leyfishafa tóku þátt og voru stöðvar virkar frá öllum landshlutum, nema Austurlandi. Flest sambönd voru á tali (SSB) en einnig á morsi (CW). Ekki er vitað um að menn hafi notað FT8 eða FT4 samskiptaháttinn. Tíðnin 3.633 MHz á 80 metrum var mest notuð ásamt 1.845 MHz á 160 metrum, 7.120 MHz á 40 metrum og 5.363 MHz á 60 metra bandi.

Skilyrði til fjarskipta innanlands voru erfið fyrri daginn, en úr rættist þegar leið á keppnina. Félagsstöðin TF3IRA var virk bæði á laugardag og sunnudag og voru alls höfð alls 52 sambönd frá Skeljanesi. Ánægjulegt erindi barst frá Fjarskiptastofu fyrir leikana þess efnis, að leyfishafar hefðu heimild til að nota allt að 100W í tilraunum á 60 metra bandi í útileikunum.

Fjarskiptadagbókum má skila með því að fylla út eyðublað á vefslóðinni https://eik.klaki.net/cgi-bin/utileikar  Einnig má senda gögnin á stafrænu formi, t.d. adif, í tölvupósti á ira@ira.is  Frestur til að ganga frá dagbókum er til 13. ágúst.

Hrafnkell Sigurðsson, TF8KY hefur sett upp Excel skjal fyrir dagbókafærslur í útileikunum. Þátttakendur geta sent skjalið á Kela hrafnk@gmail.com eftir verslunarmannahelgina og hann mun útbúa skriftu sem gerir mögulegt að setja færslurnar beint inn í gagnagrunninn hjá TF3EK. Sækið skjalið hér (það verður að afrita slóðina í nýjan flipa, það virkar ekki að smella á hlekkinn): http://cloudqso.com/downloads/Utileikar.xlsx

Þakkir til félagsmanna fyrir þátttökuna. Sérstakar þakkir fær Einar Kjartansson, TF3EK umsjónarmaður TF útileikana fyrir góða kynningu og utanumhald.

Stjórn ÍRA.

Félagsaðstaða ÍRA í Skeljanesi verður opin fimmtudaginn 3. ágúst fyrir félagsmenn og gesti frá kl. 20 til 22.

Fjarskiptaherbergi TF3IRA og QSL stofa á 2. hæð verða opin. Nýjustu tímarit radíóamatöra liggja frammi í fundarsal á 1. hæð.

QSL stjóri verður búinn að fara í pósthólf félagsins og raða innkomnum kortum í hólf félagsmanna. Kaffiveitingar.

Verið velkomin í Skeljanes!

Stjórn ÍRA.

Unnið var í loftnetum félagsins í Skeljanesi miðvikudaginn 26. júlí.

Skipt var út „skotti“ frá „hardline“ kapli sem fæðir OptiBeam Yagi loftnetið á 20 metrum, auk þess sem skipt var út stögum sem ganga út á bómuna. Í annan stað var sett upp nýtt loftnet fyrir 80 og 40 metra böndin.

Georg Kulp, TF3GZ hafði útbúið nýtt „skott“ sem var tengt yfir í „hardline“ kapalinn. Stögin sem ganga út á bómuna voru einnig endurnýjuð og annaðist Sigurður R. Jakobsson, TF3CW innkaup á nauðsynlegu efni. Allt kom frábærlega vel út; standbylgja: 1,14.

Þá var sett upp nýtt 40 metra langt endafætt tveggja banda loftnet frá HyEnd Antenna fyrir 80 og 40 metra böndin. Það var strengt frá sama röri og 160 metra endafædda loftnetið er fest við – yfir í nýja turninn sem settur var upp í byrjun mánaðarins. Allt kom vel út; standbylgja 1,69 á 80 metrum og 1,05 á 40 metrum.

Þakkir til Sigurðar R. Jakobssonar TF3CW, Georgs Kulp TF3GZ og Jónasar Bjarnasonar TF3JB fyrir frábært vinnuframlag. Armar-vinnulyftur ehf., fá ennfremur sérstakar þakkir fyrir stuðninginn.

Stjórn ÍRA.