Íslenskir radíóamatörar – allar fréttir

Opið var í félagsaðstöðu ÍRA í Skeljanesi fimmtudag 24. október. Benedikt Sveinsson, TF3T hélt fræðsluerindi kvöldsins sem var: „CQ WW keppnirnar; hvernig tek ég þátt?“ og hófst erindið stundvíslega kl. 20:30.

Benedikt, sem hefur náð mjög góðum árangri meðal TF stöðva í mörgum alþjóðlegum keppnum útskýrði, að í boði eru CQ WW DX keppnir á CW, RTTY og SSB síðari hluta árs og CQ WW WPX keppnir sem eru í boði á CW, RTTY og SSB, fyrri hluta árs. Eftir þennan inngang var einungis rætt um CQ World Wide DX keppnirnar, en SSB hlutinn er einmitt haldin um þessa helgi, 26.-27. október og ætlar Benedikt að taka þátt.

Hann varpaði fram spurningunni: „Getur TF stöð unnið CQ WW?“ Og hann svaraði sjálfur: „Nei, ekki yfir heiminn en e.t.v. yfir Evrópu; því veldur stigagjöfin“. Stöðvar sem eru í Karabíska hafinu, eða undan vesturströnd Afríku (eða í Afríku), fá 3 stig fyrir hvert samband á meðan TF stöð fær einungis 1 stig fyrir hvert samband við Evrópu. Vegna þessa eru allar helstu keppnisstöðvar þarna suðurfrá. Meira að segja Grænland, sem er einnig í CQ svæði 40 fær fleiri stig en TF þar sem Grænland telst til meginlands Norður Ameríku. Benedikt fjallaði einnig um hvernig keppnisstöðvar hafi þróast, t.d. með eina aðalstöð á hverju bandi og eina eða jafnvel tvær aukastöðvar á sama bandi einungis til að veiða margfaldara. Annars væru yfir 60 keppnisflokkar í boði í CQ WW keppnunum, þannig að hver og einn á að eiga auðvelt með að taka þátt í keppnunum.

Gerður var góður rómur að erindi Benna, og margir voru með spurningar. Sérstakar þakkir til Benedikts Sveinssonar, TF3T fyrir áhugavert erindi og vel flutt. Ennfremur þakkir til Vilhjálms Í. Sigurjónssonar, TF3VS fyrir ljósmyndir.

Alls mættu 15 gestir í Skeljanes þetta ágæta fimmtudagskvöld í mildu vetrarveðri í vesturbænum í Reykjavík, þ.á.m. 2 gestir, Ómar Magnússon, TF3WK sem er búsettur í Danmörku þar sem hann notar kallmerkið OZ1OM og Alex M. Senchurov, TF3UT. Ómar reiknar með að mæta aftur í Skeljanes n.k. fimmtudagskvöld.

Stjórn ÍRA.

(Upptaka var gerð af erindi TF3T sem verður á boði fljótlega á þessum vettvangi).

ÍRA hafa borist upplýsingar um tíðnir á 40 og 20 metrum sem hafa verið teknar til notkunar fyrir neyðarfjarskipti vegna fellibylsins Oscar sem gengur nú yfir Kúbu og stefnir m.a. á Bahamaeyjar, en  radíóamatörar annast neyðarfjarskipti á þessum svæðum.

Tíðnirnar eru: 7.110 MHz, 7.120 MHz og 14.325 MHz.

Þess er farið á leit að íslenskir radíóamatörar taki tillit til þessara forgangsfjarskipta, a.m.k. næstu daga.

Stjórn ÍRA.

CQ World Wide DX SSB keppnin fer fram helgina 26.-27. október.

Þetta er stærsta alþjóðlega SSB keppni ársins; 48 klst., engin tímatakmörk og í boði eru yfir 60 mismunandi keppnisflokkar.

Markmiðið er að ná eins mörgum samböndum og frekast er unnt við aðra radíóamatöra um allan heim – í eins mörgum löndum (DXCC einingum) og á eins mörgum CQ svæðum og frekast er unnt. Keppt er á 1.8, 3.5, 7, 14, 21 og 28 MHz.

Stjórn félagsins hvetur félagsmenn til þátttöku og að skila inn radíódagbókum að keppni lokinni. Í fyrra (2023) var skilað dagbókum fyrir 9 TF kallmerki Í 4 keppnisflokkum til keppnisstjórnar CQ.

Með ósk um gott gengi!

Stjórn ÍRA.

Heimasíða keppninnar: https://cqww.com/  
Keppnisreglur: https://cqww.com/rules.htm

JARTS WW RTTY CONTEST
Keppnin stendur yfir frá laugardegi 19. október kl. 00:00 til sunnudags 20. október kl. 24:00.
Hún fer fram á RTTY á 80, 40, 20, 15 og 10 metrum.
Skilaboð: RST + aldur þátttakanda.
http://jarts.jp/rules2024.html

YBDXPI FT8 CONTEST
Keppnin stendur yfir frá laugardegi 19. október kl. 00:00 til sunnudags 20. október kl. 23:59.
Hún fer fram á FT8 á 160, 80, 40, 20, 15 og 10 metrum.
Skilaboð: 4 stafa Maidenhead reitur (e. grid square).
http://contest.ybdxpi.net/home-ft8/rules/

10-10 INTERNATIONAL FALL CONTEST, CW
Keppnin stendur yfir frá laugardegi 19. október kl. 00:01 til sunnudags 20. október kl. 23:59.
Hún fer fram á CW á 10 metrum.
Skilaboð 10-10 félaga: Nafn + 10-10 félagsnúmer + (ríki í USA/fylki í Kanada/DXCC eining).
https://www.ten-ten.org/index.php/activity/2013-07-22-20-26-48/qso-party-rules

YLRL DX/NA YL Anniversary Contest
Keppnin stendur yfir frá laugardegi 19. október kl. 14:00 til mánudags 21. október kl. 02:00.
Hún fer fram á CW/SSB og Digital á öllum HF böndum nema WARC (þ.e. 12, 17 og 30M).
Skilaboð. RS(T) + raðnúmer + (ARRL deild (e. section)/fylki í Kanada/DXCC eining).
https://ylrl.net/contests

WORKED ALL GERMANY CONTEST
Keppnin stendur yfir frá laugardegi 19. október kl. 15:00 til sunnudags 20. október kl. 14:59.
Hún fer fram á CW og SSB á 80, 40, 20, 15 og 10 metrum.
Skilaboð DL stöðva sem eru DARC félagar: RS(T) + DOK númer (e. chapter code).
Skilaboð DL stöðva sem eru ekki DARC félagar: RS(T) + bókstafirnir „NM“.
Skilaboð annarra: RST + raðnúmer.
https://www.darc.de/der-club/referate/conteste/wag-contest/en/rules

Stew Perry Topband Challenge
Keppnin stendur yfir frá laugardegi 19. október kl. 15:00 til sunnudags 20. október kl. 15:00.
Hún er fram á CW á 160 metrum.
Skilaboð: RST + 4 stafa Maidenhead reitur (e. grid square).
https://www.kkn.net/stew

Með ósk um gott gengi!

Stjórn ÍRA.

„Uppskeruhátið“ ÍRA fór fram í félagsaðstöðunni Skeljanesi fimmtudaginn 10. október. Til afhendingar voru verðlaunagripir og viðurkenningaskjöl fyrir bestan árangur í fjarskiptaleikum félagsins á árinu 2024; páskaleikum, sumarleikum og TF útileikum.

Andrés Þórarinsson, TF1AM varaformaður setti dagskrána stundvíslega kl. 20:30 og bauð félagsmenn velkomna. Að því búnu fluttu þeir Einar Kjartansson, TF3EK umsjónarmaður TF útileikana og Hrafnkell Sigurðsson, TF8KY umsjónarmaður páskaleika og sumarleika stutt erindi með upplýsingum um hvern viðburð, m.a. um þátttöku og niðurstöður. Að því búnu tók varaformaður aftur við og hófust þá afhendingar verðlauna og viðurkenninga. Tveir félagar fengu flesta verðlaunagripi og viðurkenningar, þeir Hrafnkell Sigurðsson, TF8KY og Óðinn Þór Hallgrímsson, TF2MSN eða fimm hvor um sig.

Sérstakar þakkir til umsjónarmannanna Hrafnkels Sigurðssonar, TF8KY og Einars Kjartanssonar, TF3EK fyrir þeirra frábæra framlag. Ennfremur sérstakar þakkir til Andrésar Þórarinssonar, TF1AM varaformanns fyrir að stjórna kvöldinu af röggsemi og húmor. Síðast en ekki síst, þakkir til Jóns Svavarssonar, TF1JON ljósmyndara félagsins fyrir frábærar myndir.

Stjórn ÍRA.